ޒުވާން މަސްވެރިޔާގެ މަަޝްހޫރު ހަސަން ސާޖިން ރާއްޖޭގެ ހުރިހާ ރަށަކަށް ކުރާ ދަތުރަކަށް ތައްޔާރުވެއްޖެ އެވެ.
"ޑިސްކަވާ މޯލްޑިވްސް" ގެ ނަމުގައި ސާޖިން ކުރުމަށް ނިންމާފައިވާ މި ދަތުރާއި ގުޅޭ މައުލޫމާތު އޭނާ ވަނީ އިއްޔެ ރައްޔިތުންގެ މަޖިލީހުގެ ރައީސް މުހައްމަދު ނަޝީދާ ވެސް ހިއްސާކޮށް އެވެ.
އެ ބައްދަލުވުމަށް ފަހު ސާޖިން ދިން އިންޓަވިއުއެއްގައި ބުނީ ރާއްޖޭގެ ހުރިހާ ރަށަކަށް ދިޔުމަކީ ވަރަށް ބޮޑު ހުވަފަނެއް ކަމަށާއި މި ދަތުރުގެ ތެރެއިން ރާއްޖޭގެ އެކި ރަށްތަކަށް މީހުން ދާން ޖެހޭ ސަބަބުތަކާއި، ރާއްޖޭގެ އުތުރާއި ދެކުނު އަދި މެދުރާއްޖެތެރޭގެ މަސްވެރިކަން ކުރާ ގޮތް ދައްކާލާނެ ކަމަށެވެ.
މި ދަތުރުގެ ތެރެއިން ހަމައެކަނި ގެންނަން ބޭނުންވަނީ މަސްވެރިކަން ނޫން ކަމަށާއި އެގޮތުން ބޭނުން ވަނީ ރާއްޖޭގެ ގުދުރަތީ ރީތިކަމާއި، ދެމެހެއްޓެނިވި މަސްވެރިކަން ދުނިޔޭގެ މީހުންގެ ސަމާލުކަމަށް ގެންނަން ކަމަށްވެސް ސާޖިން ބުންޏެވެ.
ސާޖިން ވަނީ މި ދަތުރަށް އެއްބާރުލުން ދެއްވާނެ ކަމަށް ނަޝީދު ވިދާޅުވެފައިވާ ކަމަށާއި މި ދަތުރު ވެގެންދާނީ ރާއްޖޭގެ ތާރީހުގައި ލިޔެލާވަރުގެ ދަތުރަކަށް ކަމަށް ވެސް ބުނެފަ އެވެ.
މި ދަތުރުކުރަން ފަށާނެ ދުވަހެއް ސާޖިން އަދި ހާމަކޮށްފައެއް ނުވެ އެވެ. މި ދަތުރަށް 18 މަހަށް ވުރެ ގިނަ މުއްދަތެއް ނަގާނެ ކަމަށް އޭނާ ލަފާކުރެ އެވެ.
ގއ. ގެމަނަފުއްޓަށް އުފަން ސާޖިން އަކީ މަސްވެރިކަމާ ގުޅޭ ތަފާތު އެކި ކަންކަން އާއްމުންނާ ހަމައަށް ގެނެސްދިނުމުގައި އިސް ދައުރެއް އަދާކުރާ ނަމޫނާ މަސްވެރިއެކެވެ.