ސަލްމާން ހާންގެ އެންމެ ފަހުގެ ފިލްމް "ޖެއި ހޯ" އަށް އަމާޒުވި ބޮޑެތި ފާޑުކިއުންތަކާ އެކު ވެސް އަހަރުގެ ފުރަތަމަ 100 ކްރޯޑް ކުލަބަށް އެ ފިލްމް ވެއްޖެ އެވެ.
ސަލްމާނާއި ޑެއިޒީ ޝާހް ލީޑް ރޯލް ކުޅުނު "ޖެހި ހޯ" ރިލީޒް ކުރީ ޖެނުއަރީ މަހުގެ 24 ގަ އެވެ.
އެހެން ނަމަވެސް ކްރިޓިކުން ބުނެފައި ވަނީ މިއީ، މީގެ ކުރިން ހިޓަކަށް ފަހު ހިޓެއް ގެނެސް ދިން ސަލްމާންގެ ކެރިއަރަށް ލޮޅުން ގެނައި ފިލްމެއް ކަމަށެވެ.
ފިލްމް ރިލީޒް ކުރުމުގެ ކުރިން ބޮކްސް އޮފީހުގެ ގިނަ ރެކޯޑްތަކެއް މުގުރައިލާނެ ކަމަށް ބެލެވުނަސް ހީކުރި ވަރާ ގާތަށް ވެސް "ޖެއި ހޯ" ހިނގައިފައެއް ނުވެ އެވެ.
ކުރިން ލަފާ ކުރެވުނު ގޮތުން 2013 ގެ އެންމެ ކާމިޔާބް ފިލްމް އާމިރް ހާނާއި ކެޓްރީނާ ކެއިފްގެ "ދޫމް 3" ގެ ރެކޯޑްތައް "ޖެއި ހޯ" އިން މުގުރައިލާނެ އެވެ.
އެ ފިލްމް ވަނީ ބޮކްސް އޮފީހުގައި ޖުމްލަ 500 ކްރޯޑް ރުޕީސްގެ ވިޔަފާރި ކުޑަ ދުވަސްކޮޅެއްގެ ތެރޭގައި ކޮށްފަ އެވެ.
ކްރިޓިކުންގެ ފާޑު ކިއުންތައް ފިލްމަށް އަމާޒުވި އިރު، މި ފިލްމް ބެލުންތެރިންނަށް އެހާ ކަމުދާ ފިލްމަކަށް ނުވި އެވެ.
ބައެއް ފަރާތްތަކުން ބުނަނީ ހީކުރި ވަރާ ގާތަށް ފިލްމު ނުހިނގި ސަބަބުތަކުގެ ތެރޭގައި ފިލްމުގެ މިއުޒިކުގައި އެހާ ހިތްގައިމު ކަމެއް ނެތިފައި، އެއް ވަައްތަރެއްގެ ފިލްމްތަކެއް ސަލްމާނުގެ ފަރާތުން ފެނުމާއި މުސްލިމުންގެ ރުޅިވެރިކަން ވަރަށް ބޮަޑަށް އަމާޒުވެފައިވާ އިންޑިއާގެ ސިޔާސީ ލީޑަރު ނަރެންދުރަ މޯޑީ އާ ސަލްމާނާ އޮތް ގުޅުމުގެ ސަބަބުން، މުސްލިމުން "ޖެއި ހޯ" އާ ފެއަށް ޖެހުމެވެ.
މިފަދަ އެތައް ސަބަބުތަކާ ހެދި "ޖެއި ހޯ" އަށް ބޮޑު ކާމިޔާބީއެއްް ބޮކްސް އޮފީހުގައި ނުލިނުބު ނަަމަވެސް، މި ފިލްމަށް 100 ކްރޯޑުން ޖާގަ ލިބުމަކީ ފިލްމްގައި ޝާމިލްވާ ހުރިހާ ފަރާތްތަކަށް ވެސް ހިތްހަމަޖެހުމުގެ ނޭވާއެއް ލެވުނު ކަމެކެވެ.
ޖުމްލަ 5،000 ތިއޭޓަރުގައި ދައްކައިގެން މި ފިލްމަށް މިހާތަނަށް އިންޑިއާ އާއި އިންޑިއާ އިން ބޭރުގައި ދައްކައިގެން ލިބުނީ ޖުމްލަ 133.33 ކްރޯޑް ރުޕީސް އެވެ.
އެއީ ސަލްމާންގެ "އެކް ތަ ޓައިގާ" އާއި "ދަބަންގް 2" އަދި "ބޮޑީގާޑް" އާއި "ރެޑީ" އަޅާ ކިޔާ އިރު، އެއްވެސް އެއްޗެއް ނޫނެވެ.
"ޖެއި ހޯ" އަކީ ސަލްމާންގެ ކޮއްކޮ ސޮހައިލް ހާން ޑައިރެކްޓް ކުރި ފިލްމެކެވެ. މިއީ ތެލެގޫ ފިލްމް "ސްޓާލިން" އަސްލަކަށް ބަލައިގެން ހެދި ފިލްމެކެވެ.