ކޮވިޑް-19 އަކީ އާންމު ރޯގާއެއްގެ ގޮތުގައި ކަނޑައެޅެން އަދި ނެތް ކަމަށް ޑިރެކްޓަރ ޖެނެރަލް އޮފް ޕަބްލިކް ހެލްތު މައިމޫނާ އަބޫބަކުރު ވިދާޅުވެއްޖެ އެވެ.
ކޮވިޑާއި ގުޅިގެން ރާއްޖޭގައި އިއުލާންކޮށްފައި އޮތް އާއްމު ސިއްހަތުގެ ކުއްލި ނުރައްކަލުގެ ހާލަތު ދެ އަހަރު ދުވަހަށްފަހު އިއްޔެ ވަނީ އުވާލާފަ އެވެ. އެއާއެކު ކޮވިޑާއި ގުޅިގެން ރާއްޖޭގައި އަޅާފައިވާ ގިނަ ފިޔަވަޅުތަކެއް ވެސް މިހާރު ވަނީ ނިމުމަކަށް ގެނެސްފަ އެވެ.
ރޭ ބޭއްވި ނޫސްވެރިންގެ ބައްދަލުވުމެއްގައި މައިމޫނާ ވިދާޅުވީ ދުނިޔޭގައި އަދިވެސް ކޮވިޑް ބަލަމުން އަންނަނީ ބަލިމަޑުކަމެއްގެ ގޮތުގައި ކަމަށާއި އެގޮތުން ކޮވިޑަކީ އާންމު ރޯގާއެއްގެ ގޮތުގައި ކަނޑައަޅައި ކުރިއަށް ދެވެން އަދި ނެތް ކަމަށެވެ.
"އާންމު ރޯގާއެއްގެ ގޮތުގައި ކަނޑައެޅޭ ހިސާބުން އަޅުގަނޑުމެން ކުރާ މަސައްކަތްތައް ވެސް ބަދަލުވެގެންދާނެ. މިވަގުތު އަދި އިތުރަށް ބަލަމުން، އެކަމަށް އެލާޓުވެ ތިބެގެން ކުރިއަށްދާނީ." މައިމޫނާ ވިދާޅުވި އެވެ.
މައިމޫނާ ވިދާޅުވީ މި ބައްޔަކީ ބަލިމަޑުކަމެއްގެ ގޮތުގައި އޮތްހާ ހިނދަކު މިއީ އާންމު ރޯގާއެއްގެ ގޮތުގައި ބަލައިނުގަންނާނެ ކަމަށެވެ. އަދި ބަލި އިތުރަށް ގޯސްވެދާނެ ކަމަށް ބަލައި ތައްޔާރުވެގެން ތިބެންޖެހޭ ކަމަށްވެސް މައިމޫނާ ވިދާޅުވި އެވެ.
ކޮވިޑާއި ގުޅިގެން އެޗްޕީއޭ އިން އަޅާފައިވާ ފިޔަވަޅުތަކުގެ ތެރެއިން އާއްމު ތަންތަނުގައި މާސްކު އެޅުން މަޖުބޫރުކޮށްފައި އޮތް އޮތުން މިހާރު ވަނީ ނިމުމަކަށް ގެނެސްފަ އެވެ. އަދި ކޮވިޑް-19ގެ ވެކްސިން ފުރިހަމަކޮށްފައި ނުވާ މީހުން ވެސް ރާއްޖެ އަންނައިރު ޕީސީއާރު ޓެސްޓް ހަދަން ނުޖެހޭ ގޮތަށް ވެސް މިހާރު ވަނީ ހަދާފަ އެވެ.