އައްޑޫ މީދޫގެ ތައުލީމަށް ވަރަށް ގިނަ ދުވަހު އަގުހުރި ހިދުމަތްތަކެއްކުރެއްވި މުހައްމަދު މަޖީދު (މަޖީދު ސާ) ގެ ޖަނާޒާ މިއަދު އަސްރު ނަމާދަށް ފަހު ބާއްވާ ގޮތަށް ނިންމައިފި އެވެ.
އޭނާ އުމުރުން 81 އަހަރުގައި އަވަހާރަވީ މިއަދުގެ ވަރަށް ހެނދުނުގެ ވަގުތެއްގަ އެވެ. އަވަހާރަވީ ބަލިވެއުޅުއްވާތާ ވެސް ދުވަސްތަކެއް ފަހުންނެވެ. "މަޖީދު ސާ" ގެ ކަށުނަމާދު އޮންނާނީ މީދޫ މާކިސްތުގަ އެވެ.
މީދޫގެ ވަރަށް ގިނަ ބަޔަކަށް އުނގަންނައި ދެއްވައި ތައުލީމީ އެތައް ޖީލެއްގެ ބިނާކުރެއްވުމުގައި ވަރަށް އިސް ދައުރެއް އަދާކުރެއްވި "މަޖީދު ސާ" އަކީ އަކީ މިހާރު ޝަމްސުއްދީން ސްކޫލްގެ ނަމުގައި ހިންގަމުން އަންނަ ކުރީގެ މީދޫ ސްކޫލް އުފެދިގެން އައި ދުވަސްވަރުން ފެށިގެން އެތަނުގައި ވަރަށް ގިނަ ދުވަހު މަސައްކަތްކުރެއްވި ބޭފުޅެކެވެ.
އެގޮތުން މުދައްރިސްކަމާއި ހެޑް މާސްޓަރުގެ މަގާމު ވެސް އަދާކުރައްވާފައިވެ އެވެ. "މަޖީދު ސާ" އަކީ މީދޫގެ ވަރަށް ގިނަ ބައެއްގެ ލޯތްބާއި އިހުތިރާމާއި ގަދަރު ހޯއްދެވި ބޭފުޅެކެވެ.