ލޯބީގެ ގޮތުން އިތުރު މީހަކާ ގުޅެން އަދި މާ އަވަސް ކަމަށް ފިލްމީ ތަރި ޔޫސުފް ޝަފީއު (ޔޫއްޕެ) އާ އެކު ކޮށްފައިވާ ކައިވެނި ރޫޅިފައިވާ ބަތަލާ ފާތުމަތު ފަރީލާ (ފަރީ) ބުނެފި އެވެ.
ޓީވީއެމްގެ "ތަރިންނާ އެކު" ޕްރޮގްރާމްގައި، ބެލުންތެރިން ކުރި ސުވާލުތަކަށް ޖަވާބު ދެމުން ވިދަމުން އަންނަ ބަތަލާ ބުނީ "އިތުރު ރިލޭޝިޕަކާ ދޭތެރޭ މި ވަގުތު އަދި ނުވިސްނާ ކަމަށާއި އެފަދަ ކަމަކަށް ވިސްނަން އަދި މާ އަވަސް" ކަމަށެވެ.
އެހެން ނަމަވެސް އޭނާގެ ހަޔާތަށް އާ ބައިވެރިއެކު ގެނައުމާ ދޭތެރޭ ވިސްނާނެ ކަމަށް، ޔޫއްޕެ އާ ވަރިވި އިރު، ހަ އަހަރުގެ ދަރިއެއް ވެސް މިހާރު ހުރި ފަރީ ބުންޏެވެ. މި ދެ ތަރިން 2005 ގައި ކުރި ކައިވެނި ރޫޅުނީ 2012 ގަ އެވެ. މިއީ ދަރިއަކު ލިބިފައި ހުއްޓައި ރޫޅުނު ޔޫއްޕެގެ ދެ ވަނަ ކައިވެންޏެވެ.
"ތަރިންނާ އެކު" ޕްރޮގްރާމްގައި ފޯނުން ސުވާލް ކުރި ބައެއް މީހުން ޒާތީ ސުވާލް ކުރި ނަމަވެސް، އެފަދަ ގިނަ ސުވާލުތަކަށް ފަރީ ޖަވާބެއް ނުދެ އެވެ. އޭނާ ބުނީ ޓީވީ ޕްރޮގްރާމެއްގައި އެފަދަ ވާހަކަތަކެއް ދައްކަން ބޭނުން ނުވާ ކަމަށެވެ.
ޔޫއްޕެ އާއި ފަރީ ވަކިވި އިރު، ދެ މީހުން ވަނީ އެކުގައި ކާމިޔާބް ފިލްމްތަކެއް ވެސް ކުޅެފަ އެވެ.
އޭގެ ތެރެއިން ބެލުންތެރިންނާ ހަމައަށް އެންމެ ފަހުން އައި ފިލްމަކީ މިދިޔަ އަހަރު ރިލީޒް ކުރި، ފުރަތަމަ 3ޑީ ފިލްމް "ފަތިސްހަނދުވަރުގެ ފެށުން" އެވެ.
އޭގެ ކުރިން ޔޫއްޕެ އާއި ފަރީ ވަނީ "ވާ ލޯބި އެނގޭ ނަމަ" އާއި "ހެޔޮ ނުވާނެ" އަދި "ލޯތްބަށްޓަކައި" އެކުގައި ކުޅެފަ އެވެ.
އަދި ކުރިއަށް ރިލީޒްވާން ހުރި ފިލްމުތަކުގެ ތެރޭގައި ވެސް އެ ދެ ތަރިން އެކުގައި ކުޅެފައިވާ ފިލްމްތައް ހިމެނެ އެވެ. އޭގެ ތެރެއިން އެންމެ ފާހަގަކޮށްލެވޭ ފިލްމަކީ ސްރީ ލަންކާގައި ޝޫޓްކޮށްގައިވާ "އިންތިހާ" އެވެ. މިއީ ޔޫއްޕެގެ ޑައިރެކްޝަނެކެވެ.
ގިނަ އަދަދެއްގެ ވީޑިއޯ ލަވަތައް ވެސް ކުޅެފައިވާ ފަރީ ބުނީ މި ދުވަސްކޮޅު ސިޔާސީ ކަންތައްތަކާ ހެދި ރާއްޖޭގެ ފިލްމީ ދާއިރާ ހުއްޓުމަކަށް އައިސްފައިވާ ކަމަށެވެ.
އެހެންވެ ފިލްމްތައް ރިލީޒް ނުކުރާތީ އާ ފިލްމްތަކަކަށް ސޮއި ނުކުރާ ކަމަށް ވެސް އެންމެ ފުރަތަމަ "ރަނި" ގްރޫޕުން ވިދާލި ނެށުންތެރިޔާ ބުންޏެވެ.
ފާތުމަތު ނަހުލާގެ "އަދިވެސް ތި ލޯތްބަށް ގަދަރު ކުރަން" ޑްރާމާގައި ވެސް މުހިއްމު ރޯލެއް އަދާ ކުރި ފަރީ ބުނީ އޭނާގެ ރިލީޒްވާން ޖެހޭ ހަތް ވަރަަކަށް މި ފިލްމް މިހާރު ވެސް ޕްރޮޑިއުސަރުންގެ ވައްގަނޑުގައި އެބަ އޮތް ކަމަށެވެ.
އެހެން ނަމަވެސް މި އަހަރު އެންމެ ފުރަތަމަ ރިލީޒް ވާނީ ވެސް ފަރީ މުހިއްމު ރޯލެއް ކުޅެފައިވާ ފިލްމެއްކަން ފާހަގަކޮށްލެވެ އެވެ
އެއީ އަހުމަދު ނިމާލް ޑައިރެކްޓްކޮށް، އޭނާގެ ދަރިފުޅު ޖުމައްޔިލް ނިމާލް ލޯންޗް ކުރާ ފިލްމް "އަނިޔާ" އެވެ.
ދާދި ފަހުން ފަރީ ވަނީ ހަތަރު ޑައިރެކްޓަރެއްގެ، ހަތަރު ސެގްމަންޓް ހިމެނޭ ގޮތަށް ތައްޔާރު ކުރާ "ހަތަރު ހަޅަ" އިގެ މަސައްކަތް ވެސް ނިންމައިފަ އެވެ.
އެ ފިލްމުގައި ފަރީ ފެނިގެން ދާނީ އަލީ ޝިފާއު ޑައިރެކްޓްކޮށްފައިވާ "ފޮށި" ސެގްމަންޓުންނެވެ.