ރައްޔިތުންގެ މަޖިލީހުގެ ފޭދޫ ދާއިރާގެ ގޮނޑި އަށް މިފަހަރު ވާދަކުރާ ކެންޑިޑޭޓުންގެ ތެރެއިން އެންމެ މަގްބޫލް ކެންޑިޑޭޓަކަށް އަހުމަދު މަރުޒޫގު (މަރާ) ވީ ސަބަބުތަކެއް ނެތިއެއް ނޫނެވެ. އޭނާ އަށް ޒުވާނުންނާއި ޕީޕީއެމްގެ ގިނަ މެމްބަރުންގެ އިތުރުން ފޭދޫ ރައްޔިތުން ތާއިދު ކުރަނީ ގިނަ ސަބަބު ތަކެއް ހުރެގެންނެވެ.
ފޭދޫ ސްކޫލުން ޕްރައިމަރީ ތައުލީމް ނިންމި އިރު މަރާއަކީ ސްކޫލްގެ ކެޕްޓަން އެވެ. ޕްރައިމަރީ ދައުރުގައި ވެސް މަރާ ފެނިގެން ގޮސްފައި ވަނީ އުއްމީދީ ދަރިއެއްގެ ގޮތުގަ އެވެ.
ފޭދޫ ސްކޫލުން ޕްރައިމަރީ ތައުލީމު ނިންމާ ސެކަންޑްރީ ތައުލީމު ފުރިހަމަ ކުރުމަށް ހިތަދޫގައި ހުންނަ ސަދަން ސެކަންޑަރީ ސްކޫލް (މިހާރުގެ ޝަރަފުއްދީން ސްކޫލް) ބަދަލުވުމަށް ފަހު ވެސް ފެނިގެން ދިޔައީ ސްކޫލްގެ ތަފާތު ހަރަކާތްތަކުގައި އިސްވެ ހަރަކާތްތެރިވަމުން ދިޔަ ތަނެވެ.
ކިޔެވުމާއި ސްކޫލްގެ ހަރަކާތުގައި މަރުޒޫގު އަބަދުވެސް ފެނިފައި ވަނީ އެންމެ ކުރީ ސަފުގައި ހުންނަ ތަނެވެ. ސެކަންޑްރީ ސްކޫލް ނިންމި އިރު މަރާ އަކީ ސްކޫލްގެ ޑެޕިއުޓީ ކެޕްޓަނެވެ. ސްކޫލްގެ އިނގިރޭސި ޖަމިއްޔާގެ ރައީސަކީ ވެސް މަރުޒޫގެވެ.
އެއީ ސްކޫލް ދައުރެވެ. ދެން އޮތީ މަސައްކަތުގެ މައިދާނުގެ ވާހަކަ އެވެ. ސަދަން ސެކަންޑަރީ ސްކޫލުން ސާނަވީ ތައުލީމު ފުރުހަމަ ކުރުމަށް ފަހު ފަތުރުވެރި ކަމުގެ ދާއިރާ އަށް ވަނެވެ. ފަތުރުވެރިކަމުގެ ދާއިރާގައި މަސައްކަތް ކުރާތާ އަހަރުތަކެއްް ފަހުން މިއަދު މަރްޒޫގަކީ އަމިއްލަ ޓްރެވަލް އެޖެންސީއެއް ހިންގަމުން އަންނަ ޒުވާން ވިޔަފާރިވެރިއެކެވެ.
ފަތުރުވެރިކަމުގެ ދާއިރާގެ އެކި އެކި ބައްދަލުވުންތަކުގައި ބައިވެރިވެ ރާއްޖެ ތަމްސީލުކުރިއެވެ. މިދާއިރާގައި ހަރަކާތްތެރިވަމުން ފަތުރުވެރިކަމުގެ ދާއިރާ އިން އިތުރަށް މަރުޒޫގް ވަނީ ކިޔަވައިފަ އެވެ.
ޓްރެވަލް އެޖެންސީގެ ވިޔަފާރި އަމިއްލަ ރަށައް ބަދަލުކޮށް ރަށުގައި ހުރެގެން އަންނަނީ އާމްދަނީ ހޯދަމުންނެވެ. އަދި މި ވިޔަފާރި މިއަދު އަންނަނީ ބޮޑެތި ކުރިއެރުން ހޯދަމުންނެވެ.
މަރުޒޫގު ސިޔާސީ ދާއިރާގައި ހަރަކާތްތެރި ވާން ފެށި ރާއް ޖެއަށް ޑިމޮކްރަސީ ތައާރަފް ކުރުމަށް 2004 ވަނަ އަހަރު ތެރޭގައި އެންމެ ފުރަތަމަ މިނިވަން ބަހުސް ހިސާބުންނެވެ. އޭރުއްސުރެން ފެށިގެން ސިޔާސީ ދާއިރާގައި ހަަރަކާތެރިވަމުން އައިސް މިހާރު މަޒްރޫގަކީ ވެރިކަން ކުރާ ޕާޓީ ޕީޕީއެމްގެ މެމްބަރެކެވެ.
މަރުޒޫގު ގަބޫލް ކުރާ ގޮތުގައި ރާއްޖެއަށް ކުރިއެރުން ހޯދެން އޮތީ ޕީޕީއެމްއަށެވެ. އެހެންވެ ޕީޕީއެމްގެ ފަރާތުން މަޖްލިސްއަށް ވާދަކުރަން ނިންމީ ސަރުކާރުން ރައްޔިތުންނަށް ފޯރުކޮށް ދިނުމަށް ނިންމާފައިވާ ކަންކަން މަޖްލިސް ތެރެއިން ފަހިކޮށް ރައްޔިތުންގެ ކަންކަން އަވަސްކޮށް ދިނުމަށް ސަރުކާރާއި ރައްޔިތުންނަށް ވާގިވެރިވުމަށެވެ.
އަދި ފޭދޫގެ "އުއްމީދު" ގެއްލިފައިވާ އެތައް ރައްޔިތުންނަށް އެމީހުން އެދެމުން އަންނަ ތަރައްޤީ ހޯދައި ދިނުމަށެވެ. ނުލިބިވާ އަސާސީ ހިދްމަތާއި، ރަށުގައި ބިކާރީވެފައި ތިބި އެތައް ޒުވާނުންނަށް ވަޒީފާގެ ފުރުސަތު ހޯދައި ދިނުމަށެވެ.
ފޭދޫގައި ދުޅަހެޔޮ ރަނގަޅު އިގްތިސާދެއް ގާއިމް ކުރުމަށެވެ. ތައުލީމީ ރަނގަޅު ޖީލެއްް ބިނާކޮށް، ހަރުދަނާ ސިއްހީ ނިޒާމަކާއި އެކު ފޭދޫ އަށް ފުރިހަމަކަން ގެނެސް ދިނުމަށެވެ.
އިހްލާސްތެރިކަމާއި އެކު މަސައްކަތްކޮށް ހިދްމަތްތެރި އެތައް ޒުވާނުންނެއް ބިނާ ކުރުމަށެވެ.
އެހެންވެ ފޭދޫގެ ރައްޔިތުން މިއަދު މިވަނީ މަރުޒޫގުގެ އަމަލްތަކާއި، އޭނާގެ އުސޫލްތައް ފުރިހަމައަށް ބަލައިގެންފަ އެވެ. ކުރިއަށް ވާދަވެރި މަޖްލިސް އިންތިހާބް ޕީޕީއެމަށް ކާމިޔާބް ކުރެވެން އޮތީ މަރްޒޫގް ޕާޓީ ޕްރައިމަރީން މޮޅުކޮށް ދީގެން ކަމަށް އާއްމު މެމްބަރުން މިވަނީ ފުރިހަމައަށް ގަބޫލްކޮށް ފައެވެ.
ޒުވާން ތައުލީމީ ގާބިލް މީހަކަށް ޕީޕީއެމް ޓިކެޓް ދިނުމަށް ޕީޕީއެމް މެމްބަރުން މި ވަނީ ފިސާރި ރަނގަޅަށް ނިންމައިފަ އެވެ. ބައެއް މެމްބަރުން ބުނާ ގޮތުން ޕާޓީގެ ޕްރައިމަރީގައި މަރާ އާއި ވާދަކުރާ އަނެއް ތިން ކެންޑިޑޭޓުންނަކީ ވެސް ޕާޓީގެ މުހިއްމު ތިން ތަނބެވެ. އެއިން ފަރާތެއް ބާކީކޮށްލައިގެން ޕީޕީއެމަށް މަޖިލިސް ގޮޑި ލިބެން ނެތެވެ.
ޕީޕީއެމްގެ އާއްމު މެމްބަރުންނާއި ފޭދޫގެ ގިނަ ބަޔަކު ވެސް މިއަދު ގަބޫލް ކުރަނީ ފޭދޫގެ "އުއްމީދު"އަކީ ޒުވާން މަރުޒޫގު ކަމެވެ. އެހެންވެ އޭނާގެ ތާއިދު މިއަދު ފޭދޫގައި ވަރަށް ބޮޑެވެ. ކުޑަ ލީޑަރު މިއަދު މިވަނީ މާސިންގާ ބޮޑު ސިޔާސީ ކަނޑަކަށް ފޭދޫއާއިގެން ނިކުންނަން ތައްޔާރުގަ އެވެ.