ބޮލީވުޑްގެ ބަތަލާ އަނުޝްކާ ޝަރްމާ އާއި ކްރިކެޓް ކުޅުންތެރިޔާ ވިރާތު ކޯލީގެ ލޯބީގެ ކުޅިގަނޑުގެ ވާހަކަތައް ދެކެވޭތާ ދުވަސްތަކެއްވެއްޖެ އެވެ.
މި ވާހަކަތަކަށް އިތުރުވި އަނެއް ބޮޅަކީ އެ މީހުން ނިއުޒިލެންޑްގައި އެކުގައި ވަގުތުތައް ހޭދަ ކުރަމުންދާ ވާހަކަ އެވެ. ހަމައެކަނި އެ ވާހަކަތައް ތޯތޯކޮށް ދެކެވެނީ ނޫނެވެ.
ދެ މީހުން އަތު ގުޅުވާލައިގެން ވަރަށް ލޯބިން، އޯކްލަންޑްގެ މަގެއްގެ މަތިން ހިނގާފައި ދަނިކޮށް ނަގާފައިވާ ފޮޓޯއެއް ވެސް މިހާރު މި ވަނީ ސޯޝަލް މީޑިއާގައި އާންމުވެފަ އެވެ. އެ ފޮޓޯ އިންޑިއާގެ މީޑިއާތަކުގައި ވެސް "ހޫނު ކޭކެއްހެން" އަންނަނީ ދައުރުވަމުންނެވެ.
އިންޑިއާގެ ކްރިކެޓް ޓީމާ އެކު ވިރާތު ނިއުޒިލެންޑަށް ދިޔައީ ޓެސްޓް މެޗްތަކެއް ކުޅޭށެވެ.
އަނުޝްކާ އާއި ވިރާތާ ދެމެދު ހާއްސަ ގުޅުމެއް އުފެދި، އެ ވާހަކަތައް އެންމެ ބޮޑަށް ތިލަވާން ފެށީ ދެ މީހުން އެކުގައި ކުޅުނު ޝޭމްޕޫ އިޝްތިހާރަކަށް ފަހު އެވެ.
އެ އިޝްތިހާރު ޝޫޓް ކުރުމުގެ ތެރޭގައި ދެ މީހުންގެ ދެމެދުގައި ވަރަށް ހާއްސަ ގުޅުމެއް އުފެދި، ރައްޓެހި ކަމަށް ވުރެ ގާތް ގުޅުމެއް، ޒުވާން ދެ ހުނަރުވެރިންގެ މެދުގައި އުފެދިފައިވާ ކަމަށް މީޑިއާތަކުން ބުނެ އެވެ.
އަދި ގައުމުން ބޭރަށް ވިރާތު މެޗްތައް ކުޅެން ފުރުމުގެ ކުރިން އަބަދު ވެސް ސިއްރުސިއްރުން އަނުޝްކާގެ ގެއަށް ޒިޔާރަތްކޮށް، ދެ މީހުން އެކުގައި ގިނަ ވަގުތުތަކެއް ވެސް ހޭދަ ކުރާ ކަމަށްވެ އެވެ.
ބޮލީވުޑްގެ ބަތަލާއިންނާއި އިންޑިއާގެ މަޝްހޫރު ކްރިކެޓް ކުޅުންތެރިންގެ ލޯބީގެ ވާހަކަތަކަކީ އާ ވާހަކަތަކެއް ނޫނެވެ. މީގެ ކުރިން ވެސް މިފަދަ ޖޯޑްތަކެއް ފެނިގެން ގޮސްފައިވެ އެވެ.
އިންޑިއާގެ މިހާރުގެ އެންމެ އުންމީދީ ކްރިކެޓް ކުޅުންތެރިންގެ ތެރޭގައި ހިމެނޭ ވިރާތާއި އަނުޝްކާ ގުޅުމާ ބެހޭ ގޮތުން ދާދި ފަހުން ކަރަން ޖޯހަރު ވަނީ އޭނާގެ ޗެޓް ޝޯ "ކޮފީ ވިތު ކަރަން" ގައި ވެސް އަނުޝްކާ އަށް ކުރިމަތިކޮށްފަ އެވެ.
އެ ސުވާލަށް ސީދާ ޖަވާބެއް ނުދީ، ވަރަށް ލަދުން އިނދެ "ބޭންޑް ބާޖާ ބާރާތުގެ" ކޯ އެކްޓަރު ރަންވީރު ސިންގާ ރައްޓެހިވެގެން ވެސް އުޅުނު އަނުޝްކާ ބުނީ "މި ވަގުތު އިހުސާސް ކުރެވެނީ އަހަރެން ބަރަހަނާވެފައި ހުރިހެން" ކަމަށެވެ.