ކުރިން މިއަދު ބާއްވަން ހަމަޖެއްސި ޕީޕީއެމްގެ ރައްޔިތުންގެ މަޖިލިސް ޕްރައިމެރީގައި ސ. ފޭދޫ ދާއިރާ އަށް ވާދަ ކުރާ އަހުމަދު މަރުޒޫގް (މަރާ) އަށް ޕްރައިމެރީގައި ވާދަ ނުކުރެވޭނެ ކަމަށް ބުރާސްފަތި ދުވަހު ނިންމުމަށް ފަހު، ގިނަ ބައެއްގެ ފާޑު ކިއުންތައް އަމާޒުވާން ފެށުމުން އޭނާ އަށް ޕްރައިމެރީގައި ވާދަ ކުރެވޭ ގޮތަށް ހަދައިފި އެވެ.
މަރާ އަށް ވާދަ ނުކުރެވޭނެ ކަމަށް ނިންމީ އޭނާގެ ނަން އެމްޑީޕީގެ ދަފުތަރުގައި އޮންނާތީ، އޭނާއަކީ މިހާރު ވެސް އެމްޑީޕީގެ މެމްބަރެއް ކަމަށް ތުހުމަތުކޮށްފަ އެވެ.
ޕްރައިމެރީ އަށް މިހާތަނަށް އެންމެ ވަރުގަދަ ކެމްޕޭން ކުރި މަރާ އަށް ވާދަ ނުކުރެވޭ ކަމަށް ޕީޕީއެމުން ނިންމުމުން އެކަމާ ދެކޮޅަށް، އޭނާފގެ ސަޕޯޓަރުން ވަނީ ބުރާސްފަތި ދުވަހުގެ ރެއާއި އިއްޔެ ހަވީރު ވެސް ފޭދޫގައި ވެހިކަލްބުރުތަކެއް ބާއްވައިފަ އެވެ.
އެހެން ނަމަވެސް އިއްޔެ ހަވީރު އިރު އޮއްސެން އުޅެނިކޮށް މަރާ އަށް ޕްރައިމެރީގައި ވާދަ ކުރެވޭނެ ކަމަށް ވަނީ އަންގައިފަ އެވެ.
މަރާ އާ ފޭދޫން ޕީޕީއެމް ޓިކެޓަށް ވާދަ ކުރަނީ އިބްރާހީމްދީދީ (އައިބީ) އާއި ހައްވާ ޒާހިރާގެ އިތުރުން މުހައްމަދު މޫމިން (މޫނާ) އެވެ.
ކުރިން މިއަދު ބާއްވަން ނިންމި ޕްރައިމެރީ މާދަމާ އަށް މިހާރު ވަނީ ފަސްކޮށްފަ އެވެ. އެގޮތަށް ނިންމީ މަރާ އަށް ކެމްޕޭނަށް އިތުރު ވަގުތު ދިނުމުގެ ގޮތުންނެވެ.