ވައްކަން ކުރުމަށްފަހު ފިލަން އުޅުނު މީހެއްގެ ފަހަތުން ދުވެ އޭނާ ހައްޔަރުކުރި ފުލުސް މީހާ އަށް ކޮމިޝަނާ އޮފް ޕޮލިސް މުހައްމަދު ތައުރީފުކޮށްފި އެވެ.
އެކަމުގައި ހަރަކާތްތެރިވި ފުލުހަކީ ސާޖެންޓް މުއްސަދު އަސްލަމް އެވެ. އޭނާ އަކީ މާފަންނު ޕޮލިސްގައި މަސައްކަތް ކުރަމުންދާ އޮފިސަރެކެވެ.
ސާޖެންޓް މުއްސަދާއެކު ބޭއްވި ބައްދަލުވުމަށްފަހު ކުރެއްވި ޓްވީޓެއްގައި ސީޕީ ވިދާޅުވީ އޭނާ ކުރި މަސައްކަތަށް ތައުރީފު ކުރެއްވި ކަމަށާއި އެ ފުލުސް އޮފިސަރާއި މެދު ފަހުރުވެރިވާ ކަމަށެވެ. އަދި ކުށްތަކުން މުޖުތަމައު ރައްކާތެރި ކުރުމަށް މުއްސަދު މަސައްކަތް ކުރި ގޮތަށް ފްރޮންޓްލައިން އޮފިސަރުން މަސައްކަތް ކުރުމުގެ މުހިއްމުކަން ސީޕީ ފާހަގަކުރެއްވި އެވެ.
Met Sergeant Mussadh Aslam, the response officer from Maafannu Police Station who did a foot pursuit to arrest a thieving suspect and recovered the stolen item. I commended him for his determination and display of exemplary police work. Immensely proud of this officer. pic.twitter.com/08MDRFumNZ
— Mohamed Hameed (@M_Hameedh) March 23, 2022
ސޯޝަލް މީޑިއާގައި އިއްޔެ އާންމުވި ވީޑިއޯ އިން ފެންނަ ގޮތުގައި ވައްކަން ކުރި ފިރިހެން މީހާގެ ފަހަތުން ފުލުސް އޮފިސަރު ބާރަށް ދުވެފައިވާތަން ފެނިގެންދެ އެވެ. އަދި ވައްކަން ކުރި މީހާ ގެއެއްގެ ތެރެއަށް ވަދެ މައްޗަށް އެރިއިރު ފުލުސް މީހާ ދިޔައީ އޭނާގެ ފަހަތުން ސިޑިމަތިން އަރަމުންނެވެ. ވަކި ހިސާބަކުން ދެ މީހުންވެސް ވަރުބަލިވިއިރު މައްޗަށް އަރަމުންދިޔައީ ސިޑީގެ ރެއިލިންގައި ހިފަހައްޓަމުންނެވެ.
ވަކި ހިސާބަކުން ވައްކަން ކުރި މީހާ ސިޑިމަތިން ފުލުސް މީހާއަށް އަތުވިއިރު، ފުލުސް މީހާ ވަނީ އޭނާގެ ގިރުވާނައިގައި ހިފައިގެން އެގޭގެ ތިރިއަށް ނެރެގެން ގޮސްފަ އެވެ. އެ ފުލުސް މީހާ ކުރި މަސައްކަތަށް އާންމުންގެ ތައުރީފު ވަނީ ލިބިގެން ގޮސްފަ އެވެ.