އެމްޑީޕީގެ ލީގަލް ޑިރެކްޓަރު މަގާމުގައި ހުންނެވި ރައްޔިތުންގެ މަޖިލީހުގެ ތުޅާދޫ ދާއިރާގެ މެމްބަރު ހިސާން ހުސެއިން ވެސް އެމްޑީޕީގެ ޗެއާޕާސަންގެ މަގާމަށް ވާދަކުރައްވާ ފައްޔާޒު އިސްމާއީލްއާއެކު ކެމްޕެއިނަށް ނިކުންނަވައިފި އެވެ.
ފައްޔާޒުއާއެކު ކެމްޕެއިން ޓީމުން ބ.އަތޮޅަށް ކުރާ ދަތުރުގައި މިއަދު ހަވީރު އެ އަތޮޅު ތުޅާދޫއަށް ވަޑައިގެންނެވުމުން އެ ޓީމަށް އެންމެ އިސްކޮށް މަރުހަބާ ކީ ހިސާން އެވެ. ތުޅާދޫން ގިނަ އަދަދެއްގެ އެމްޑީޕީގެ އާއްމު މެމްބަރުން ފައްޔާޒަށް މިއަދު މަރުހަބާ ކިޔަން ނިކުމެ ތިއްބެވެ.
B.thulhaadhoo invarah hoonu maruhabaaeh. #MDPhingaalan thulhaadhoo othee fakkaakonn.@faya_i 2️⃣✅@Roxeyna 2️⃣✅ pic.twitter.com/nZAIJGBt3O
— 𝓗𝓪𝓼𝓴𝓸 🇲🇻 (@abukyle20) March 23, 2022
ހިސާން ވަނީ އެމްޑީޕީގެ ރައީސް މުހައްމަދު ނަޝީދާއި ރައީސް އިބްރާހިމް މުހައްމަދު ސޯލިހް ވެރިކަމަށް ވަޑައިގެންނެވުމުގެ ކުރިން އެމަނިކުފާނުގެ ގާނޫނީ ވަކީލެއްގެ ގޮތުގައި މަސައްކަތް ކުރައްވާފަ އެވެ.
ޗެއާޕާސަން ކަމަށް ވާދަކުރައްވާ ފައްޔާޒުއަށް ތާއީދުކުރާ ގިނަ މީހުންނަކީ އެމްޑީޕީގެ ދެ ފެކްޝަނުގެ ތެރެއިން ރައީސް ސޯލިހްގެ ފެކްޝަނުގެ މީހުނެވެ. ދެން ވާދަކުރައްވާ، އިމްތިޔާޒް ފަހުމީގެ ފަހަތުގައި ތިބީ ރައީސް ނަޝީދުގެ ފެކްޝަނުގެ މީހުނެވެ. އިމްތިޔާޒަށް ތާއީދުކުރާ މީހުން ބުނާ ގޮތުން ފައްޔާޒު އެ މަގާމަށް އައިސްފި ނަމަ ނަޝީދު އެ ޕާޓީން ދުރުކުރާނެ އެވެ. ނަމަވެސް އެކަން ދޮގުކޮށް ފައްޔާޒުގެ ޓީމުން ބުނަމުން ދަނީ އެއީ ފިތުނަ އުފައްދަން ދައްކާ ދެކޮޅު ނުޖެހޭ ވާހަކަތަކެއް ކަމަށެވެ.
ކެމްޕެއިންގެ ފޯރި މިހާރުވެސް ވަރަށް ގަދަ ވެފައިވާއިރު ސުޕަ މެޖޯރިޓީ އޮތް އެމްޑީޕީގެ ޕާލަމެންޓްރީ ގުރޫޕްގެ ގިނަ މެމްބަރުން ތިބީ ފައްޔާޒުއާއެކު އެވެ. އަދި ރައީސް ސޯލިހް ފެކްޝަނުގެ ބޮޑު އަގުލަބިއްޔަތެއް އޮންނަ އެމްޑީޕީގެ ގައުމީ މަޖިލީހުގެ ގިނަ ބަޔަކުވެސް ތާއީދުކުރަނީ ފައްޔާޒުއަށެވެ.