ބޮލީވުޑްގެ ބަތަލާ މަލިކާ ޝެރާވަތު އިނގިރޭސިވިލާތުގެ މަޝްހޫރު ޔުނިވަސިޓީ އޮކްސްފޯޑްގައި ތަގުރީރެއް ދޭ ގޮތަށް ހަމަޖެހިއްޖެ އެވެ.
އޮކްސްފޯޑް ޔުނިއަން އިން މަލިކާ އަށް ލިބުނު ދައުވަތު އޭނާ ވަނީ ގަބޫލް ވެސްކޮށްފަ އެވެ.
އެތަނުގައި މަލިކާ ވާހަކަ ދައްކާނީ މި މަހުގެ 27 ގަ އެވެ. މި ދުވަސްކޮޅު އޮކްސްފޯޑް ޔުނިއަންގައި އަންނަނީ ހާއްސަ ބަހުސްތަކެއް ކުރެވެމުންނެވެ. މައުޟޫއަކީ "ދިސް ހައުސް ބިލީވްސް ޖެންޑަ އެގްޒިސްޓްސް ޓް އޮޕްރެސް" އެވެ.
"މާޑާ"، "ލަވް ސެކްސް އޯރް ދޯކާ" އަދި "ހިސް" ފަދަ ފިލްމުތަކުން ފެނިފައިވާ މަލިކާ ބުނީ އޮކްސްފޯޑުން އޭނާ އަށް ލިބުނު ފުރުސަތުގައި އަލި އަޅުވާނީ އިންޑިއާގެ އަންހެނުންނާއި އިންސާނީ ހައްގުތަކާ ބެހޭ ގޮތުން ކަމަށެވެ.
އަދި އިންޑިއާގައި އަންހެނުންނަށް ކުރިމަތިވަމުންދާ ރޭޕް ކުރުމުގެ މައްސަލަ އަށް ވެސް އޮކްސްފޯޑްގައި އަޑު އަފުލަން ލިބޭ ފުރުސަތުގައި އަލި އަޅުވާނެ ކަމަށް ހޮލީވުޑްގައި ވެސް މަސައްކަތްކޮށްފައިވާ ބަތަލާ ބުންޏެވެ.
މަލިކާ ބުނީ ފެބްރުއަރީ 27 އަށް މިހާރު ވަރަށް ބޮޑަށް ތައްޔާރުވަމުން އަންނަ ކަމަށެވެ.
"އަހަންނަކީ އިންޑިއާގެ ވަރަށް ކުޑަކުޑަ ޝަހަރަކުން އައިސް، މި ހިސާބަށް އާދެވިފައި ހުރި މީހެއް. އެހެންވެ އަހަރެން ކަހަލަ މީހަކަށް އޮކްސްފޯޑުން މި ލިބުނު ފުރުސަތަކީ ވަރަށް ބޮޑު ކަމެއް. މީގެ ބޭނުން އަހަރެން އެންމެ އެދެވޭ ގޮތުގައި ހިފާނަން،" މަލިކާ ބުންޏެވެ.
މަލިކާ އަށް މިފަދަ ފުރުސަތެއް ލިބުނު އިރު، ބައެއް ފަހަރު ބައިނަލްއަގްވާމީ މީޑިއާތަކުގައި އިންޑިއާ އާ ބެހޭ ގޮތުން އޭނާ ފާޅު ކުރާ ޝުއޫރުތަކަށް އިންޑިއާގެ ވަރަށް ގިނަ ބައެއްގެ ފާޑު ކިއުންތައް އަމާޒުވެ އެވެ.