އެކިއެކި ކަންކަން ދިމާވެގެން އައްޑޫގެ ދުވަސްވީ މީހުންނަށް ފުލުހުންނާ ފަސޭހަ އިން ގުޅޭ ގޮތްތަކެއް ހެދުމަށް މަސައްކަތް ކުރަމުން އަންނަ ކަމަށް ފުލުހުން ބުނެފި އެވެ.
ފުލުހުންގެ ދެކުނު ޑިވިޝަން ކޮމާންޑަރު އިންސްޕެކްޓަރު އޮފް ޕޮލިސް އަހުމަދު ޝިފާން މިއަދު ވިދާޅުވީ މިކަމަކީ އައްޑޫގައި މިހާރު ވެސް ކުރިއަށް ގެންދާ "ހައުސިން ވިޒިޓިން ޕްރޮގްރާމް" ގެ ދަށުން ކުރިއަށް ގެންދާ ކަމެއް ކަމަށެވެ.
އެގޮތުން ރަށްރަށުގައި ތިބި ދުވަސްވީ މީހުންނަށް ފުލުހުންގެ އެހީތެރިކަން ވީހާ ވެސް ފަސޭހައިން އަދި އަވަހަށް ލިބޭނެ އިންތިޒާމުތަމެއް ބޭނުންވާ ކަމަށް އޭނާ ވިދާޅުވި އެވެ. އެގޮތުން އެފަދަ ފަރާތްތަކުގެ ފޯނަށް ފުލުހުންނާ ފަސޭހައިން ގުޅޭނެ ގޮތްތަކެއް ހަމަޖެހިގެން ދާނެ ކަމަށް ޝިފާން ވިދާޅުވި އެވެ.
އޭނާ ވިދާޅުވީ ބޭނުމަކީ ފުލުހުންގެ ދައުރު ފުޅާކޮށް، އާންމުންގެ ސަލާމަތާއި ރައްކާތެރި ކަމަށް ކުރެވޭ މަސައްކަތްތައް އިތުރަށް ވަރުގަދަ ކުރުން ކަމަށެވެ.
އެގޮތުން ފުލުހުންގެ ދެކުނު ޑިވިޝަންގައި ހިމެނޭ އައްޑު އާއި ފުވައްމުލަކުގައި ފުލުހުން ނުވަންނާނެ އެއްވެސް ގެއެއް ޓަކި ނުޖަހާނެ އެއްވެސް ދޮރެއް ވެސް ނުހުންނާނެ ކަމަށް ޝިފާން ވިދާޅުވި އެވެ.
އަދި އެއީ ކޮންމެ ކުލައެއް، ކޮންމެ ކަހަލަ ސްޓިކާއެއް ޖަހާފައި ހުރި ގެެެއެއް ނަމަވެސް، އެ ގެއަކަށް ފުލުހުން ވަންނާނެ ކަމަށް އޭނާ ވިދާޅުވި އެވެ.
އައްޑޫގެ ތިން ރަށެއްގައި ޕޮލިސް ސްޓޭޝަންތަކެއް ހުރި އިރު، އެއިން ކޮންމެ ތަނަކާ ގުޅޭނެ ނަމްބަރުތަކެއް މީގެ ކުރިން ވެސް ފުލުހުން ވަނީ އާންމުކޮށްފަ އެވެ.
އެގޮތުން ހިތަދޫ ޕޮލިސް ސްޓޭޝަންގެ މޮބައިލް ނަމްބަރަކީ 9791612 އެވެ. ލޭންޑް ލައިން ނަމްބަރަކީ 6888825 އެވެ.
ގަން ޕޮލިސް ސްޓޭޝަންގެ މޮބައިލް ނަމްބަރަކީ 9792058 އެވެ. އަދި ލޭންޑް ލައިން ނަމްބަރަކީ 6898026 އެވެ.
މީގެ އިތުރުން ހުޅުމީދޫ ޕޮލިސް ސްޓޭޝަނާ ގުޅޭ ނަމްބަރަކީ 9791366 އެވެ.