އައްޑޫ އިކްއަޓޯރިއަލް ހޮސްޕިޓަލް (އޭއީއެޗް) އަށް މިއަދު ރައީސް އިބްރާހީމް މުހައްމަދު ސޯލިހު ޒިޔާރަތްކުރައްވައި އެތަނުގެ މުވައްޒަފުންނާއި މެނޭޖްމަންޓާ ބައްދަލުކުރައްވައިފި އެވެ.
ރައީސާއި އަނބިކނަބަލުން ފަޒުނާ އަހުމަދު ހޮސްޕިޓަލަށް ވަޑައިގަތުމުން މަރުހަބާ ވިދާޅުވީ އޭއީއެޗްގެ ސީއީއޯ ޑރ. މުހައްމަދު ސޯލިހު އެވެ.
ރައީސާ އެކު ހޮސްޕިޓަލުން ބޭއްވި ބައްދަލުވުމުގައި ރައީސް ވަނީ ހޮސްޕިޓަލްގެ މަސައްކަތްތަކާ ބެހޭ ގޮތުން މައުލޫމާތު އޮޅުން ފިލުއްވައިފަ އެވެ. އަދި ހޮސްޕިޓަލްގެ މެނޭޖްމަންޓުން ވަނީ އާ ޓާޝަރީ ހޮސްޕިޓަލް ބޭނުންކުރަން ފެށި ފަހުން އައި ކުރިއެރުންތަކާއި މިހާރު ދިމާވެފައި ދަތިތަކުގެ ވާހަކަތައް ވެސް ރައީސާ ހިއްސާކޮށްފަ އެވެ.
ކުރިން ހިތަދޫގައި ހިންގި ރީޖަނަލް ހޮސްޕިޓަލް (އެޗްއާރްއެޗް) އުވާލައި، އޭއީއެޗް ހުޅުވައި ހިދުމަތްދޭން ފެށީ ޖެނުއަރީ 15، 2020 އިން ފެށިގެންނެވެ. މި ހޮސްޕިޓަލަކީ މާލެ ސަރަހައްދުން ބޭރުގައި ހުޅުވި ރާއްޖޭގެ ފުރަތަމަ ޓާޝަރީ ހޮސްޕިޓަލެވެ.