ބޮލީވުޑްގައި 10 އަހަރުވީ ނަމަވެސް، ކެޓްރީނާ ކެއިފްގެ އެކްޓިން އަށް އެއްވެސް ކުރިއެރުމެއް ނާންނަ ކަމަށާއި އޭނާއަކީ އެކްޓް ކުރަން އެނގޭ މީހެއް ނޫން ކަމަށް ބުނާ ކިޔާ ފާޑު ކިއުންތަކަށް ނިމުމެއް ނެތެވެ.
އެކަމަކު މައްސަލައެއް ނެތްތާ އެވެ. ކެޓްރީނާއަކީ ބޮލީވުޑްގެ އެންމެ ކާމިޔާބް، އެންމެ ނުފޫޒު ގަދަ އެއް ބަތަލާ އެވެ. އޭނާ އަށް ކުޅެން ލިބެނީ ވެސް ބޮލީވުޑްގެ އެންމެ ފުންނާބު ޕްރޮޑަކްޝަން ހައުސްތަކުގެ ފިލްމުތަކެވެ.
ހަމަ އެ ވަރުގެ ބޮޑެތި ސްޓްރާނުންނާ އެކުގަ އެވެ. އޭނާއަކީ އެންމެ ޑިމާންޑް ބޮޑު އެއް ބަތަލާ އެވެ. އެއީ ފިލްމު ވިޔަސް އިޝްތިހާރު ކުޅެން ވެސް އެންމެ ގިނަ އޮފާތައް ލިބޭ އެއް ބަތަލާ އެވެ.
ބޮލީވުޑްގެ ކޮންމެ ޕްރޮޑިއުސަރަކު އަދި ޑައިރެކްޓަރަކު ވެސް ކެޓްރީނާ އާ އެކު މަސައްކަތް ކުރަން ބޭނުންވެ އެވެ. ހަމަ މިިއާ އެކު ބޮލީވުޑްގެ ގިނަ އެކްޓަރުން އެ ބަތަލާއަކާ އެކު އެންމެ ބޮޑަށް ފިލްމެއް ކުޅެލަން ހިތްވާ އެއް ތަރިއަކީ ވެސް ހަމަ ކެޓްރީނާ އެވެ. ކެޓްރީނާގެ އެންމެ ބޮޑު ޕްލަސް ޕޮއިންޓަކީ އޭނާގެ ރީތި ސިފަ އެވެ.
ހަމަ މިއާ އާ އެކު ކެޓްރީނާ ވަނީ ބޮލީވުޑްގެ އެންމެ ވަރުގަދަ ތިިން ހާނުންނާ އެކު ފިލްމުތައް ކުޅެފަ އެވެ. މިއީ ވަރަށް މަދުން ނޫނީ ބަތަލާއަކަށް އެހާ އަވަހަށް، އެހާ ފަސޭހައިން ލިބޭ ފުރުސަތެއް ނޫނެވެ.
ބޮލީވުޑްގެ ބަތަލާއިންނަށް ބަލާ އިރު، މި ނަސީބު ލިބެނީ ނިސްބަތުން މަދު ބަތަލާއަކަށެވެ. މިސާލަކަށް ކަރީނާ ކަޕޫރާއި އޭނާގެ ދައްތަ ކަރިޝްމާ ކަޕޫރާއި، މަދޫރީ ޑިކްޝިޓާއި ޗޫހީ ޗަވްލާ، ކާޖޮލް ފަދަ މަދު ތަރިންނަށް ނޫނީ ޝާހްރުކް ހާން، އާމިރް ހާން އަދި ސަލްމާން ހާން ފަދަ އެކްޓަރުންނާ އެކު ފިލްމެއް ކުޅެންް ފުރުސަތެއް ނުލިބެ އެވެ.
ބޮލީވުޑުގައި މިހާރު ތިބި އެންމެ ކާމިޔާބް އެހެން ބަތަލާއިންނަށް ބަލާ އިރު، ދީޕިކާ ޕަދްކޯން، ޕްރިޔަންކާ ޗޯޕްޅާ ފަދަ ވަރުގަދަ ބަތަލާއިންނަށް ވެސް އަދި މި ތިން ހާނުންނާ އެކު މަސައްކަތް ކުރެވިފައެއް ނުވެ އެވެ.
އެކަމަކު ކެޓްރީނާ އިނގިރޭސިވިލާތުން ބޮލީވުޑަށް ފުންމާލައި ސަލްމާންގެ ހިތް ފަތަހަކޮށް އޭނާ އާ އެކު ގިނަ ފިލްމްތަކެއް ކުޅެފަ އެވެ. އަދި އެ ވަރުން ފުދުނީކީ ވެސް ނޫނެވެ. ބޮލީވުގައި ވަރުގަދަ އަށް ފައި ވިއްދާލަން ކެޓްރީނާ ވަނީ ސަލްމާން ރައްޓެހިވެގެން ވެސް ދުވަސްތަކެއް ވަންދެން އުޅެފަ އެވެ.
އަދި ބޮލީވުޑްގެ އޭ ލިސްޓް ތަރިއަކަށް ބަދަލުވެ، އޭނާ ވަނީ ފަހުން ސަލްމާންގެ މަތިން ވެސް ހަނދާން ނައްތާލައި ޝާހްރުކާއި އާމިރާ އެކު ވެސް ފިލްމް ކުޅެފަ އެވެ.
ބޮކްސް އޮފީހުގެ "ތަޅުދަނޑި" ވެސް މިހާރު އޮތީ ކެޓްރީނާ އާއި އާމިރް އެކުގައި ކުޅުނު "ދޫމް 3" ގެ އަތުގަ އެވެ. އެ ފިލްމު ވަނީ ކައިރި މުސްތަގުބަލެއްގައި އެހެން ފިލްމަކަށް މުގުރާ ނުލެވޭ ވަރުގެ ރެކޯޑެއް ބޮކްސް އޮފީހުގައި ހަދައިފަ އެވެ.
ކެޓްރީނާގެ އެކްޓިން އަށް މީހުން ފާޑު ކިޔަސް އޭނާގެ މައްސަލައެއް ނެތެވެ. ލިބޭ އޮފާތައް މަދެއް ނުވެ އެވެ. ގިނަ ޕްރޮޑިއުސަރުންނާއި ޑައިރެކްޓަރުން ތިބީ އޭނާގެ ފަހަތުގައި ކިއު ހަދައިފަ އެވެ.
ފިލްމް "ބޫމް" އިން 2003 ވަނަ އަހަރު ބޮލީވުޑަށް ނިކުތުމަށް ފަހު ކެޓްރީނާ ވަނީ ކާމިޔާބް ވަރަށް ގިނަ ފިލްމްތައް ކުޅެފަ އެވެ. އަދި އޭނާ އާއި އަކްޝޭ ކުމާރު ކުޅުނު ގިނަ ފިލްމުތަކަކީ ބޮޑެތި ބްލޮކްބަސްޓާތަކެވެ. އޭގެ ލިސްޓަކަށް ދާނެ ކަމެއް ނެެތެވެ.
އަނެއްކޮޅުން ކެޓްރީނާ ވަނީ ބޮލީވުޑްގެ އެންމެ ވަރުގަދަ ގިނަ ޑައިރެކްޓަރުންނާ އެކުހެން މަސައްކަތްކޮށްފަ އެވެ. އެ ލިސްޓްގައި އަދި ނެތީ އަދިތިޔާ ޗޯޕްޅާ، ސޫރަޖް ބަރްޖަތިއާ އާއި ކަރަން ޖޯހަރާއި ސަންޖޭ ލީލާ ބަންސާލީގެ އިތުރުން ރޯހިތު ޝެޓީ އެވެ.
އެކަމަކު ޔާޝް ޗޯޕްޅާ، ސުބާޝް ގާއީ، ރާޖް ކުމާރު ސަންތޯޝީ، ފަރަހް ހާން، ޒޯޔާ އަހްތަރު، ޕްރަކާޝް ޖާ، ރާޖް ކަންވަރު، ވިޕުލް ޝާހް، ޑޭވިޑް ދަވަން، ކަބީރު ހާން ފަދަ ޑައިރެކްޓަރުންނާ އެކު ކެޓްރީނާ ވަނީ މަސައްކަތްކޮށްފަ އެވެ.
އަދި އޭނާގެ ކުރިއަށް ހުރި ފިލްމްތަކަށް ބަލާ އިރު އަނޫރާގް ބާސޫ ޑައިރެކްޓް ކުރާ "ޖައްގާ ޖާސޫސް" އާއި ސިދާތު ރާޖް އާނަންދު ރިތިކް ބަތަލަށް ލައިގެން ހަދާ "ބޭންގް ބޭންގް" ފަދަ ފިލްމްތައް ހިމެނެ އެވެ.