މިނިޓެއްގެ ތެރޭގައި ޑީސީ ކޮމިކްސްގެ އެންމެ ގިނަ ކެރެކްޓާތަކުގެ ނަން ބުނެދީގެން އިންޑިއާގެ ކުއްޖަކު ހަދާފައި އޮތް ރެކޯޑެއް އެ ގައުމުގެ އެހެން ކުއްޖަކު މުގުރާލައިފި އެވެ.
މި ފަހަރު ރެކޯޑް މުގުރާލީ ޓަމިލް ނާޓޫ ސްޓޭޓަށް 7 އަހަރުގެ ނިދިޝް ވީބީ އެވެ. މިދިޔަ އަހަރު ރެކޯޑް ހެދި އިންޑިއާގެ މުހައްމަދު ހަރްސަތަށް ރެކޯޑް ލިބުނީ މިނިޓެއްގެ ތެރޭގައި 53 ކެރެކްޓާއެއްގެ ނަން ބުނެދީގެންނެވެ. އޭނަގެ އެ ރެކޯޑް ނިދިޝްގެ މިދިޔަ މަހުގެ 19 ގައި މުގުރާލީ މިނިޓެއްގެ ތެރޭގައި 60 ކެރެކްޓާގެ ނަން ބުނެދީގެންނެވެ. މި ރެކޯޑަކީ ސްކްރީނުން ދައްކާ ފޮޓޯތަކަށް ވިސްނައިގެން ހުރެ ވީހާ ވެސް އަވަހަކަށް އެ ކެރެކްޓާއެއްގެ ނަން ބުނެދިނުމެވެ.
⚡ @DCComics superfan Nidhish identified an incredible 60 characters in 60 seconds https://t.co/DHwcrTYtKe
— Guinness World Records (@GWR) March 25, 2022
މި ރެކޯޑް ނިދިޝް ހެދީ މައިންބަފައިންގެ އެހީގައި ގާތްގަނޑަކަށް ދެ މަސް ދުވަހަށް ޓްރޭނިން އަށް ފަހު އެވެ. އޭނާ ބުނި ގޮތުގައި މަސައްކަތްކުރީ ވީހާ ވެސް ގިނަ ކެރެކްޓާތައް ވަރަށް ގާތުން ބަލައި، އެ ކެރެކްޓާތަކުގެ ނަންތައް ހަނދާނުގައި ބެހެއްޓުމެވެ. އެކަމަކު މިކަންވީ ނިދިޝް އަށް މާ ފަސޭހަ ކަމަކަށް ނޫނެވެ. ސަބަބަކީ ކިޔަވަމުން އަދި އޭނާ މަސައްކަތްކުރާ ޓީވީ ޝޯއަކަށް ވެސް ވަރަށް ގިނަ ވަގުތު ހުސްކުރަން ޖެހުމެވެ.
ނިދިޝް އަކީ ސަން ޓީވީގެ ތަމަޅަ ޗެނެލުން ގެނެސްދޭ ސިލްސިލާއެއް ކަމަށްވާ "އަބިޔުމް ނަނުމް" ގައި މަސައްކަތްކުރަމުން އަންނަ ޗައިލްޑް އާޓިސްޓެކެވެ.
ޑީސީގެ ކެރެކްޓާތަކުގެ ތެރެއިން ފެވަރިޓަކީ "ސުޕަމޭން" ކަމަށް ބުނާ ނިދިޝް ކިޔައިދިން ގޮތުގައި ދުނިޔޭގެ ރެކޯޑް ފޮތަށް އެރުމުގެ އެންމެ ބޮޑު އިންސްޕިރޭޝަނަކީ އޭނަގެ މަންމަ ވިޖަޔާލަކްޝްމީ ބޫޕަތީ އެވެ. އޭނަ އަކީ ކުރިން ދެ ރެކޯޑެއްގެ މަސައްކަތްކުރި މީހެކެވެ. އެއީ އެންމެ ގިނަ ބަޔަކު ހޭލުންތެރިކަމުގެ ރިބަންތަކެއް ހަދައިގެން އެ ބޭނުންކުރުމުގެ ރެކޯޑާއި ކަނޑި ހިފައިގެން އެންމެ ގިނަ ބަޔަކު ނެށުމުގެ ރެކޯޑެވެ.