އަންހެނުންނާއި ފިރިހެނުންނަކީ އުފެދުމުގައި ވެސް ތަފާތެވެ. މިޒާޖުގެ ގޮތުންނާއި ވިސްނުމުގެ ގޮތުން ވެސް ތަފާތެވެ. އެހެންވެ ކަންކަމުގައި ދެ ބައި މީހުން ވެސް ދެކޭ ގޮތް މުޅިން ތަފާތެވެ.
އެގޮތުން ބަލާ އިރު ފިރިހެނުންނަކީ އަންހެނުންނާ އަނގަ ގަދަ، ސުވާލްތައް ގިނަ ބައެއް ނޫނެވެ. ބައެއް ކަންކަމުގައި ފިރިހެނުން ވިސްނުން ވަރަށް "ކޫލް" ވާނެ އެވެ. އެކަމަކު އޭގެ މާނައަކީ ފިރިހެނުން ހިތްހަމަނުޖެހޭ ކަންތައްތަކެއް ނެތުމެއް ނޫނެވެ.
ކުޑަކުޑަ ތިން ހަތަރު މިސާލަކަށް މި ހިސާބުން ބަލާލުން ކީއްތޯ އެވެ؟
* ސުވާލު ގިނަ ކުރުން:
ގިނައިން ސުވާލު ކުރުމަކީ އަންހެނުން ވަރަށް ކުރާ ހިތްވާ ކަމެކެވެ. ނަމަވެސް ގިނައިން ސުވާލު ކުރުމަކީ ފިރިހެނުން ވަރަށް ފޫހިވާ ކަމެކެވެ. އަދި އެކަމުގެ ސަބަބުން ބޮޑެތި މައްސަލަތަކަށް ވެސް ބައެއް ފަހަރު މަގުފަހިވެ އެވެ.
ބައެއް އަންހެނުންގެ އާދަ ހުންނަ ގޮތުން ފިރިމީހާ ގެ އަށް އައުމުން އައީ ކޮން ތާކުންތޯ، ލަސްވީ ކީއްވެތޯ، ސުވާލު ކުރާނެ އެވެ.
އެކަމަކު އެހާ ގިނަ ސުވާލުކުރުމުގެ ބަދަލުގައި ކޮންމެ ވެސް އެހެން ވާހަކައެއް ދައްކާލެވިދާނެ އެވެ. އެކަމަކު ޝަކުވާއަކަށްވާ ކަހަލަ ވާހަކަ ގިނައިން ނުދެއްކުން ރަނގަޅު ވާނެ އެވެ.
* ޓީވީ ރިމޯޓް އަންހެން މީހާގެ އަތުގައި އޮތުން:
އަންހެނުން އާއްމުކޮށް ބަލަން ބޭނުންވާނީ ކޮންމެ ވެސް ޑްރާމާއެކެވެ. ދޭތެރެޖެއްސުމާއި ތިނެސްކަން ލޯބި ހިމެނޭ އެފަދަ ޑްރާމާތަކަށް ފިރިހެނުން ލޯތްބެއް ނުކުރާނެ އެވެ.
އެކަމަކު އެފަދަ ޑްރާމާ ސީރީސްތަކަށް ލޯބިކުރާ އަންހެނުންނަށް އެ އިން އެންމެ އެޕިސޯޑެއް ގެއްލުމަކީ ވެސް ވަރަށް ބޮޑު ދެރައެކެވެ. އެއާ ހިލާފަށް ބައެއް ފިރިހެނުން ލޯބިކުރާނީ ސިޔާސީ ވާހަކަތަކަށާއި ކުޅިވަރަށެވެ.
ފުޓްބޯޅަ މެޗެއް ބަލަން އިންދާ ކުއްލިއަކަށް އެހެން ޗެނަލަކަށް ބަދަލުކޮށްލުމަކީ އެ މީހުން ވަރަށް ހިތްހަމަނުޖެހޭނެ ކަމެކެވެ. ވުމާއެކު އެންމެ ރަނގަޅު ގޮތަކީ އެ މީހުން ބަލަން ބޭނުން އެއްޗެއް ބެލުމަށް އެ ވަގުތު ފުރުސަތު ދިނުމެވެ.
* ކަންތައް ކުރަންވީ ގޮތް މާ ގިނައިން ކިޔައި ދިނުން:
ކަންތައްކުރަންވީ ގޮތް ތުއްތު ކުދިންނަށް ކިޔައިދޭ ގޮތަށް އެކި ކަންތައްތައް ކުރަންވީ ގޮތް ކިޔައި ދިނުމަކީ ފިރިހެނުން ވަރަށް ފޫހިވާ ކަމެކެވެ. އެ މީހުންނަކީ މިނިވަން ކަމަށް ލޯބިކުރާ ބައެކެވެ. ވުމާ އެކު އެފަދަ ކޫސަނި ކަންތައްތަކާ ދުރުވުން ވަރަށް މުހިއްމެވެ. ނަމަވެސް އޭގެ މާނައަކީ ފިރިހެނުން ގޯސްކޮށް ކަމެއް ކުރާ ނަމަ އެކަން ރަނގަޅު ކުރުމަށް ނުބުނުމެއް ނޫނެވެ.
* ހަރަދުކުރާ ގޮތް ބެލުން:
އަންހެނުންނާ ހިލާފަށް ފިރިހެނުންނަކީ ހަރަދު ކުރުމުގައި ފަސްޖެހޭ ބައެއް ނޫނެވެ. ކޮންމެހެން ކުރަން ޖެހޭ ހަރަދެއް ފިޔަވައި ދެން ހުރި ހަރަދުތައްކޮށް އިގްތިސާދު ކުރުމަކީ އެ މީހުންނަށް އެހާ ފަސޭހަ ކަމަކަށް ނުވެ އެވެ.
ވުމާއެކު އެ މީހުން ހަރަދު ކުރަނީ ކޮން ކަހަލަ ކަންތަކަކަށްތޯ އަންހެނުން ބަލައިފި ނަމަ އެ މީހުން ވަރަށް ހިތްހަމަނުޖެހޭނެ އެވެ.
އެއީ ފިރިމީހާ ހަރަދު ކުރުމަށް ހޯދާ ފައިސާކަމަށް ވުމުން އެ މީހުން އަމިއްލަ އަށް ކުރާ ހަރަދުތަކާ ނުބެހުން މާ ރަނގަޅު ވާނެ އެވެ. އެކަމަކު އޭގައި ވެސް ވަކި މިންގަނޑެއް ގެންގުޅުމަށް ފިރިމީހާ އަށް ބުނެ ދިނުމަކީ ގޯހެއް ނޫނެވެ.