ޝޫޓިން ފެށުން ލަސްވެ، ތަފާތު މައްސަލަތައް ދިމާވަމުން ދިޔަ ކަރަން ޖޯހަރުގެ ޑްރީމް ޕްރޮޖެކްޓް "ޝުއްދީ" އިން އެންމެ ފަހުން، އެ ފިލްމުގެ ލީޑްް ރޯލަށް ހަމަޖެއްސި ރިތިކް ރޯޝަން ވަކިވެއްޖެ އެވެ.
ރިތިކް އެ ފިލްމުން ވަކިވެފައި މި ވަނީ، ފިލްމުގެ މަސައްކަތް ނުފެށި ލަސްވާތީ ބަތަލާ ކަރީނާ ކަޕޫރު ވެސް އެ ފިލްމު އޭނާ ދެން ކުޅޭނެތޯ ނުވަތަ ނޫންތޯ އާ ދޭތެރޭ ސުވާލު އުފައްދާފައި ވަނިކޮށެވެ.
"ޝުއްދީ" އިން ވަކިވިކަން ރިތިކް ކަށަވަރުކޮށް ދިނީ އޭނާ ނެރުނު ބަޔާނެއްގަ އެވެ.
އެ ބަޔާނުގައި އޭނާ ބުނެފައި ވަނީ "ޝުއްދީ" ޑައިރެކްޓް ކުރަން ހަމަޖެހިފައިވާ ކަރަން މަލްއުތުރާ އާ އެކު "އަގްނީޕަތު" ގައި ހިތްގައިމު ތަޖުރިބާއެއް ކުރެވުނު ކަމަށާއި އެކަމާ އުފާ ކުރާ ކަމަށެވެ.
"އެހެންވެ އަހަރެން ވަރަށް ބޮޑަށް ބޭނުންވި ކަރަންގެ ދެވަނަ ފިލްމު ޝުއްދީގައި ވެސްް މަސައްކަތް ކުރަން. އެކަމަކު ފިލްމުގެ މަަސައްކަތް ނުފެށި ވަރަށް ބޮޑަށް ދިގުލައިގެން ގޮސްފައި މި ވަނީ،" މިހާރު ކެޓްރީނާ ކެއިފާ އެކު "ބޭންގް ބޭންގް" ގެ މަންޒަރުތައް ނަގަމުން އަންނަ ރިތިކް ބުންޏެވެ. "އަހަރެން އުންމީދު ކުރަނީ ކަރަން ޖޯހަރާއި ކަރަން މަލްއުތުރާގެ ޝުއްދީއަކީ ލޭންކްމާކް ފިލްމަކަށް ވެގެން ދާނެ ކަމަށް. ދެ މީހުންނަށް ވެސް ހެޔޮދުއާ ފޮނުވަން."
"ޝުއްދީ" އަކީ ކަރަން ޖޯހަރުގެ ދަރްމާ ޕްރޮޑަކްޝަނުން މިހާތަނަށް ތައްޔާރު ކުރާ އެންމެ ބޮޑު ބަޖެޓްގެ ފިލްމެވެ. އެ ފިލްމަށް ވަނީ 150 ކްރޯޑް ރުޕީސްގެ ބަޖެޓެއް ހަމަޖައްސައިފަ އެވެ.
އެހެން ނަމަވެސް ރިތިކް އާއި ކަރީނާ ލައިގެން ފިލްމުގެ މަސައްކަތް ފެށޭ ގޮތް ނުވުމުން ކަރަން ހުރީ ވަރަށް ބޮޑު ހާސްކަމެއްގެ ތެރޭގަ އެވެ. އަދި މި މައްސަލާގައި ކަރަން، ކަރީނާ ދެކެ ހިތްހަމަނުޖެހިފައި ހުރި ކަމަށް ވެސް ވެ އެވެ.
އަނެއްކޮޅުން ގިނަ އަހަރުތަކެއްގެ މެދުކެނޑުމަކަށް ފަހު ކަރީނާ އާއި ރިތިކް އެކުގައި ސްކްރީނުން ދެކިލުމަށް އެދިއެދި ތިބި އެތައް ސަޕޯޓަރުންނަކަށް މިހާރު ވަނީ ވަރަށް ބޮޑު މާޔޫސް ކަމެއް ލިބިފަ އެވެ.
މީޑިއާ ރިޕޯޓްތައް މިހާރު ބުނާ ގޮތުން މި ފިލްމަށް ދީޕިކާ ޕަދްކޯން އާއި ރަންބީރު ކަޕޫރު ގެނެވޭތީ މިހާރު އަންނަނީ މަސައްކަތްތަކެއް ކުރެވެމުންނެވެ.
"ޝުއްދީ" އަކީ މަޝްހޫރު ވާހަކަ ލިއުންތެރިޔާ އަމިޝް ތުރިޕަތީގެ ޓްރިލޮޖީ "އިމޯޓަލްސް އޮފް މެލުހާ" ގެ މައްޗަށް ބިނާކޮށް އުފައްދާ ފިލްމެކެވެ.