އާއިލީ ލޯބީގެ ފިލްމްތައް އުފެއްދުމަށް މަޝްހޫރު ސޫރަޖް ބަރްޖަތިއާގެ އާ ފިލްމުގެ ބަތަލަކީ ސަލްމާން ހާނުކަން މިހާރު ވަނީ ކަށަވަރުވެފަ އެވެ.
އެހެން ނަމަވެސް "ބަޅޭ ބެއްްޔާ" ގެ ނަން ދީފަައިވާ މި ފިލްމުގެ ބަތަލާއަކާ ބެހޭ ގޮތުން ދެކެވޭ ވާހަކަތައް ތަފާތެވެ.
މީގެ ކުރިން އަރާފައިވާ އަޑުތަކަށް ބަލާ އިރު، އެ ފިލްމުގައި ސަލްމާނާ އެކު ބަތަލާއެއްގެ ގޮތުގައި ފެނުން އެންމެ ކައިރީ ދީޕިކާ ޕަދްކޯން އެވެ.
އެހެން ނަމަވެސް ދާދި ފަހުން ސޫރަޖް ދިން އިންޓަވިއުއެއްގައި ބުނެފައި ވަނީ "ބަޅޭ ބެއްޔާ" އަށް އަދި ބަތަލާއަކު ހަމަނުޖެހޭ ކަމަށެވެ. އެކަމަކު ދީ؛ޕިކާ އާ ވާހަކަ ދެއްކިކަން އޭނާ ދޮގެއް ނުކުރެ އެވެ.
ރިޕޯޓްތައް ބުނާ ގޮތުން ސޫރަޖްގެ އޮފާ ދީޕިކާ އާ ހަމައަށް ދިޔަ ނަމަވެސް، އޭނާ ސޮއިކޮށްފައިވާ އެހެން ފިލްމުތަކާއި ސޫރަޖްގެ ފިލްމު ޝޫޓް ކުރަން ތާވަލް ކުރި ދުވަސްވަރާ ދިމާވާތީ ދީޕިކާ އަށް ވަގުތު ދެވެން ނެތީ އެވެ.
ދީޕިކާގެ އިތުރުން "ބަޅޭ ބެއްޔާ" އަށް ނަރްގިސް ފަޙްރީ އާއި އިލިއާނާ ޑި ކްރޫޒް ގެންނަން އުޅޭ ވާހަކަތަކެއް ވެސް ދޭތެރެއަކުން ފެތުރުނެވެ.
އެހެން ނަމަވެސް ސޫރަޖްގެ ޕްރޮޑަކްޝަން ހައުސް ރާޖްޝްރީގެ އޮފިޝަލަކާ ހަވާލާދީ މީޑިއާތަކުން ބުނެފައި ވަނީ "ބަޅޭ ބެއްޔާ" ގައި ސަލްމާނުގެ ބަތަލާއަކީ ސޯނަމް ކަޕޫރު ކަމަށެވެ.
އަދި އޭނާ އާ ވާހަކަ ދެކެވެމުން އަންނަ ކަމަށާއި ކުރިއަށް އޮތް ދެ ދުވަހެއްގެ ތެރޭގައި ހުރިހާ ކަމެއް ނިމޭނެ ކަމަށް އޮފިޝަލާ ހަވާލާދީ ބުނެފައިވެ އެވެ.
މިކަން މި ގޮތަށް ވެއްޖެ ނަމަ މިއީ ސޯނަމް އާއި ސަލްމާން ސްކްރީނުން އެކުގައި ފެނިގެންދާ ދެވަނަ ފިލްމަށް ވާނެ އެވެ.
ފުރަތަމަ ފިލްމަކީ ސޯނަމް ބޮލީވުޑަށް ތައާރަފްވި ސަންޖޭ ލީލާ ބަންސާލީގެ "ސާވަރިއާ" އެވެ.
އެ ފިލްމުގައި ސޯނަމްގެ ލޯބިވެރިއެއްގެ ގޮތުގައި ސަލްމާން ފެނުނީ ހަމައެކަނި ހާއްސަ ކުޑަކުޑަ ފެނިލުމަކުންނެވެ.
އެހެން ނަމަވެސް "ބަޅޭ ބެއްޔާ" ވެގެން ދާނީ ސޯނަމް އާއި ސަލްމާން ލޯބީގެ ވާހަކަ ވަރަށް ހިތްގައިމުކޮށް ބެލުންތެރިންނަށް ފެނިގެންދާނެ ފިލްމަކަށެވެ.
މި ފިލްމުގެ ޝޫޓިން ފެށުމަށް ހަމަޖެހިފައި ވަނީ ޖޫން މަހުގެ ތެރޭގަ އެވެ. ފިލްމް ސިނަމާތަކަށް އަންނާނީ އަންނަ އަހަރުގެ ނޮވެމްބަރުގަ އެވެ.
މިއީ 1999 ގެ "ހަމް ސާތު ސާތު ހޭ" އަށް ފަހު ސަލްމާނާއި ސޫރަޖް އެކުގައި މަސައްކަތް ކުރާ ފުރަތަމަ ފިލްމެވެ. އޭގެ ކުރިން އެ ދެ މީހުން ވަނީ "މޭނާ ޕިޔާރު ކިޔާ" އާއި "ހަމް އާޕްކޭ ހޭ ކޯން" ފަދަ ބޮޑެތި ބްލޮކްބަސްޓާތައް ބެލުންތެރިންނާ ހަމަށް ގެނެސް ދީފަ އެވެ.
އަދި "ބަޅޭ ބެއްޔާ" އަކީ 2006 ގައި ރިލީޒްވި "ވިވާހް" އަށް ފަހު ސޫރަޖް ޑައިރެކްޓް ކުރާ ފުރަތަމަ ފިލްމެވެ. އެ ފިލްމުގައި ލީޑް ރޯލް ކުޅެފައި ވަނީ ޝާހިދު ކަޕޫރާއި އަމްރިތާ ރާއޯ އެވެ.