ތުރުކީގެ ރޭޑިއޯ އެންޑް ޓެލެވިޝަން (ޓީއާރުޓީ) އިން އަންނަ އޭޕްރީލް މަހު 16-23 އަށް ބޭއްވުމަށް ހަމަޖެހިފައިވާ އިންޓަ ނޭޝަނަލް ޗިލްޑްރެންސް ފެސްޓިވަލް ގައި ބައިވެރިވުމުގެ ފުރުޞަތު ހިތަދޫ ނޫރާނީ ސްކޫލްގެ ގްރޭޑް ހަތެއްގައި ކިޔަވާ ފާތިމަތު ޝަބާ ޢަޒީޒުއަށް ލިބިއްޖެއެވެ.
މި ފުރުޞަތަކީ ފެސްޓިވަލް އިންތިޒާމް ކުރާ ފަރާތުން އުމުރުން 10-13 އަހަރާ ދެމެދުގެ ދިވެހި 13 ދަރިވަރަކަށް ދެވުނު ފުރުޞަތުގެ ތެރެއިން ލިބިފައިވާ ފުރުޞަތެކެވެ.
މި ފުރުޞަތު ނޫރާނީ ސްކޫލުގެ ދަރިވަރަށް ލިބިފައިވަނީ މިނިސްޓްރީ އޮފް އެޑިއުކޭޝަނުން މި ފެސްޓިވަލް ގައި ބައިވެރިވުމަށް އެދި ސްކޫލްތަކަށް ހުޅުވާލި ފުރުޞަތުގައި ނޫރާނީ ސްކޫލުން އެކަމަށް އެދުނު ދަރިވަރުންގެ ތެރެއިން ހޮވިގެންނެވެ.
މިފެސްޓިވަލް އޮންނާނީ ތުރުކީވިލާތުގެ ގާޒިއަންޓެޕް ސިޓީގައި އާއި އަންކާރާގަ އެވެ. ފެސްޓިވަލްގައި ބައިވެރިވާ ދަރިވަރުން އެކިއެކި އައިޓަމްތައް ހުށަހެޅުމާއި ތަފާތު އެކިއެކި އިވެންޓްތަކުގައި ބައިވެރިވުމާއި އެކިއެކި ހިސްޓޯރިކް ސައިޓްތަކަށް ޒިޔާރަތް ކުރުން ފަދަ ގިނަ ޙަރަކާތްތަކެއްގައި ބައިވެރިވެ ގިނަ ތަޖުރިބާ ހޯދާނެ އެވެ.
އަދި މި ފެސްޓިވަލްގައި ބައިވެރިވާ ދުނިޔޭގެ އެކި ޢުމުރުތަކުގެ ގިނަ ކުދިންގެ ތެރެއިން އައު ރަޙްމަތްތެރިން ހޯދުމުގެ ފުރުޞަތު އޮންނާނެ އެވެ.
މި ދަތުރުގެ ބައިވެރިން ތުރުކީވިލާތައް ފައިބާ ހިސާބުން ފެށިގެން ފެސްޓިވަލް ނިމެންދެން ހުރިހާ ޙަރަކާތެއް ތުރުކީވިލާތުގެ ޓީއާރްޓީ ޗެނެލްތަކުން ލައިވްކޮށް ގެނެސް ދެވޭނެ އެވެ.
އެހެން ނަމަވެސް ދެކޮޅު ދަތުރަށް ހަރަދު ކުރަން ޖެހެނީ އަމިއްލަ އަށެވެ.
ނޫރަނީ ސްކޫލްގެ ޕްރިންސިޕަލް މުހައްމަދު ސޯލިހް އަހުމަދު މިއަދު ވިދާޅުވީ ޝަބާ ތުރުކީ އަށް ކުރަން ޖެހޭ ހަރަދަށް އެ ސްކޫލްގެ ފަރާތުން ވެސް ކޮންމެވެސް ވަރެެއްގެ އެހީއެއް ދޭން ނިންމާފައިވާ ކަމަަށެވެ.