ސިއްހީ އެކިއެކި މައްސަލަތަކުން އަރައިގަތުމަށް ބޭހަށް ވުރެ ރޯދަ ހިފުމަކީ މާ ވަރުގަދަ ފަރުވާއެއް ކަމަށް ޕްރޮފެސަރު ހުސައިން އުގައިލް ވިދާޅުވެއްޖެ އެވެ.
އިނގިރޭސިވިލާތުގައި ދިރިއުޅުއްވާ އައްޑޫ ހިތަދު އުފަން އުގައިލްގެ އަމިއްލަ ބްލޮގްގައި އިސްލާމް ދީނުގެ ހަތަރު ވަނަ ރުކުނާ ބެހޭ ގޮތުން ލިޔުއްވާފައިވާ ގޮތުގައި ދުނިޔޭގައި މިހާރު ތިބި އެންމެ ދުވަސްވީ މީހުން އެންމެ އާންމުކޮށް އަދި ގަވައިދުން ކުރާ ކަމަކީ ވެސް ރޯދަ ހިފުމެވެ.
"…ދުނިޔޭގައި ހަތް ބިލިއަނަށް ވުރެ ގިނަ އިންސާނުން ދިރިއުޅެމުން އެބަދެ އެވެ. މީގެ ތެރެއިން އުމުރުން 110 އަހަރުން މަތީގެ މީހުންގެ ގޮތުގައި މުޅި ދުނިޔޭގައި ތިބި ކަމަށް ލަފާ ކުރެވެނީ އެންމެ 500 މީހުންނެވެ. މި 500 އެއްހާ މީހުންގެ ތެރެއިން ކޮންމެ މީހަކު ވެސް އެމީހުންގެ އާންމު ދިރިއުޅުމުގައި ކޮށް އުޅޭ އެއްކަމެއް އޮވެއެވެ. އެއީ، ގަވައިދުން ރޯދަ ހިފުމެވެ. އެހެން ގޮތަކަށް ދަންނަވަނީ ނަމަ ދުވާލުގެ ގިނަ ވަގުތު ނުކައި ތިބުމެވެ." އުގައިލް ވިދާޅުވި އެވެ.
އޭނާ ވިދާޅުވީ ފަރުޟުކުރައްވާފައިވާ ކޮންމެ ކަމަކީ ވެސް އެކަމެއްގައި ހިކުމަތުން ފުރިގެންވާ އަދި ދެ ދުނިޔޭގައި ވެސް އޭގެ ފައިދާއާއި މަންފާ އެކުލެވޭ ކަމެެކެވެ. އަދި ކަށަވަރުން ރޯދަ އަކީ ވެސް މީގެ ލާމަސީލު މިސާލެކެވެ.
"ސިއްހީ ހަދިޔާ" ގެ ނަމުގައި ވެސް ދުޅަހެޔޮކަމަށް ހާއްސަ ފޮތެއް ވެސް ލިޔުއްވާފައިވާ އުގައިލް ރޯދަ ހިފުމުގެ ފައިދާތަކާ ބެހޭ ގޮތުން ވިދާޅުވީ އޭގެ ފައިދާގެ ހެކި ސައިންސުން ވެސް ހޯދިފައިވާ ކަމަށެވެ.
"ހަމަ ޔަގީނުން ވެސް ރޯދަ ހިފުމަކީ އޭގައި ގިނަގުނަ ފައިދާތަކެއް އެކުލެވޭ ކަމެއްކަން ކަށަވަރެވެ. އެއީ ސިއްހީ ނަޒަރަކުން ބެލިކަމުގައި ވިއަސް މެއެވެ. މިކަމަށް ހެކިދޭ ސައިންސުގެ ތަފާތު ގިނަ ދިރާސާތައް ވެސް އެބަ ހުއްޓެވެ. ކެއުމުގައި ވަކި މިންގަނޑެއް ބަހައްޓައިގެން ގަވައިދުން ރޯދަހިފުމަކީ ހަށިގަނޑުގެ ދިފާއީ ނިޒާމު ވަރުގަދަކޮށް މީހާ ބަލިތަކުން ދުރުވެ ހުރުމަށް އެޅޭނެ ފިޔަވަޅު ތަކުގެ ތެރެއިން އެންމެ ކާމިޔާބު އެއް ފިޔަވަޅެކެވެ. ގިނަ ދިރާސާތަކުން ދައްކާގޮތުގައި ގަވައިދުން ރޯދަ ހިފުމަކީ އޭގެ ސަބަބުން ހަށިގަނޑުގެ ކޮލެސްޓްރޯލްގެ މިންވަރާއި ލޭގެ ޕްރެޝަރު އަދި ހަކުރުގެ މިންގަނޑުތައް އެންމެ އެދެވޭ ވަރުގައި ހިފެހެއްޓުމަށް ބާރުއަޅާދޭ ކަމެކެވެ." އުގެއިލް ވިދާޅުވި އެވެ. "ހަމަ އެހެންމެ، ގަވައިދުން ރޯދަހިފުމަކީ އިންސާނާ އަށް ކުރިމަތިވާ ކެންސަރު ފަދަ ނުރައްކާތެރި ބަލިތަކުން ވެސް މީހާ ދުރުކޮށްދިނުމަށް ބާރު އަޅާ ކަމެކެވެ. އިންސާނުންގެ އިތުރުން ޖަރާސީމާއި ބައެއް ދިރޭ ސޫފާސޫފި ބޭނުންކޮށްގެން ކުރެވުނު އެތަކެއް ތަހުލީލުތަކުން ވެސް މިހަގީގަތް ވަރަށް ފުރިހަމައަށް ހާމަވެ އެވެ."
އޭނާ ވިދާޅުވީ ރޯދައިގެ ސިއްހީ ފައިދާ އެންމެ އެދެވޭ ގޮތަށް ހާސިލުކުރުމަށް ކެއިންބުއިމުގެ ވައްޓަފާޅި ވެސް ހާއްސަ ގޮތަކަށް ބަހައްޓަން ޖެހޭ ކަމަށެވެ.
"އެއީ، ކެއިންބުއިމުގައި، ރޯދައަށް ހުންނަ ދުވަހެކޭ އަދި އެހެން ދުވަހެކޭ ތަފާތު ނުކުރުމެވެ. މިސާލަކަށް، ރޯދަމަހު އަޅުގަނޑުމެން ބައެއް މީހުން ގެންގުޅޭ ނުރަނގަޅު އާދައެއް އޮވެއެވެ. އެއީ، ރޯދަމަހު ރޯދަ ވީއްލާ ގަޑީގައި އަދި ރޭގަނޑުގެ އެހެން ގަޑިތަކުގައި ވެސް އާދަޔާ ހިލާފަށް ގިނައިން ކެއުމެވެ،" އުގައިލް ވިދާޅުވި އެވެ. "މީގެ ސަބަބުން ރޯދަމަސް ނިމޭއިރު ބައެއް މީހުންގެ ހަށިގަނޑުގެ ބަރުދަން އިތުރު ވެސް ވެއެވެ. އަދި ރޯދަމަހު މިގޮތަށް ހަށިގަނޑަށް ނުކަތާވަރަށް ގިނައިން ކެއުމާ ބުއިމުން އޭގެ ސަބަބުން ހަށިގަނޑަށް ނުހަނު ގެއްލުން ވެސް ވެއެވެ. ނަތީޖާއަކަށް ވެގެންދަނީ ހަކުރުބަލި ފަދަ ދާއިމީ ފަރުއާއެއް ނެތް ބަލިތަކަށް މަގުފަހި ވެސް ވުމެވެ."
އޭނާ ވިދާޅުވީ ދެ ދުނިޔޭގެ ލާބަ އާއި މަންފާ ހޯދުމުގެ އަދި ރަނގަޅު ސިއްހަތެއްގައި އަމިއްލަ ހަޔާތް ވޭތިކުރުމުގެ ނިޔަތުގައި ގަވައިދުން ރޯދަ ހިފާ ކަމަށެވެ. އެގޮތުން، ރޯދަ މަހުގެ ބޭރުން ވެސް ހަފްތާއަކު ދެ ދުވަހު ވަރު ސުންނަތް ރޯދަ އަށް ހުންނަ ކަމަށް ވިދާޅުވި އެވެ .އަދި ކެއުމުގެ މިންގަނޑު އަބަދުވެސް އެއްވަރެއްގައި ހިފަހައްޓައި ރޯދައަށް ހުންނަ ދުވަހެކޭ ނުވަތަ އެނޫން ދުވަހެކޭ ތަފާތެއް ނުކުރާ ކަމަށް ވެސް އުގެއިލް ވިދާޅުވި އެވެ.