އަންނަ ހޯމަ ދުވަހު ދިރާސީ އާ އަހަރު ފެށޭ އިރު އައްޑޫގެ ބޮޑެތި ސްކޫލްތަކުގެ ޕްރިންސިޕަލެއް ނެތެވެ. އެކަމުގެ ޝަކުވާތައް ބެލެނިވެރިން މިހާރު ވެސް ކުރަން ފަށައިފި އެވެ.
އެންމެ ބޮޑު ޝަކުވާއެއް އޮތީ އެންމެ ބޮޑު ސްކޫލް "ޝަރަފުއްދީން" ސްކޫލް އާއި ހިތަދޫ ސްކޫލުންނެވެ. މި ދެ ސްކޫލުގައި ފާއިތުވި އަހަރު ވެސް ޕްރިންސިޕަލަކު ނެތެވެ. އަނެއްކޮޅުން އަޑު އިވެނީ އައްޑޫގައި ހުރި އެޑިއުކޭޝަން ޔުނިޓް އުވާލާ ވާހަަކައެވެ. މިއާ އެކު އައްޑޫގެ ތަޢުލީމް ހަލާކު ކުރަނީ ކަމަށް ދެކެވޭ ވާހަކައިގެ އަޑު ވެސް ގަދަވެއްޖެ އެވެ.
ޝަރަފުއްދީން ސްކޫލް މިދިޔަ އަހަރު ހިންގީ އައްޑު ހައިސްކޫލްގެ ޕްރިންސިޕަލް އިބްރާހިމް ނަދީމެވެ. އައްޑޫގެ ހައި ސްކޫލް ހިންގަމުން އިތުރު ސްކޫލެއް ހިންގުމަކީ ނަދީމަށް ފަސޭހަކަމަކަށް ނުވާނެއެވެ. މީގެ އަސަރު މި ދެ ސްކޫލަށްވެސް ފޯރާނެއެވެ.
ޝަރަފފުއްދީން ސްކޫލުގެ ބެލެނިވެރިންނާއި އެއްވަރުގެ ޝަކުވާއެއް ހިތަދޫ ސްކޫލްގެ ބެލެނިވެރިންގެ ވެސް އެބައޮތެވެ. މި އަހަރަކީ އެ ސްކޫލްގެ ގެ ދަރިވަރުން ފުރަތަމަ ފަހަރަށް ޖީސީއީ އޯލެވެލް އިމްތިހާނެއްގައި އިށީންނާނެ އަހަރެވެ. އެހެންވެ ހަރުދަނާ ޕްރިންސިޕަލަކު މިހާރު ތިބި ޑެޕިއުޓީ ޕްރިންސިޕަލުންނާއި އެކު މަސައްކަތް ކުރުމަށް އެމީހުން އެދެއެވެ. އެ ސްކޫލްގެ ދަރިވަރުން މިއަހަރުގެ ޖީސީއީ އޯލެވެލް އިމްތިހާނުން ރަންވަނަ އެއް ހޯދުމަކީ އެސްކޫލްގެ ބެލެނިވެރިން އެންމެ ދެކެން ބޭނުން މަންޒަރެވެ. އެއީ އެމީހުންގެ ހުވަފެނެވެ.
ޝަކުވާތަކުގެ ތެރެއިން ދެން އަނެއް ޝަކުވާ އަކީ ހިތަދޫ ތައުލީމީ މަރުކަޒާއި، މުހިއްބުއްދީން ސްކޫލް (މިހާރުގެ ޝަރަފުއްދީން ސްކޫލް) އެއްކޮށްލާ އެތަން ހިންގޭނެ ވަރުގެ ގާބިލް ޕްރިންސިޕަލަކު ނުގެނޭ ކަމަުގެ ޝަކުވާއެވެ. މިކަމަށް އަވަސް ހައްލެއް ބޭނުމެވެ.
އައްޑޫގެ އެންމެ ކުދިން ގިނަ ސްކޫލަށް މި ސްކޫލް ވެފައިވަ އިރު ސްކޫލް ހިންގަން ޕްރިންސިޕަލަކު ނެތުމުން ސްކޫލްގެ އެކި އުމުރު ފުރައިގެ ކުދިންގެ މެދުގައި އަހްލާޤީ މައްސަލަތައް ކުރިމަތި ވަމުން އައުމަކީ ބެލެނިވެރިންގެ އެންމެ ބޮޑު ކަންބޮޑުވުމެވެ.
"ދެ ސްކޫލް އެއްކޮށްލާ ރަނގަޅު ވެރިއައަކު ނެތި އަހަރެމެންގެ ދަރިންނަށް ރަނގަޅު ތަރުބިއްޔަތެއް ދެވޭނީ ކިހިނެއް؟ މީ ވަރަށް ބޮޑު މައްސަލައެއް" ބެލެނިވެރިއަކު ބުންޏެވެ.
އެޑިއުކޭޝަން ޔުނިޓް އުވާލުމަކީ އައްޑޫގެ ތައުލީމާއި ގުޅޭ ހުރިހާ ކަމެއް އުވާލުން ކަމަށް ބެލެނި ވެރިން ތުހުމަތު ކުރެއެވެ.
އައްޑޫ އަންހެނުން ކޮމެޓީގެ ރައީސާ އަދި ހިތަދޫ ސްކޫލްގެ ބެލެނިވެރިއާ ފާތިމަތު ހަނީފާ ވިދާޅުވީ އެޑިއުކޭޝަން ޔުނިޓް އުވާލުމަކީ ވަރަށް ދެރަކަމެއް ކަމަށެވެ.
"ކުރިން އަޅުގަނޑުމެން ނަށް އޮވޭ އެޑިއުކޭޝަން ޔުނިޓަށް އަޅުގަނޑުމެންގެ ކަންބޮޑު ވުން ހުށަހެޅެން. މައްސަލަ ތައް ހައްލު ކުރުމަށް އަޅުގަނޑު މެންނަށް މަޝްވަރާ ކުރެވޭ. ނަމަވެސް ޔުނިޓް އުވާލުމުން އެ ފުރުސަތެއް ނޯންނާނެ". ފާޠުމާ ބުންޏެވެ.
މިނިސްޓްރީ އޮފް އެޑިއުކޭޝަނުން ބުނަނީ ޝަރަފުއްދީން ސްކޫލާއި، ހިތަދޫ ސްކޫލަށް ޕްރިންސިޕަލުން ހޯދުމަށް އިއުލާން ކުރުމުން އެކަމަށް ބަޔަކު ކުރިމަތި ނުލާ ކަމަށެވެ.
މި ދެ ސްކޫލްގައި މާސްޓާސް އަދި ޑިގްރީ ފެންވަރުގެ ބޭފުޅުން އެބަ ތިއްބެވެ. ނަމަވެސް ޕްރިންސިޕަލަކަށް ކުރިމަތި ލާނެ ބަޔަކު ނުވިކަމީ ބެލެނިވެރިންގެ އެންމެ ބޮޑު ކަންބޮޑު ވުމެވެ. މިކަމަށް މިނިސްޓްރީ ލެވެލް އިން ވިސްނަންވެއްޖެއެވެ.
ޕްރިންސިޕަލަކަށް ވަކި މީހަކު ހަމަޖެއްސިފައި ނެތުމާއި އެކު ޒިއްމާ ނަގާނެ ފަރާތެއް މިއިން ސްކޫލަކު ނެތެވެ. ހިތަދޫ ސްކޫލްގައި ދެ އެސިސްޓެންޓް ޕްރިންސިޕަލުން ތިބި އިރު ޝަރަފުއްދީނުގައި ވެސް އެ ލެވެލްގެ ތިން މީހަކު އެބަތިއްބެވެ.
ނަމަވެސް އިސް މީހަކު ނެތުމުން ފުރިހަމަ ޒިންމާ ނަގާނެ ވެރިއަކު ނެތެވެ.
ނަމަވެސް އެޑިއުކޭޝަން މިނިސްޓްރީގެ ސްޓޭޓް މިނިސްޓަރު އިމާދު ސޯލިޙް ވިދާޅުވީ މި އަހަރަކީ އެންމެ މައްސަލަތައް މަދު ދިރާސީ އަހަރަށް ވެގެން ދާނެ ކަމަށެވެ.