އިންޑިއާ ސަރުކާރުގެ އެހީގައި އައްޑޫ އިކްއެޓޯރިއަލް ހޮސްޕިޓަލް (އޭއީއެޗް) ގައި މެންޓަލް ހެލްތު ޔުނިޓެއް ގާއިމްކުރަން ހަމަޖެހިއްޖެ އެވެ.
މިއީ އެ ގައުމުން ރާއްޖޭގެ ހަތް ރަށެއްގައި ހިލޭ އެހީގެ ދަށުން ހިންގަން ހަމަޖެހިފައިވާ 27 މިލިއަން ރުފިޔާގެ މަޝްރޫއުގެ ތެރެއިން ހަދަން ހަމަޖެހިފައިވާ ތަކެވެ.
އައްޑު އަކީ މިހާރު ވެސް އިންޑިއާގެ ސަރުކާރުގެ އެހީގައި ގިނަ މަޝްރޫތަކެއް ހިންގާ ތަނެކެވެ. އެގޮތުން މިދިޔަ މަހު ހުޅުވި ޕޮލިސް ކޮލެޖާއި ހުޅުމީދޫ ޑްރަގް ސެންޓަރު "ވިލުނު" އާއި ހެދުމުގެ މަސައްކަތްތައް ކުރިއަށްދާ ގޭދޮށު މަސް ޕްލާންޓާއި މަގުތައް ހެދުމާއި ބިން ހިއްކުމާއި އިކޯ ޓޫރިޒަމް މަޝްރޫއު ހިމެނެ އެވެ.
ހަތާވީސް މިލިއަން ރުފިޔާގެ މަޝްރޫއުގެ ދަށުން މަޝްރޫއުތައް ހިންގާނީ އައްޑޫގެ އިތުރުން ހދ އާއި ނ އާއި ކ އާއި އދ އާއި ތ އަދި ގއ އަތޮޅު ގަ އެވެ. އެ މަޝްރޫއު ހާއްސަކޮށްފައި ވަނީ ސިއްހީ ހިދުމަތާއި ޒުވާނުން ކުރިއެރުވުމާއި ތަރިކަ ދިރުވައި އާލާކުރުމުގެ ދާއިރާއިންނެވެ.
އެގޮތުން ކުޅުދުއްފުށީ ހޮސްޕިޓަލުގައި އޯޑިއޮލޮޖީ ޔުނިޓެއް ގާއިމްކުރަން ހަމަޖެހިފައިވާ އިރު، ނ. ލަންދޫ މާބުދުގެ އާއި، ތ. ދިޔަމިގިލި ގަނޑުވަރުގައި ސައިޓް މިއުޒިއަމެއް ގާއިމްކުރުމާއި، ނ. މަނަދޫގައި މަލްޓި ސްޕޯޓްސް ކޮމްޕްލެކްސްއެއް ގާއިމްކުރަން ހަމަޖެހިފައިެވ އެވެ. އަދި ހުޅުމާލެ ހޮސްޕިޓަލްގައި ޕްރޮސްތެޓިކްސް އާއި އޯތޮޓިކްސް ފެސިލިޓީއެއް ގާއިމުކުރަން ވެސް ހަމަޖެހިފައިވެ އެވެ.
މީގެ އިތުރުން އދ. ދިއްގަރާއި ގއ. ގެމަނަފުށީގައި ޒުވާނުންގެ މަރުކަޒު ގާއިމްކުރާނެ އެވެ.
އިންޑިއާ އިން ކުރިއަށް ގެންދާ ހައި އިމްޕެކްޓް ކޮމިޔުނިޓީ ޑިވެލޮޕްމަންޓް ޕްރޮޖެކްޓް (އެޗްއައިސީޑީޕީ) އިން ރާއްޖެގައި 20 މަޝްރޫއެއް ވެސް މިހާރު ކުރިއަށްގެންދެ އެވެ.
އެ މަޝްރޫޢުތަކަށް ޖުމްލަ 155 މިލިއަން ރުފިޔާ ކަނޑައަޅާފައިވެ އެވެ.