ކްރިމިނަލް ކޯޓަށް ހުށަހެޅިފައިވާ މައްސަލަތަކަކާ ގުޅިގެން އެ ކޯޓަށް ހާޒިރު ކުރަން ބޭނުންވެ ހާޒިރު ކުރެވިފައި ނުވާ އައްޑޫ ދެ މީހަކު ފުލުހުންގެ ބަންދުގައި ބަހައްޓައިގެން ކޯޓަށް ހާޒިރުކޮށް ދިނުމަށް ފުލުހުންގެ މައްޗަށް ކޯޓުން ކޮށްފައިވާ އަމުރަކާ ގުޅިގެން ފުލުހުން އެމީހުން ހޯދުމަށް މިހާތަނަށް ކުރި މަސައްކަތުން އުޅޭ ވަކި ތަނެއް ނޭނގި ހޯދައި ނުފެނިފައިވާތީ އެ މީހުން ހޯދުމަށް ޢާއްމުކޮށް އިޢުލާންކޮށްފި އެވެ.
ފުލުހުންގެ ބަންދުގައި ބައި ތިއްބައިގެން މާދަމާ ކްރިމިނަލް ކޯޓަށް ޙާޒިރު ކުރުމަށް އެ ކޯޓުން ކޮށްފައިވާ އަމުރުތަކާ ގުޅިގެން ހޯދަމުންދަނީ ސ. މަރަދޫ، މާޖެހިގެ، އިބްރާހީމް ސާމިޢު، 44، އާއި ސ. ހުޅުދޫ، ކުދީނާގެ، އަޙްމަދު ރިޔާޙް، ،28 އެވެ.
ސާމިޢަކީ ކްރިމިނަލް ކޯޓަށް ހުށަހަޅާފައިވާ މަނާ ކުރެވިފައިވާ މަސްތުވާއެއްޗެއް ބޭނުން ކުރުމާއި، ބޭނުން ކުރުމަށްޓަކައި އަތުގައި ބެހެއްޓުމުގެ ކުށުގެ މައްސަލައަކަށް ކޯޓަށް ޙާޒިރު ކުރަން ބޭނުންވެ ޙާޟިރު ކުރެވިފައި ނުވާތީ ފުލުހުންގެ ބަންދުގައި ބަހައްޓައިގެން ކޯޓަށް ހާޒިރުކޮށް ދިނުމަށް ފުލުހުންގެ މައްޗަށް އަމުރު ކުރުމާ ގުޅިގެން ހޯދަމުންދާ މީހެކެވެ.
ރިޔާޙަކީ ކްރިމިނަލް ކޯޓަށް ހުށަހަޅާފައިވާ ޑައިމޯފިން ޓްރެފިކް ކުރުމުގެ ކުށުގެ މައްސަލައަކަށް ޙާޒިރު ކުރަން ބޭނުންވެ ޙާޒިރު ކުރެވިފައި ނުވާތީ ފުލުހުންގެ ބަންދުގައި ބަހައްޓައިގެން ކޯޓަށް ހާޒިރުކޮށް ދިނުމަށް ފުލުހުންގެ މައްޗަށް އަމުރު ކުރުމާ ގުޅިގެން ހޯދަމުންދާ މީހެކެވެ.