މޫނު ފަލަވުމަކީ މީހާގެ ފަލަކަން އިތުރަށް ދައްކާ ކަމެކެވެ. ބައެއް މީހުން ހިކިކޮށް ތިބި ނަމަވެސް މޫނު ބޮޑުކޮށް ފަލަކޮށް ހުރެ އެވެ.
މި ކަމަކީ ރީތިކަމަށް އެޅޭ ހުރަހެއްގެ ގޮތުގައި ގިނަ މީހުން ސިފަކުރާ ކަމެކެވެ. ހާއްސަކޮށް ކޯ ބޮޑުވެ ދަތްދޮޅި ބޮޑުވެފައި ހުރުމަކީ ގިނަ މީހުންގެ ވަރަށް ބޮޑު ކަންބޮޑުވުމެކެވެ.
މޫނުގައި އެ ހުންނަ މަސްތައް ހިއްކާލުމަށް ހަދާނެ ގޮތެއް ބައެއް މީހުންނަކަށް ނޭނގެ އެވެ. އަދި މޫނު ފަލަވެގެން ކަންބޮޑުވިޔަސް އެކަމާ މާ ބޮޑަށް އަޅާލެވޭ ތަނެއް ވެސް ނުފެނެ އެވެ.
* ހަށިގަނޑު ހިއްކާލުން:
ހަށިގަނޑުގެ ވަކި ތަނެއް ހިކިކޮށް ބަހައްޓައި ވަކި ތަނެއް ފަލަކޮށް ބެހެއްޓުމަކީ މާ ފަސޭހަކަމެއް ނޫނެވެ. ވުމާއެކު މޫނު ހިކިކޮށް ބަހައްޓަން ބޭނުންނަމަ އާއްމުކޮށް މީހާގެ ހަށިގަނޑު އެ ހުންނަ ވަރަށް ވުރެ ހިކިވާންޖެހޭނެ އެވެ.
ހަށިގަނޑު ހިކިވުމުން މޫނު ވެސް ހިކޭނެ އެވެ. އެކަމަކު ބައެއް މީހުންނަށް އެހެން ނުވެދާނެ އެވެ. ކުއްލިއަކަށް ހިކުމަކީ އުދަނގޫކަމެއް ކަމަށްވުމުން އެކަމުގައި ކެތްތެރިވާށެވެ.
* މޫނުގެ ކަސްރަތު:
މޫނުގެ ތަފާތު ކަސްރަތުތައް ހުރެ އެވެ. މި ކަސްރަތުތައް ކުރުމުން މޫނުގެ ހަންގަނޑު ރީތިވުމުގެ އިތުރުން މޫނުގެ ބައްޓަން ރީތިވެ އެވެ.
ވުމާއެކު މޫނު ރީތިކޮށް ބެހެއްޓުމަށް ހަށިގަނޑުގެ އެހެން ކަސްރަތުތަކާ އެއްގޮތަށް މޫނުގެ ކަސްރަތުކުރުމަށް ވެސް ހާއްސަ ސަމާލުކަމެއް ދޭށެވެ.
* ކެމަފުލާޖް ކުރުން:
ކެމަފުލާޖްކުރުން މި ތަނުގައި މާނަކޮށްފައި އެވަނީ މޫނުގެ ފަލަކަން ފާޅުނުވާނެ ގޮތަށް ހެދުމަށެވެ. މޫނުގައި ހުންނަ ކަޅު ލައްތަކާއި ބިހިތައް ފޮރުވުމަށް މޭކަޕްކުރާ ގޮތަށް މޭކަޕްގެ އެހީގައި މޫނު ހިކިކަމަށް ވެސް ދައްކުވައި ދެވިދާނެ އެވެ.
ކަސްރަތުގެ އެހީގައި މޫނުގެ މަސްތައް ވިރުވައިނުލެވޭނަމަ ދެން މޫނުގެ ހިކިކަން ދެއްކޭނެ ގޮތަކީ މޭކަޕެވެ.
މޭކަޕްގެ ތެރޭގައި ބޮލުގެ އިސްތަށިގަނޑު ބަހައްޓާ ގޮތް ވެސް ހިމެނެ އެވެ. އެ ގޮތުން މޫނު ފަލަކަމަށް ނުދައްކާ ގޮތަކަށް އިސްތަށިގަނޑު ބެހެއްޓި ދާނެ އެވެ.