(ފެބްރުއަރީ 1، 2014 ގެ ބަޔާ ގުޅޭ)
އައްޑު އަތޮޅަށް ފޮނުއްވި ފުރަތަމަ ވަފުދު
އަލްއުސްތާޒު މައުމޫން އަބްދުލް ގައްޔޫމް ދިވެހި ރާއްޖޭގެ ރައީސްގެ މަގާމާ ހަވާލުވެ ވަޑައިގެންނެވިތާ ހަފުތާއެއްހާ ދުވަހެވެ. ނޮވެމްބަރު 17 ވަނަ ދުވަހު ހެނދުނު އައްޑު އަތޮޅަށް ވަޑައިގެންނެވި ވަފުދަކީ ރައީސުލްޖުމްހުރިއްޔާގެ ފަރާތްޕުޅުން އައްޑު އަތޮޅުގެ ރައްޔިތުންނާ ބައްދަލު ކުރެއްވުމަށް ފޮނުއްވި ހާއްސަ ވަފުދެކެވެ.
މި ވަފުދުގެ އިސް ބޭފުޅުންގެ ގޮތުގައި ތިއްބެވީ ރައީސް މައުމޫންގެ ކޮއްކޯފުޅު މިނިސްޓްރީ އޮފް ޕްރޮވިންޝަލް އެފެއާޒުގެ ނައިބް އަލްއުސްތާޒު އަބްދުﷲ ހަމީދާއި އެ މިނިސްޓްރީގެ ވަކީލް އަލްފާޟިލް އިސްމާއީލް ނަސީރު އެވެ.
މި ބޭފުޅުން އެންމެ ފުރަތަމަ ވަޑައިގެންނެވީ ގަމާ އެންމެ ކައިރީގައިވާ ފޭދުއަށެވެ.
އަލްއުސްތާޒު އަބްދުﷲ ހަމީދުގެ ވާހަކަފުޅުގައި މި ދަތުރަކީ ރާއްޖޭގެ މީހުން އުޅޭ ހުރިހާ ރަށެއްގެ ރައްޔިތުންގެ ހާލު އަހުވާލު ބެއްލެވުމަށް ކުރައްވާ ސިލްސިލާ ދަތުރުފުޅެއް ކަމަށް ވިދާޅުވި އެވެ.
ގަން ބޭކާރުވެފައި އޮތުމުގެ ސަބަބުން އައްޑު އަތޮޅުގެ ރައްޔިތުންނަށް މާލީ ގޮތުން ލިބިފައިވާ ދެރަކަމުގެ މައްޗަށް ވިސްނާވަޑައިގެން އެ މައްސަލަ ވީހާ ވެސް އަވަސް މުއްދަތެއްގެ ތެރޭގައި ހައްލު ކުރެއްވުމަށް މަސައްކަތްޕުޅު ކުރައްވަމުން ގެންދަވާ ކަމަށް ވިދާޅުވި އެވެ. އަދި މި ވާހަކަ އައްޑޫގެ ރައްޔިތުންނަށް ދެންނެވުމުން ރައީސުލްޖުމްހުރިއްޔާ ވިދާޅުވި ކަމަށް އަބްދުﷲ ހަމީދު ވިދާޅުވި އެވެ. އަދި ވަރަށް އަވަސް ފުރުސަތެއްގެ ތެރޭގައި ގަން މިހާރު ހިނގަމުންދާ ގޮތް ނޫން އެހެން ގޮތަކަށް ބަދަލު ކުރެވޭނެ ވާހަކަ ވެސް ވިދާޅުވި އެވެ.
ވީމާ ކެތްތެރިކަމާ އެކު ރައްޔިތުން އެކުވެރިވެ، ދައުލަތާއިގެން ކުރިއަށް ދިއުމަށްޓަކައި ދެކޮޅުވެރިކަމާއި ފިތުނަ ފަސާދަ ނައްތާލައި، އެންމެން އެއްބާރުލުމަށް ނަސޭހަތްތެރިވެލެއްވި އެވެ.
ފޭދޫގެ ބައްދަލުވުން ނިންމަވާ ލެއްވުމަށް ފަހުމި ވަފުދުގެ ބޭފުޅުން ދެން ވަޑައިގެންނެވީ މަރަދޫފޭދު އަށެވެ. އެ ރަށަށް ފަހު މަރަދު އަަށެވެ. މަރަދޫ ބައްދަލުވުން ނިންމަވާފައި ހިތަދު އަށް ވަޑައިގެން އެ ރަށުގެ ރައްޔިތުންނާ ވާހަކަފުޅު ދެއްކެވުމަށް ފަހު، ހިތަދޫގައި ފޭދޫ އަންހެން ކުދިންގެ ވޮލލީ މެޗެއް ބައްލަވާލެއްވި އެވެ. ހުޅުދު އާއި މީދު އަށް ވަޑައިގެންނެވީ ފަހު ދުވަހު ހެނދުނުކޮޅުގެ ވަގުތެއްގަ އެވެ. ހުރިހާ ރަށެއްގައި ވެސް ރައީސުލްޖުމްހުރިއްޔާގެ ވެދުން ދެންނެވުމަށް ފަހު ހަމީދު ދެންނެވީ ހަމަ އެއް ވާހަކައެކެވެ. (ނުނިމޭ)
———————————————————————-
ނޯޓް: މިއީ ފޭދޫ އަލީ ފަހުމީ އަހުމަދު ސެޕްޓެމްބަރު 25، 2013 ގައި ނެރުއްވި "އައްޑޫ ގަން ހިންގުން" މި ފޮތެވެ.
"އައްޑޫ ލައިވް" ގައި މި ފޮތް ސިލްސިލާއެއްގެ ގޮތުގައި ޝާއިއު ކުރަން ހަދިޔާ ކުރެއްވި ކަމަށްޓަކައި، މި ނޫހުގެ ފަރާތުން ފަހުމީ އަށް ހާއްސަ ޝުކުރެއް އަރިސްކުރަމެވެ.
———————————————————————