ރާއްޖޭން ބޭރުން ހުރި މަތީ ތައުލީމުގެ ފުރުސަތުތަކާ ބެހޭ ގޮތުން މައުލޫމާތު ދިނުމަށް ގްލޯނެޓުން ބާއްވާ "ގްލޯނެޓް އެޑިއުކޭޝަން ފެއާ" މި މަހުގެ 24 އަދި 25 ގައި އައްޑޫގައި ބާއްވާ ގޮތަށް ހަމަޖައްސައިފި އެވެ.
ގްލޯނެޓްގެ މެނެޖިން ޑިރެކްޓަރު މުހައްމަދު ނަސީމް ވިދާޅުވީ ދެ ދުވަހުގެ މުއްދަތަށް އައްޑޫގައި ބާއްވާ ފެއާ އޮންނާނީ 24 އަދި 25 ވަނަ ދުވަހުގެ މެންދުރު ފަހު 2:00 އިން ހަވީރު 6:00 އަށް ހިތަދޫ ޝަރަފުއްދީން ސްކޫލްގައި ކަމަށެވެ.
މި ފެެއާގައި މެލޭޝިއާ، ސްރީ ލަންކާ، ނޭޕާލް އަދި އޮސްޓްރޭލިއާގެ ޔުނިވަސިޓީތަކުން ބައިވެރި ވާނެ ކަމަށް އޭނާ ވިދާޅުވި އެވެ.
ނަސީމް ވިދާޅުވީ ޔުނިވަސިޓީތަކުން ލިބެން ހުރި ތައުލީމީ ފުރުސަތުތަކާ ބެހޭ ގޮތުން، ކިޔަވަން ދާމް ބޭނުންވާ ފަރާތްތަކަށް މައުލޫމާތު ދިނުމުގެ އިތުރަށް، ދަރިވަރުންނާއި ޓީޗަރުންނަށް އަމާޒުކޮށްގެން ހާއްސަ ސެޝަންތަކެއް ވެސް ކުރިއަށް ގެންދާ ގޮތަށް ރާވާފައިވާ ކަމަށެވެ.
މިދިޔަ އަހަރު ވެސް ގެލޯނެޓް ފެއާ އައްޑޫގައި ދެ ފަހަރެއްގެ މަތިން ބާއްވާފައިވެ އެވެ. އަދި ފެއާ އަށް ވަރަށް ބޮޑު ތަރުހީބެއް އައްޑޫން ލިބެ އެވެ.