ގިނަ ބަޔަކު ގަބޫލް ކުރާ ގޮތުގައި ބޮލީވުޑްގައި މިހާތަނަށް ނިކުތް އެންމެ އަސަރު ގަދަ ލޯބީގެ ފިލްމް ނުވަތަ އެންމެ ރޮމާންޓިކް ފިލްމަކީ އަދިވެސް ޝާހްރުކް ހާނާއި ކާޖޮލް ލީޑް ރޯލް ކުޅުނު ދިލްވާލޭ ދުލްހަނިޔާ ލޭޖާއޭގޭ (ޑީޑީއެލްޖީ) އެވެ.
އޮކްޓޯބަރު 19، 1995 ގައި ނިކުތް މި ފިލްމަކީ އިންޑިއާގެ ސިނަމާތަކުގައި މެދުކެނޑުމެެއް ނެތި އެންމެ ގިނަ ދުވަސްތަކެއް ވަންދެން ދައްކަމުން އަންނަ ފިލްމު ވެސް މެ އެވެ. އެގޮތުން މުމްބާއީ މަރާތާ މަންދިރު ތިއޭޓަރުގައި ޑީޑީއެލްޖީ ދައްކަމުން އަންނަތާ މިއީ 19 ވަނަ އަހަރެވެ.
މި ފިލްމަކީ ލޯބީގެ ފިލްމުތައް ހެދުމަށް އެފަދަ ދެވަނައެއް ނެތް އަދި ބޮލީވުޑްގައި "ކިންގް އޮފް ރޮމާންސް" ގެ ނަމުން މަޝްހޫރުވި މަރުހޫމް ޔާޝް ޗޯޕްޅާގެ ދަރިފުޅު އަދިތިޔާ ޗޯޕްޅާގެ ފުރަތަމަ ޑައިރެކްޝަން ވެސް މެ އެވެ.
ޑީޑީއެލްޖީ ރިލީޒް ކުރިތާ 19 އަހަރުވީ އިރު ވެސް އެ ފިލްމު ބެލުންތެރިންގެ ހިތްތަކުން ސޮއްސާލައިގެނެއް ނުދެ އެވެ. އެކަން ކަށަވަރުވާ އެއް ކަމަކީ ދާދި ފަހުން އިންޑިއާގެ މަޝްހޫރު ޗެނަލަކުން ކުރި ސާވޭއަކުން ވެސް ދެއްކި ގޮތުގައި ގިނަ ބަޔަކު އަދިވެސް އެންމެ ރޮމާންޓިކް ފިލްމުގެ ގޮތުގައި ޑީޑީއެލްޖީ ލޭބަލް ކުރާތީ އެވެ.
މި ފިލްމުގެ ފަހަތުން އެ ދަރަޖަ ދެން ލިބެނީ ކަރަން ޖޯހަރު 1998 ވަނަ އަހަރު ގެނެސް ދިން އޭނާގެ ފުރަތަމަ ފިލްމް "ކުޗްކުޗް ހޯތާ ހޭ" އަށާއި ސޫރަޖް ބަރްޖަތިއާ 1989 ވަނަ އަހަރު ގެނެސް ދިން އޭނާގެ ފުރަތަމަ ޑައިރެކްޝަން "މޭނާ ފިޔާރު ކިޔާ" އަށެވެ.
ޑީޑީއެލްޖީ އާންމުންގެ ހިތްތަކުން ފިލައިގެން ނުދާ ވަރަށް ގިނަ ސަބަބުތަކެއް އެބަ ހުއްޓެވެ. އޭގެ ތެރޭގައި ފިލްމުގެ ވާހަކައިގައި "އިންޑިއާވަންތަކަން" ހުރެފައި، ފިލްމުގެ ގެނެސް ދީފައިވާ ގޮތް ހިތްގައިމުވުމުގެ އިތުރަށް ޝާހްރުކާއި ކާޖޮލްގެ ކެމިސްޓްރީ ވެސް ވަރުގަދަވުން ހިމެނެ އެވެ.
މީގެ އިތުރުން ޖަތިން-ލަލިތުގެ މިއުޒިކަށް މަރުހޫމް އާނަންދް ބަކްޝީގެ ޅެންތަކަށް އެފަދަ ދެވަނަ އެއް ނެތް ލަތާ މަންގޭޝްކަރާއި އާޝާ ބޯސްލޭ އަދި އުތިދު ނާރަޔަން ފަދަ ފަންނާނުން ކިޔާފައިވާ އަސަރުގަދަ ލަވަތަކާއި ފިލްމުގެ ހިިތްގައިމު މަންޒަރުތަކަކީ ޑީޑީއެލްޖީ ދެކެ އާންމުން ލޯބިވާ ސަބަބުތަކެވެ.
މި ފިލްމް ޝޫޓްކޮށްފައި ވަނީ އިންޑިއާގެ އިތުރުން އިނގިރޭސިވިލާތާއި ފްރާންސްގަ އެވެ. އަދި މީގެ ތެރެއިން ބެލުންތެރިންގެ ސަމާލުކަން ފިލްމުން ހުއްޓޭ އެއް މަންޒަރަކީ ޝާހްރުކާއި ކާޖޮލް ރީނދޫ ކުލައިގެ ބިޔަ މާ ބަގީޗާއެއްގެ ތެރޭގައި ކިޔާ އަސަރުގަދަ ލަވަ އެވެ.
ޑީޑީއެލްޖީ އަށް ފަހު، އަދިތިޔާ ވަނީ އިތުރު ތިން ދެ ފިލްމެއް ވެސް ބެލުންތެރިންނާ ހަމައަށް ގެނެސް ދީފަ އެވެ. އެއީ 2000 ވަނަ އަހަރު ގެނެސް ދިން "މުހައްބަތޭން" އާއި 1998 ގައި ގެނެސް ދިން "ރަބް ނެ ބަނާދީ ޖޯޅީ" އެވެ.
އެކަމަކު މިއިން އެއްވެސް ފިލްމަކަށް ޑީޑީއެލްޖީ އާ ހަމައަކަށް އާދެވޭ ވަރެއް ނުވި އެވެ.