(ފެބްރުއަރީ 16، 2013 ވަނަ ދުވަހުގެ ބަޔާ ގުޅޭ)
ރައީސް އައްޑު އަތޮޅަށް ވަޑައިގެންނެވި ފުރަތަމަ ރަސްމީ ދަތުރުފުޅު
އަލްއުސްތާޒު މައުމޫން އަބްދުލް ގައްޔޫމަށް ރައީސުލްޖުމްހުރިއްޔާގެ މަގާމު ލިބިވަޑައިގެންނެވުމާ އެކު ރާއްޖެތެރޭގެ ނިކަމެތި ރައްޔިތުންގެ ހާލު ބެއްލެވުމަށް އަތޮޅުތަކަށް ދަތުރުފުޅު ކުރައްވަން ފެއްޓެވި އެވެ.
ރައީސް މައުމޫންގެ ބަސްފުޅުން ދަންނަވާ ނަމަ ސަރުކާރާއި ރައްޔިތުންނާ ދެމެދުގައި އޮންނާނީ ވަރަށް ފުން ވަޅުގަނޑެއްކަމުން އެ ފުން ވަޅުގަނޑަށް ފަސް އަޅައި ރައްޔިތުންނާއި ސަރުކާރާ ދެމެދުގައި އިހުލާސްތެރިކަމާ އެކު އިތުބާރުގެ ފާލަމެއް އެޅުއްވުމަށް ފެއްޓެވި މަސައްކަތްޕުޅެވެ. އެއީ މި ދަތުރުފުޅުގެ މަގުސަދެވެ.
ވެރިކަމަށް ހަތަރު މަސް ފުރިގެން އައި އިރު އައްޑު އަތޮޅުގެ ރައްޔިތުން ވަރަށް ބުރަކޮށް މަސައްކަތް ކުރަމުން ދިޔައީ ދާދި އަވަހަށް ރައީސުންޖުންހުރިްޔާ އައްޑު އަތޮޅަށް ރަސްމީ ޒިޔާރަތެއް ކުރައްވަން ހަމަޖެހިފައިވާތީ އެކަމަށް ތައްޔާރުވުމަށެވެ. ރަށުތެރެ ކުނި ކަހައި ސާފުކޮށް، ފެހި ޖަހާފައިވާ މަގު ފާރުތަކުގެ ފެހި ކަހައި ދޮވެ ސާފު ކުރުމަށެވެ.
ގިޑިގެ ހަދައި ޖަލްސާ ހޯލްތައް ޒީނަތްތެރިކޮށް ސްޓޭޖްތައް ހެދި އެވެ. ލަވަ ހަދައި ނެށުމުގެ ފަރި ހަރަކާތްތަކަށް ސްކޫލް ކުދިން ތަމްރީނު ކުރަމުން ދިޔައީ ވަރަށް އަވަދިނެތި އެވެ. އެ މަނިކުފާނުގެ ދަތުރުފުޅަށް އަތޮޅު ތައްޔާރުކޮށްފައިވާލެއް ފުރިހަމަ ކަމާ ބެހޭ ގޮތުން ހިތަދު އަށް ވަޑައިގެން ރައްޔިތުންނާ ބައްދަލު ކުރައްވައި ވިދާޅުވި އެވެ.
"އައްޑު އަތޮޅުގެ ރައްޔިތުން އަޅުގަނޑު މި އަތޮޅަށް މި ކުރާ ޒިޔާރަތަށްޓަކައި ކުރައްވާފައި ހުރި ކަންތައްތައް ފެނުމުން ވަރަށް ބޮޑަށް އަޅުގަނޑަށް އަސަރުކޮށްފި. އަދި އެ މަސައްކަތުގެ ބުރަކަމާއި މަސައްކަތްތަކުގެ ބޮޑުކަމުން އަޅުގަނޑު ވަރަށް ބޮޑަށް ހައިރާން ވެސް ވެއްޖެއިން. ހިތަދޫން ފޭދު އަށް އޮންނަ ނުވަ މޭލުގެ ދިގު މަގުގެ ދެ ފަރާތުގައި ދަނޑި ޖައްސަވައި ދިދަ ނަންގަވާފައިވޭ.
އަދި ހިތަދޫ ފަދަ ބޮޑު ރަށެއްގެ މިހިރަ ބޮޑު މަގުތައް އެއްކޮޅުން އަނެއްކޮޅަށް ދޮންވެލި ލައްވައި މަގުގެ ދެ ފަރާތުގައި ގަސް އިންދަވައި ރޯނު ދަންމަވައ ދިދަ ޖައްސަވައި އަދި އެތައް ސަތޭކަ މަރުހަބާގެ އިބާރާތްތައް ފޮތިތަކުގައި ލިއުއްވައި ދަންމަވައި އަދި މި ނޫން ވެސް މިކަހަލަ އެތައް ކަމެއް ކުރައްވާފައި އެބަހުރި."
މިއީ މުޅި އަތޮޅު އެ މަނިކުފާނުގެ ފުރަތަމަ ރަސްމީ ދަތުރުފުޅަށް ތައްޔާރުވެފައިވާ ގޮތެވެ. އައްޑު އަތޮޅު ރައްޔިތުން އިހުލާސްތެރިކަމާ އެކު ދެންނެވީ ހޫނު މަރުހަބާއެކެވެ. ރައްޔިތުން އެ މަނިކުފާނަށް މަރުހަބާ ދެންނެވީ މާމެލާމެލީގެ ގުސްދަސްތާތަކުންނެވެ. ފިނިފެން މަލުގެ ފިޔަތަކުގެ މަތީގައި ހިންގަވާ ވަޑައިގެން ރައްޔިތުންނާ ސަލާން ކުރައްވައި، ހާލު އަހުވާލް އޮޅުން ފިލުއްވި އެވެ.
ރައީސް މައުމޫން އެންމެ ފުރަތަމަ ވަޑައިގެންނެވީ ފޭދު އަށެވެ. ފޭދޫ ރައްޔިތުންނާ މުހާތަބް ކުރައްވަމުން ފޭދު އާ އެންމެ ކައިރީގައިވާ ގަމުގެ މައްސަލަ ގޮސްފައިވާ ހިސާބު ވަރަށް ތަފުސީލްކޮށް ވިދާޅުވެ ދެއްވި އެވެ.
ގަމުގެ ވާހަކައަކީ އެ މަނިކުފާނުގެ ކިބައިން އައްޑޫ ރައްޔިތުން އޮޅުންފިލުވަން ކެތްމަދުވެފައި ތިބި ވާހަކައެކެވެ. އިނގިރޭސީން ގަމުން ފޭބުމަށް ފަހު، ގަމުގެ ކަންތައްތައް ކުރިއަށް ގެންދެވުމަށް ނިންމަވާފައި ވަނީ ކިހިނެއް ކަމެއް އައްޑޫ މީހުންނަކަށް ނޭނގެ އެވެ. ގަމަކީ އައްޑޫގެ ހިތެވެ. އެ ރަށުން ލިބުނު އެއްޗަކުން މުޅި އަތޮޅުގެ އިގުތިސާދު ދެމެހެއްޓި ވަސީލަތެވެ. ނަމަވެސް އިނގިރޭސީން ފޭބުމަށް ފަހު ގަން ފަޅުވެފައި އޮންނަތާ ތިން އަހަރު ވެއްޖެ އެވެ.
އައްޑޫ މީހުން ވަނީ ދިރިއުޅުމަށް ނުކުޅެދިފަ އެވެ. އަނބިދަރިންނާ ވަކިވެގެން ވަަޒީފާގެ ފުރުސަތު ހޯދަން ދިޔަ މީހުންގެ އާއިލާތައް ވަނީ ނިކަމެތިވެފަ އެވެ. ވަޒީފާތަކަށް ރަށް ދޫކޮށް ދިޔަ ފިރިންގެ ހަބަރެެއްވޭތޯ މާލެ ދަތުރު ކުރާ ބޯޓްފަހަރު ބަނދަރު ޖެހުމުން އަތިރިމައްޗަށް އާއިލާތަކުގެ މީހުން ނިކުމެ އެވެ.
ނަމަވެސް ސިޓީއެއް ނުލިބޭތާ ހަބަރެއް ވެސް ނުވުމުން އަދި ތިމާގެ މީހާ ދެކުނު ވާލެއް ވެސް ނުވުމުން މާޔޫސްކަމާ އެކު އެނބުރި ގެއަށް ދިޔަ ދުވަސްތަކެވެ. މިފަދަ ހާލެއްގައި ރައްޔިތުން ވަނިކޮށް ރާއްޖޭގެ ރައީސުލްޖުމްހުރިއްޔާ ވަޑައިގެން ގަމުގެ މައްސަލާގައި ރައްޔިތުންނަށް މިފަދަ އުންމީދުން ފުރިގެންވާ ޔަގީން ކަމެއް ދެއްވުމުން އެންމެންގެ މޫނުމަތި އުޖާލާވެގެން ދިޔަ އެވެ.
"މިހާރު އައިސްފައިވާ ކަންތައްތައް (މަޝްރޫއުތައް) ތަކުގެ ތެރޭގައި އެމެރިކާ ކުންފުންޏެއްގެ ފަރާތުން ހުށަހަޅާފައިވާ މަޝްރޫއަކާއި އަދި އިނގިރޭސި ބަޔަކު އުފައްދާފައިވާ ކުންފުންޏަކުން ހުށަހަޅާފައިވާ މަޝްރޫއެއް އެބަ އޮތް. އެމެރިކާ ކުންފުންޏަކީ އެއަރޯޓީމް ކިޔާ ކުންފުންޏެއް. އެ މީހުން ހުށަަޅާފައި ވަނީ ގަމުގެ އެއާޕޯޓް ބޭނުން ކުރަން. ރަންވޭ ބޭނުން ކުރަން. އަދި ދިވެހި ރާއްޖެ އާއި ބޭރު ގައުމުތަކާ ދެމެދު ދަތުރު ކުރާނެ މަތިންދާ ބޯޓް ޖައްސާ ތަނަކަށް ހަދައި ގަން އެގޮތަށް އޮޕަރޭޓް ކުރަން. އަދި އޭގެ އިތުރުން އެކަމާ ބެހޭ ހުރިހާ އެހެނިހެން ކަންތައްތައް ވެސް ގަމުގައި އިންތިޒާމުކޮށް ހަމަޖައްސައިގެން ހިންގަމުން ގެންދިއުން. މި ޕްރޮޕޯޒަލަކީ އަޅުގަނޑު ދެކޭ ގޮތުގައި ރަނގަޅު ޕްރޮޕޯސަލެއް. އެހެންވުމާ އެކު އެފަރާތަށް އެންގުނީ އެ މީހުންގެ ބަޔަކު ދިވެހި ރާއްޖެ އަށް އައިސްގެން ސަރުކާރާ ވާހަކަ ދައްކައިގެން އެ މީހުން އެ ހުށަހަޅާ ގޮތަށް ތަފުސީލް ދޭން. މިހާރު އޭގެ ބަޔަކު މި ދޭތެރެއިން އަތުވެއްޖެ. އައިސް ދިވެހި ސަރުކާރާ ކަމާ ބެހޭ ފަރާތްތަކާ ވާހަކަ ދައްކަމުން ގެންގޮސްފި. އޭގެ އިތުރަށް އިނގިރޭސި ކުންފުންޏަކީ އާރިއެންޓް އެކްސްޕްރެސް. އެ މީހުން ވެސް އެބަ އޮތް މަޝްރޫއެއް ހުށަހަޅާފައިި. އެއްގޮތަކުން ބަލާ އިރު އިނގިރޭސި ކުންފުނިން ހުށަހަޅާފައިވާ މަޝްރޫއު މާ ފުޅާ، މާ ތަނަވަސް. އެ މީހުން ހުށަހަޅާފައި ވަނީ ގަން ހަމައެކަނި އެއާޕޯޓެއްގެ ގޮތުގައި ބޭނުން ކުރާކަށް ނޫން. އެއާޕޯޓެއްގެ ގޮތުގައި ބޭނުން ކުރުމުގެ އިތުރަށް ގަމުގައި ޓޫރިސްޓް ކަންތައްތަކެއް ކުރާނެ އިންތިޒާމްތަކެއް ވެސް ހަމަޖެއްސުން އެ މީހުންގެ މަޝްރޫއުގައި ހިމެނިފައިވޭ. އޭގެ އިތުރަށް މަސް ގަތުމާއި މަސް ފިނިކޮށް ރައްކާ ކުރުމާއި މަސްވެރިކަމުގެ މަރުކަޒަކަށް ގަން ހެދުން ވެސް ހިމެނޭ. އަދި މިބާވަތުގެ ވަރަށް ގިނަ ކަންތައްތައް. އަދި ގަމުގައި ތައުލީމް ދޭ ތަނެއް އުފެއްދުން. ގަމުގައި ހޮސްޕިޓަލެެއް އުފެއްދުން. އަދި އައްޑު އަތޮޅުގެ ރައްޔިތުންނަށް ވަޒީފާ ދިނުން، މިބާވަތުގެ ވަރަށް ރަނގަޅު ކަންތައްތަކެއް އެ މީހުންގެ މަޝްރޫއުގައިވޭ."
ވީމާ ސަރުކާރުން މިހާރު އެ މީހުންގެ ހުށަހެޅުން ޕްރޮޕޯޒަލާ އެއްގޮތަށް ހުށަހެޅުމަށް ދަންނަވާފައި ވާނެ ކަމަށް މައުމޫން ވިދާޅުވި އެވެ. އެ ހުށަހަޅާ މަޝްރޫއުތައް ސަރުކާރުން ވާހަކަ ދައްކައިގެން ދެ ފަރާތް އެއްބަސްވާ ގޮތަކަށް ނިންމުމަށް ވެސް ވާހަކަ ދެކެވިފައިވާ ކަމަށް މައުމޫން ވިދާޅުވި އެވެ. އެހެންވެ އިރާދަކުރެއްވިއްޔާ މާ ލަސްތަކެއް ނުވެ، އެގޮތަކުން އައްޑު އަތޮޅުގެ ރައްޔިތުންނަށާއި ދިވެހި ރާއްޖެ އަށް ފައިދާ ކުރާނެ ގޮތަކަށް މިކަން ނިމިގެން ދާނެ ކަމަށް ވިދާޅުވި އެވެ. (ނުނިމޭ)
———————————————————————————-
ނޯޓް: މިއީ ފޭދޫ އަލީ ފަހުމީ އަހުމަދު ސެޕްޓެމްބަރު 25، 2013 ގައި ނެރުއްވި "އައްޑޫ ގަން ހިންގުން" މި ފޮތެވެ.
"އައްޑޫ ލައިވް" ގައި މި ފޮތް ސިލްސިލާއެއްގެ ގޮތުގައި ޝާއިއު ކުރަން ހަދިޔާ ކުރެއްވި ކަމަށްޓަކައި، މި ނޫހުގެ ފަރާތުން ފަހުމީ އަށް ހާއްސަ ޝުކުރެއް އަރިސްކުރަމެވެ.
———————————————————————————–