ރޯދަ ވީއްލަން ދާނެ ތަންތަން ޕްލޭން ކުރުމަކީ މި ފަހުން ވަރަށް ގިނަ ބަޔަކު ކުރާ ކަމެކެވެ. އަނެއްކޮޅުން ރޯދަ މަހާ ދިމާކޮށް ވަރަށް ގިނަ ރެސްޓޯރަންޓްތަކުން އިފުތާރު ޕެކޭޖްތައް ތައާރަފުކުރެ އެވެ. މި ފޯރި ގަދަވެފައި، ވާދަވެރިއޭ ވެސް ބުނެވިދާނެ އެވެ.
އާއިލާ ގިނަ މީހުން އެކީގައި އެެއްތާކަށް ރޯދަ ވިއްލަން ދިއުމާއި ރައްޓެހިން ގްރޫޕް ހަދައިގެންނާއީ އޮފީސްތަކުން ވެސް ރޯދަ ވީއްލުން ފޯރީގައި ބާއްވަ އެވެ. މި ފޯރި ގަދަކަމުން ބައެއް މީހުން ރޯދަ މަހު ގެއިން ރޯދަ ވީއްލާ ދުވަސްތަކަށް ވުރެ، ކޮންމެވެސް ރެސްޓޯރަންޓަކުން ނުވަތަ ގެއިން ބޭރު ކޮންމެވެސް ތާކުން ރޯދަ ވީއްލުން ގިނަ އެވެ.
އައްޑު އަކީ ގިނަ ރެސްޓޯރަންޓްތަކެއް ހިންގާ ތަނަކަށްވުމާ އެކު، އިފުތިތާރުގެ ފޯރިގަނޑު ހަމަ ވަރަށް ގަދަ އެވެ. ގިނަ ތަންތަނުން ރޯދަ މަސް އައުމުގެ މާ ކުރިން ޕެޖޭކްތައް އިއުލާން ވެސް ކުރެ އެވެ. މިކަމަށް އޮންނަ ޑިމާންޑަކީ ވެސް ގިނަ ތަންތަނުން ފާހަގަކުރާ ކަމެކެވެ.
އައްޑޫގެ ބައެއް ރެސްޓޯރަންޓްތަކުން ބުނި ގޮތުގައި ރޯދަ ވީއްލަން ގިނަ ބަޔަކު ބުކިންސް ހަދާ އިރު، ތަރާވީސް ދަމަށް ވެސް ތަންތަނަށް ދާ މީހުން މަދެއް ނޫނެވެ.
ބައެއް އާންމުން ބުނި ގޮތުގައި ގިނަ ބަޔަކު އެއްތާކަށް ޖަމާވެގެން ރޯދަ ވީއްލުމަކީ ވަރަށް ވެސް ހާއްސަ ކަމެކެވެ. އެއީ އާއިލީ ގުޅުމާއި އެކުވެރިންގެ މެދުގައި އޮންނަ ގުޅުން ވެސް ބަދަހިވާ ކަމެކެވެ. އެހެންވީމާ މިއީ ހަމަ ވަރަށް ރަނގަޅު ކަމެއްގެ ގޮތުގައި ބެލިދާނެ އެވެ.
އެކަމަކު ފާހަގަކުރެވޭ ކަމަކީ ރޯދަ މަހު އިސްރާފުގެ ބައި ވެސް ބޮޑުކަމެވެ. އެހެންވެ އެކަމަށް ހާއްސަ ސަމާލުކަމެއް ދިނުން މުހިއްމެވެ. މީގައި މުހިއްމީ ކޮންމެހެން އެންމެ ފެންވަރު ރަނގަޅ ތަނަކަށް ގޮސް، އަގުބޮޑުކޮށް ރޯދަ ވީއްލުމެއް ނޫނެވެ. މުހިއްމު ކަމަކީ އުފާވެރި ވަގުތުކޮޅަކާ އެކު ސިއްހަތަށް ރަނގަޅު އެއްޗެއް ކާލުމެވެ.
ގޭގައި ރޯދަ ވީއްލާ އިރު ވެސް އިސްރާފުނުކުރުމަކީ ހަމަ ވަރަށް މުހިއްމު ކަމެކެވެ. ރޯދަ އަށް ތިބެގެން ލެއްވިހާ ކާ ތަކެތި ތައްޔާރުކޮށްފައި، އޭގެ ތެރެއިން ބޮޑު އުކައިލަން ޖެހޭ ގޮތަށް ކަންކަން ކުރެވޭ ފަހަރު ވެސް އާދެ އެވެ. އެހެންވެ މިއީ ވިސްނާލުން މުހިއްމު ކަމެކެވެ.
ރެސްޓޯރަންޓް ގަދަ ތަންތަނަށް ގޮސްގެން ރޯދަ ވީއްލުމުގެ އިތުރަށް ގެއަށް އާއިލާގެ މީސްމީހުންނަށް އެކި ދުވަސްތަކުގައި ރީދަ ވީއްލަން ދައުވަތު ދީގެން ވެސް މިކަން އުފާވެރިކޮށް ކުރެވިދާނެ އެވެ. މި ފަހުން އައްޑޫގެ ބައެއް ހިސާބުތަކުން ފެންނަ އެއް އާދަ އަކީ އަވައްޓެރިން ޖަމާވެގެގެން ރޯދަ ވީއްލުމެވެ. މިއީ ހަގީގަތުގައި އާލާކުރަން ޖެހޭ އާދައެކެވެ. މީގެ ސަބަބުން އަވައްޓެރިންނާ އޮންނަ ގުޅުން ބަދަހިވާނެ އެވެ.
ދެން އޮތީ މިސްކިތްތަކަށް ގޮސް ރޯދަ ވީއްލުމުގެ ވާހަކަ އެވެ. މިއީ ފިރިހެނުންނަށް ހާއްސަވެފައި އޮތް ކަމެކެވެ. ރާއްޖޭގައި އަބަދު ވެސް މިސްކިތްތަކުގައި ރޯދަ ވީއްލުމުގެ އިންތިޒާމު ހަމަޖެހިފައި ހުރެ އެވެ. އެހެންވެ މީގެ ބޭނުން ވެސް ހިފުމަކީ މުހިއްމު ކަމަކަށް ވާނެ އެވެ. އެކަމަކު މިސްކިތްތަކުން ރޯދަ ވީއްލާ މީހުންގެ ތެރޭގައި ގިނައީ ބިދޭސީންނާއި އުމުރުން ދުވަސްވީ މީހުންނެވެ.
ރޯދަ މަހަކީ އަޅުކަމުގެ މަހަކަށްވާތީ މި މަހުގެ އާދަކާތައް ބަހައްޓަން ވާނީ ދީނުގެ މިންގަނޑުތަކާއި ހަމަތަކުގެ ތެރޭގަ އެވެ.