ރާއްޖޭގެ ކުރެހުންތެރިއެއް ކަމަށްވާ ސަލީ ޝިމްހާގްގެ ޑިޖިޓަލް ކުރެހުމެއް އެމެރިކާގެ މިއުޒިޝަނެއް ކަމަށްވާ އާރޮން ކާޓާ މީގެ ތިން އަހަރު ކުރިން ވަގަށް ނަގައި ބޭނުންކުރި މައްސަލާގައި އޭނާގެ މައްޗަށް ކުރި ދައުވާ ޝިމްހާގަށް ކާމިޔާބުވެއްޖެ އެވެ.
އެމެރިކާގެ ނިއު ޔޯކްގެ ލޯ ފާމެއް ކަމަށްވާ ލީބޯވިޒް މެދުވެރިކޮށް އާރޮންގެ މައްޗަށް ދައުވާކުރަން އެތަނުގެ ކޯޓަކަށް ހުށަހެޅީ މެއި 5، 2020 ގަ އެވެ. އެ ކުރެހުން ވަގަށް ނެގި މައްސަލާގައި ޝިމްހާގު ވަކީލުންގެ ގޮތުގައި މަސައްކަތްކުރެއްވީ ހަމްޒާ ޚަލީލާއި އައިޝަތު ޝައިފާ ޝާހިދެވެ.
My case against Aaron Carter has been officially filed in the US and my legal team @liebowitzlaw @HamzaKhalyl @ShaiShahid will be pursuing action against him. No artist should have to back down if their work is being misused by someone else. (1/2) pic.twitter.com/4s0Zj6AwFU
— Shimhaq (@shimhaq) May 10, 2020
އާރޮން އަށް ކުރި ދައުވާ ޝިމްހާގަށް ކާމިޔާބުވެ، އޭނަގެ ފިކުރީ މުދަލަކަށް އަރައިގަތް މައްސަލަ އާރޮންގެ މައްޗަށް ސާބިތުވުމުން ޝިމްހާގަށް ވަނީ ބަދަލެއްގެ ގޮތުގައި ފައިސާ ވެސް ލިބިފަ އެވެ. އެކަން އޭނާ ކަށަވަރުކޮށް ދިން ނަމަވެސް ފައިސާ ލިބުނު އަދަދެއް ހާމައެއްނުކުރެ އެވެ. ގެއްލުމުގެ ބަދަލަށް ލިބުނު ފައިސާގެ އިތުރުން އާރޮންގެ އަތުން ވަނީ ޝިމްހާގުގެ ވަކީލުންގެ ފީ ވެސް ނަގައި ދީފަ އެވެ.
ދައުވާ ކާމިޔާބުވުމާ ގުޅިގެން ޝިމްހާގް ވަނީ ވަކީލުންނަށާއި ސޯޝަލް މީޑިއާގައި އޭނަ އަށް ހިތްވަރު ދިން އެންމެންނަށް ވެސް ވަރަށް ބޮޑަށް ޝުކުރު އަދާކޮށްފަ އެވެ.
Thankyou so much @ShaiShahid and @HamzaKhalyl for sticking through with me and taking care of everything. You weren't just my lawyers, you gave me hope even when I felt down sometimes. I cant appreciate you guys enough ♥️
— Shimhaq (@shimhaq) April 17, 2022
ސިންގާއެއްގެ މޫނު ސިފަކޮށްދޭ ގޮތަށް ޝިމްހާގް އޭނަގެ ސޯޝަލް މީޑިއާ އެކައުންޓްތަކުގައި އާންމުކުރި ކުރެހުން އާރޮން ވަގަށް ނަގައި، އޭނަގެ އެކިއެކި ޕްލެޓްފޯމްތަކުގައި އެ ބޭނުންކޮށްފައިވެ އެވެ. އެކަން ޝިމްހާގްގެ ސަމާލު ކަމަށް އައިސް ވާހަކަ ޓްވިޓާގައި ހިއްސާކޮށް، އެތައް ބަޔަކު އާރޮން ޓެގްކޮށް އެއްޗެހި ކިޔައި "ވަގަށް ގޮވަން" ފެށުމުން އޭނާ ފަހުން އެ ޑިލީޓްކުރި އެވެ.
Thankyou so much @ShaiShahid and @HamzaKhalyl for sticking through with me and taking care of everything. You weren't just my lawyers, you gave me hope even when I felt down sometimes. I cant appreciate you guys enough ♥️
— Shimhaq (@shimhaq) April 17, 2022
އައްޑޫ ފޭދު އަށް ނިސްބަތްވާ ޝިމްހާގް ބުނި ގޮތުގައި އެ މައްސަލާގައި ދައުވާކުރަން ބޭނުންވީ ރާއްޖޭގެ އާޓިސްޓުންގެ ހައްގުތައް ހިމާޔަތްކޮށްދީ، ރައްކާތެރިކަން ކަށަވަރުކޮށް ދިނުމުގެ ގޮތުންނެވެ. އަދި އެކަން ކާމިޔާބުވުމަކީ ރާއްޖޭގެ ފަންނުވެރިންނަށް ލިބުނު ކާމިޔާބީއެއްގެ ގޮތުގައި ވަކީލުން ވެސް ފާހަގަކުރެއްވި އެވެ.
އާރޮންގެ މައްޗަށް ޝިމްހާގް ކުރި ދައުވާ އަކީ ރާއްޖޭން ބޭރުގެ ކޯޓެއްގައި ކުރި މިފަދަ ދައުވާއެއް ކާމިޔާބުވި ފުރަތަމަ ފަހަރު ވެސް މެ އެވެ.