ރާއްޖޭގެ ތިން ސަރަހައްދެއްގެ ހޮސްޕިޓަލްތަކުގައި ތިން މަޝްރޫއެއް ހިންގުމަށް އިންޑިއާ ސަރުކާރުގެ ހިލޭ އެހީދިނުމުގެ އެއްބަސްވުމުގައި ސޮއިކޮށްފިއެވެ.
ރާއްޖޭގެ ސިއްހީ ދާއިރާ އިތުރަށް ހަރުދަނާކޮށް، ރާއްޖޭގެ ތިން ސަރަހައްދެއްގެ ހޮސްޕިޓަލްތަކުގައި ތިން މަޝްރޫއެއް ހިންގުމަށް އިންޑިއާ ސަރުކާރުގެ ހިލޭ އެހީދިނުމުގެ އެއްބަސްވުމުގައި މިއަދު ސޮއިކޮށްފައިވާއިރު މި އެއްބަސްވުންތަކުގައި ދިވެހި ސަރުކާރުގެ ފަރާތުން ސޮއިކުރެއްވީ ފޮރިން މިނިސްޓަރު އަބްދުﷲ ޝާހިދެވެ. އަދި އިންޑިއާ ސަރުކާރުގެ ފަރާތުން ސޮއިކުރެއްވީ އިންޑިއާއިން ދިވެހިރާއްޖެއަށް ކަނޑައަޅާފައި ހުންނަވާ ސަފީރު މުނޫ މަހާވަރެވެ.
މިއަދު ސޮއިކުރެވުނު 3 އެއްބަސްވުމަކީ ކުޅުދުއްފުށީ ހޮސްޕިޓަލްގައި ސްޕީޗް ތެރަޕީ ޔުނިޓެއް ޤާއިމްކުރުމަށާއި، ހުޅުމާލޭ ހޮސްޕިޓަލްގައި ޕްރޮސްތެޓިކްސް އަދި އޯތޮޓިކްސް މެނުފެކްޗަރކުރުމަށް ވޯކްޝޮޕެއް ޤާއިމްކުރުމަށާއި އަދި އައްޑޫ އިކުއެޓޯރިއަލް ހޮސްޕިޓަލްގައި މެންޓަލް ހެލްތު ސެންޓަރެއް ޤާއިމްކުރުމަށް، އިންޑިއާ ސަރުކާރުން ހިލޭ އެހީދިނުމުގެ އެއްބަސްވުންތަކެވެ.
މި ޕްރޮޖެކްޓްގެ ދަށުން އައްޑޫ އިކުއެޓޯރިއަލް ހޮސްޕިޓަލްގައި ޤާއިންކުރާ މެންޓަލް ހެލްތު ސެންޓަރ ޤާއިމްކުރުމަށް 665،000ރ ގެ ހިލޭ އެހީ އިންޑިއާއިން ފޯރުކޮށްދޭނެއެވެ.
އަދި އެންމެ ޒަމާނީ ފެންވަރުގެ ސްޕީޗް ތެރަޕީ ޔުނިޓެއް ހދ. ކުޅުދުއްފުށީ ހޮސްޕިޓަލްގައި ޤާއިމް ކުރެވޭނެއެވެ. އެގޮތުން ސައުންޑް ޕްރޫފް ސްޓޭޝަނަކާއެކު އޯޑިއޯމެޓްރީ ސެޓަޕެއް ޤާއިމްކޮށް، އެތަނަށް ބޭނުންވާ ކޮމްޕިއުޓަރ ސިސްޓަމްތައް ބަހައްޓައި، ޔުނިޓްގެ އުމްރާނީ މަސައްކަތްތައް ކުރެވޭނެއެވެ. މި ޕްރޮޖެކްޓަށް އިންޑިއާ ސަރުކާރުން 9 ލައްކަ ރުފިޔާގެ ހިލޭ އެހީ ދޭނެއެވެ.
ހުޅުމާލޭ ހޮސްޕިޓަލްގައި ޕްރޮސްތެޓިކްސް އަދި އޯތޮޓިކްސް މެނުފެކްޗަރކުރުމަށް ވޯކްޝޮޕެއް ޤާއިމްކުރުމަށް ސޮއިކުރެވުނު އެއްބަސްވުމުގެ ދަށުން އިންޑިއާ ސަރުކާރުން ފޯރުކޮށްދޭ 1.99 މިލިއަން ރުފިޔާގެ ހިލޭ އެހީގައި ޕްރޮސްތެޓިކްސް އަދި އޯތޮޓިކްސް މެނުފެކްޗަރިންގ ވޯކްޝޮޕް ޤާއިމްކޮށް، އެތަނަށް ބޭނުންވާ މެޝިނަރީޒްއާއި މެޓީރިއަލް ހޯދައި، އެ ވޯކްޝޮޕް ހިންގަން ބޭނުންވާ މުވައްޒަފުން ތަމްރީން ކުރެވޭނެއެވެ.
މި ޕްރޮޖެކްޓްތަކަކީ އިންޑިއާ ސަރުކާރުގެ ހައި އިމްޕެކްޓް ކޮމިއުނިޓީ ޑިވެލޮޕްމަންޓް ޕްރޮޖެކްޓްސް ސްކީމްގެ ދަށުން، ހިލޭ އެހީގެ ދަށުން ހިންގާ ޕްރޮޖެކްޓްތަކެކެވެ.