ކުރިއަށް އޮތް ރައްޔިތުންގެ މަޖިލީހުގެ އިންތިހާބުގައި ފޭދޫ ދާއިރާއަށް ކުރިމަތިލުމަށް އެމްޑީޕީގެ ޓިކެޓް ޕްރައިމެރީ ކާމިޔާބުކޮށް ލިބުނު މުހައްމަދު ނިހާދުގެ ކެންޑިޑެސީ ބާތިލުކޮށް ދިނުމަށް އެދި، ޕްރައިމަރީގައި ނާކާމިޔާބުވި ފޭދޫ ދާއިރާގެ މެމްބަރު އަލްހާން ފަހްމީ ހައި ކޯޓަށް ހުށަހަޅައިފި އެވެ.
ޕްރައިމަރީގައި ނާކާމިޔާބު ވުމުން އަމިއްލަ ގޮތުން އެ އިންތިހާބަށް ވާދަކުރައްވާ އަލްހާނަށް ދާދި ފަހުން ދިން ވަޅީގަ ހަމަލާއެއްގައި ލިބުނު ގެއްލުންތަކަށް ފަރުވާ ހޯއްދަވަން ލަންކާގެ ހޮސްޕިޓަލެއްގައި އޮވެ ވިދާޅުވީ ޕްރައިމަރީގެ ނަތީޖާ އާއި ނިހާދުގެ ކެންޑިޑެސީ ބާތިލު ކުރަން ހުށަހަޅަނީ އެމްޑީޕީގެ ޕްރައިމަރީ ސައްހަ ނޫން ކަމަށް ގަބޫލުކުރެއްވޭތީ ކަމަށެވެ. އަދި އެ މައްސަލަ އެމްޑީޕީގެ އެތެރޭގެ ގުނަންތަކުން އެކަށީގެންވާ ގޮތެއްގައި ބަލާފައި ނުވާ ކަމަށް ބުނެ އެވެ.
އެހެން ނަމަވެސް އެމްޑީޕީން ވަނީ އެ މައްސަލަ ކުރިން ބަލައި، ޕްރައިމެރީގެ ނަތީޖާ އަށް ބަދަލު އަންނަ ވަރިުގެ ކަމެއް ހިނގާފައި ނެތް ކަމަށް ބުނެފަ އެވެ.
އެކަމަކު އަލްހާން ވިދާޅުވަމުން ގެންދަވަނީ ގަބޫލު ނުކުރައްވާ ކަމަށާއި އިންތިހާބުގައި އެހެން ޕާޓީތަކުގެ 130 މީހަކު ވޯޓުލާފައިވާ ކަމަށެވެ. އަދި ވޯޓު ލިސްޓްގައި ވެސް މައްސަލަތައް އުޅޭ ކަމަށް ވިދާޅުވި އެވެ.
ފޭދޫ ދާއިރާގެ ޕްރައިމަރީ، ނިހާދު ކާމިޔާބު ކުރީ 316 ވޯޓާ އެކުގަ އެވެ. އަލްހާނަށް ލިބިވަޑައިގަތީ 154 ވޯޓެވެ.
ނިހާދު މިހާރު ގެންދަވަނީ ފޭދޫގައި ވަރަށް ފޯރިއާ އެކު ކެމްޕޭން ކުރައްވަމުންނެވެ.