އައްޑޫގައި މިހާރު ކުރިއަށްދާ ހަތަރު ވަނަ "ސްނިކާސް ސްޓްރީޓް ސޮކާ 2014" މުބާރާތުގެ ސެމީ އަށް ދިޔަ ޓީމްތައް ކަށަވަރުވެއްޖެ އެވެ.
ސެމީ އަށް ދިޔަ ޓީމްތައް ކަށަވަރުވީ ރޭ ކުޅުނު ކުއާޓާ ފައިނަލްގެ ހަތަރު މެޗާ އެކުގަ އެވެ.
އެގޮތުން ރޭ މަލްޓި ޖީނިއަސް އާއި މެޖެންޓާ ބައްދަލު ކުރި މެޗް މެޖެންޓާ ކާމިޔާބް ކުރީ 1-0 އިންނެވެ. މި މެޗްގެ މޮޅު ކުޅުންތެރިއަކީ މެޖެންޓާގެ ރާއީދު ޒާހިރެވެ.
ވްރެންޑް އެފްސީ އާއި ހަބޭސް ބައްދަލު ކުރި މެޗް 1-0 އިން ކާމިޔާބް ކުރީ ވްރެންޑް އެފްސީ އެވެ. މި މެޗްގެ މޮޅު ކުޅުންތެރިއަކީ ވްރެންޑްގެ މުހައްމަދު ޝިފާހު އެވެ.
އަދި ރޭ ކުޅުުނު ތިން ވަނަ މެޗްގައި ފްރެންޑްސް ކުލަބާއި ޔަންގް މެޖެންޓާ ބައްދަލުކޮށް 3-0 އިން ކާމިޔާބް ކުރީ ފްރެންޑްސް ކުލަބެވެ. މި މެޗްގެ މޮޅު ކުޅުންތެރިއަކީ ހުޒައިފަތު ރަޝީދެވެ.
ރޭ ކުޅުނު ހަތަރު ވަނަ މެޗް ޝަންގްރިއްލާ ޔުނައިޓެޑާއި އެފްސީ ގަބީލާ ބައްދަލުކޮށް 2-0 އިން ކާމިޔާބް ކުރީ ޝަންގްރިއްލާ އެވެ. މި މެޗްގެ މޮޅު ކުޅުންތެރިއަކީ ޝަންގްރިއްލާގެ އިބްރާހީމް ޖަހާނެވެ.
މި ނަތީޖާތަކާ އެކު ފައިނަލްގެ ފުރަތަމަ ޖާގަ ކަށަވަރު ކުރަން ކުޅޭ ފުރަތަމަ ސެމީ ފައިނަލް މެޗްގައި ބައްދަލު ކުރާނީ މެޖެންޓާއި ވްރެންޑް އެފްސީ އެވެ. ދެވަނަ މެޗްގައި ވާދަ ކުރާނީ ފްރެންޑްސް ކުލަބާއި ޝަންގްރިއްލާ އެވެ.
ޖުމްލަ 20 ޓީމް ވާދަ ކުރާ "ސްނިކާސް ސްޓްރީޓް ސޮކާ 2014" ގެ ފައިނަލް މެޗް އޮންނާނީ މި މަހުގެ 22 ވަނަ ދުވަހުގެ ރެ އެވެ.
ޗެމްޕިއަން ޓީމަށް 35،000ރ. ލިބޭ އިރު ރަނައަޕް ޓީމަށް 10،000ރ. ލިބޭނެ އެވެ.