އައްޑޫގައި ހެދުމަށް ނިންމާފައިވާ އިސްލާމީ މަރުކަޒުގެ މަސައްކަތް ނިންމައި އަންނަ އަހަރު ހުޅުވާނެ ކަމަށް އައްޑޫ ކައުންސިލުން ބުނެފި އެވެ.
ހިތަދޫ ކޮރޮވަލު ދާއިރާގެ ކައުންސިލަރު އިބްރާހިމް ޝިނާޒު މޫސާ ވިދާޅުވީ އިސްލާމީ މަރުކަޒު އަޅަން ކައުންސިލުން ބިން ކަނޑައަޅައި މިހާރު ކުރިއަށްދަނީ ޑިޒައިންގެ މަސައްކަތް ކަމަށެވެ. އަދި ޖޫން މަހު ކުރީކޮޅު މި މަސައްކަތް ޓެންޑަރ ކުރެވި، އަންނަ އަހަރުގެ ފަހުކޮޅަށް މި މަސައްކަތް ނިންމާލެވޭނެ ކަމަށް ޝިނާޒު ވިދާޅުވި އެވެ.
އައްޑޫގައި އިސްލާމިކް ސެންޓަރެއް ހަދާ ވާހަކަ އެންމެ ފުރަތަމަ ދެކެވުނީ ކުރީގެ ރައީސް މުހައްމަދު ނަޝީދުގެ ވެރިކަމުގަ އެވެ. އޭގެ ފަހުން ކުރީގެ ރައީސް އަބްދުﷲ ޔާމީންގެ ވެރިކަމުގައި އަދި ރައީސް އިބްރާހިމް މުހައްމަދު ސޯލިހު ވެސް މި ވައުދުވެވަޑައިގެންފައިވެ އެވެ.
އެގޮތުން 2019 ގައި އައްޑު އަށް ކުރެއްވި ދަތުރުގައި އެ އަހަރުގެ މާޗް 8 ވަނަ ދުވަހުގެ ރޭ މަރަދޫގައި ބޭއްވި ޖަލްސާއެއްގައި ރައީސް ސޯލިހު ވިދާޅުވީ މި ސަރުކާރުން އައްޑޫގައި އިސްލާމީ މަރުކަޒެއް ބިނާކުރާނެ ކަމަށެވެ.
ރައީސް ސޯލިހު އޭރު ވިދާޅުވި ގޮތުގައި އިސްލާމް ދީނުގެ ސައްހަ އަގީދާ ދިރުވައި، ރައްޔިތުންގެ ހިތުގައި އިސްލާމީ ރިވެތި ސިފަތަށް އަށަގެންނެވުމަށް އައްޑޫގައި އިސްލާމިކް ސެންޓަރެއް ގާއިމުކުރުމަކީ ސަރުކާރުގެ ވައުދެކެވެ. އެގޮތުން އެއްފަހަރާ 2000 މީހުންނަށް ނަމާދުކުރެވޭނެ އިސްލާމީ މަރުކަޒެއް ބިނާކުރައްވާނެ ކަމަށް ވިދާޅުވި އެވެ.