ހިތަދޫ ރީޖަނަލް ހޮސްޕިޓަލް (އެޗްއާރްއެޗް) ގެ ތިއޭޓަރު ބޮޑު ކުރަން ނިންމާފައިވާ ކަމަށް އެ ހޮސްޕިޓަލުން ބުނެފި އެވެ.
ހޮސްޕިޓަލް ހިންގެވުމާ ހަވާލުވެ ހުންނެވި ހަދީޖާ ހަފްސާ މިއަދު ވިދާޅުވީ އެ މަސައްކަތާ ގުޅޭ ގޮތުން ހެލްތު މިނިސްޓްރީގެ ޓީމެއް މާދަމާ އައްޑު އަށް އަންނަ ގޮތަށް ވެސް ހަމަޖެހިފައިވާ ކަމަށެވެ.
"މިހާރު ހުރި ތިއޭޓަރުގެ ޖާގަ ކުޑަވުމާ އެކު، ސާޖަރީ ފަދަ ކަންކަން ކުރަން ދަތިވުމާ ގުޅިގެން، ބޮޑު ތިއޭޓަރެއް ހަދަން ނިންމާފައި ވަނީ،" ހަފްސާ ވިދާޅުވި އެވެ.
އޭނާ ވިދާޅުވީ ތިއޭޓަރު ބޮޑު ކުރަން ބަލާ އިރު، އެޗްއާރްއެޗްގައި މިހާރު އެކަމަށް ޖާގައެއް ނެތް ކަމަށެވެ.
"އެހެންވެ ތިއޭޓަރު ހަދާނެ ސަރަހައްދެއް ބެލުމާއި އެކަމާ ގުޅޭ ކަންކަން ބެލުމަށް މިނިސްޓްރީގެ ޓީމެއް މާދަމާ އައްޑު އަށް އަަންނާނެ،" ހަފުސާ ވިދާޅުވި އެވެ.
އައްޑޫގައި ވަނީ 100 އެނދުގެ ހޮސްޕިޓަލެއް ވެސް އަޅަން ނިންމައިފަ އެވެ. އެހެން ނަމަވެސް އެކަން ނުފެށި ދިގުލާތީ ހޮސްޕިޓަލްގެ މުވައްޒަފުން ވެސް ކަންބޮޑުވެ އެވެ.
ބައެއް މުވައްޒަފުން ބުނި ގޮތުގައި ކުރިން އުންމީދުކޮށްގެން ތިބީ އާ ސަރުކާރުގެ 100 ދުވަހުގެ ތެރޭގައި 100 އެނދުގެ ހޮސްޕިޓަލްގެ ބިންގާ ވެސް އެޅޭނެ ކަމަށެވެ.
އެހެން ނަމަވެސް ރައީސް އަބްދުﷲ ޔާމީންގެ ސަރުކާރަށް މާދަމާ 100 ދުވަސް ހަމަވާ އިރު، އެކަން ކުރެވިފައެއް ނެތެވެ.