ބޭރުގެ ޔުނިވަސިޓީތަކުން ލިބެން ހުރި މަތީ ތައުލީމުގެ ފުރުސަތުތައް އަންގައި ދޭން ބާއްވާ ގްލޯނެޓް އެޑިއުކޭޝަން ފެއާ މިއަދު އައްޑޫގައި އޮންނާނެ އެވެ.
ހިތަދޫ ޝަރަފުއްދީން ސްކޫލުގައި ފެއާ ފަށާނީ މެންދުރު ފަހު 2:00 ޖަހާ އިރު އެވެ. ފެއާ ކުރިއަށް ދާނީ ހަވީރު 6:00 އަށެވެ.
ގްލޯނެޓްގެ މެނެޖިން ޑިރެކްޓަރު މުހައްމަދު ނަސީމް ވިދާޅުވީ އައްޑޫގައި ކުރިއަށް ގެންދާ ފެއާގައި ބޭރުގެ އަށް ޔުނިވަސިޓީއަކުން ބައިވެރިވެ، އެތަންތަނުން ލިބެން ހުރި ކޯސްތަކާ ބެހޭ މައުލޫމާތު ވަރަށް ފުޅާކޮށް ދޭނެ ކަމަށެވެ. އަދި ކޯސްތަކަށް އެޕްލައި ކުރަން ބޭނުންވާ ކުދިންނަށް، ބޭނުންވާ ޔުނިވަސިޓީއަކަށް ރަޖިސްޓްރީ ވެސް މިއަދު ކުރެވޭނެ އެވެ.
މިއަދު މެންދުރު ފަހު ފެއާ ފެށި ނަމަވެސް، ގްލޯނެޓްގެ ހަރަކާތްތައް ހެނދުނު 9:00 އިން ފެށިގެން ކުރިއަށް ދާނެ އެވެ.
އެގޮތުން ޓީޗަރުންނަށް އަމާޒުކޮށްގެން ޓްރޭނިން ސެޝަނަކާއި ދަރިވަރުންނަށް ކެރިއާ ގައިޑެންސް ސެޝަނެއް ޝަރަފުއްދީން ސްކޫލުގައި ކުރިއަށް ގެންދާ ގޮތަށް ގްލޯނެޓުން ވަނީ ނިންމައިފަ އެވެ.