(ފެބްރުއަރީ 23، 2014 ވަނަ ދުވަހުގެ ބަޔާ ގުޅޭ)
އެސްޓީއޯ ވިޔަފާރީގެ ފެށުން
ގަމުގައި އެސްޓީއޯގެ އޮފީހެއް ހުޅުވުނީ ސެޕްޓެމްބަރު 29، 1981 ގަ އެވެ.
އެ ދުވަސްވަރަކީ ހޮންކޮންގުގެ ދެ ކުންފުންޏަކުން އެސްޓީއޯ އާ ގުޅިގެން އުފެއްދި ޖޮއިންޓް ވެންޗަ ކުންފުނިން ގަމުގައި ގާމަންޓް ފެކްޓްރީއެއް ހުޅުވި ދުވަސްވަރެވެ. މި ފެކްޓްރީގެ މެނޭޖްމަންޓް ބެލެހެއްޓީ އެސްޓީއޯ އިންނެވެ. އަދި ހަމަ އެހެންމެ އައްޑު އަތޮޅު ހިތަދު އާއި ފޭދޫގައި އެސްޓީއޯގެ ފިހާރަތައް ހުޅުވައި ގަމަށާއި ފެކްޓްރީގެ ކަންކަމަށް އަދި އާންމުންނަށް ތެޔޮ ވިއްކުމުގެ ވިޔަފާރި ވެސް ފެށީ އެ ދުވަސްވަރު އެވެ.
ގަމުގައި އެސްޓީއޯ އިން މިފަދަ ވިޔަފާރިއެއް ފަށައި ގަތުމަށް ބޭނުންވާނޭ ގިނަ ވަސީލަތްތައް ހުރީ ގާއިމު ކުރެވިފަ އެވެ. ގަމުގައި އިނގިރޭސީންގެ ދުވަސްވަރު ބޭނުން ކުރި ތަންތަނެވެ. ގުދަން ކުރެވޭނެ ބޮޑެތި އިމާރާތްތަކެވެ. ތެޔޮ ރައްކާ ކުރާނޭ ބޮޑެތި ޓޭންކްތައް ފިއުލް ފާމްގައި ހުއްޓެވެ. ތެޔޮ ލޯޑިން ކުރާނޭ އެކަމަށް ހާއްސަ ފާލަމެއް އޮވެ އެވެ.
މި ފާލަމާއި ތެޔޮ ޓޭންކްތައް ހުންނަ ސަރަހައްދާ ދެމެދު އަޅާފައިވާ ތެޔޮ ހޮޅިތައް ވެސް ހުރީ ބޭނުން ކުރެވޭ ރަނގަޅު ހާލަތުގަ އެވެ.
ބޮޑެތި ބޯޓް ފަހަރަށް ކައިރިކޮށްގެން މުދާ ބޭލޭ ގެ ފާލަމެއް އޮތެވެ. މިފަދަ ބޮޑު އެސެޓެއް ހިލޭ ލިބިފައި ވިޔަސް އެސްޓީއޯއަކަށް އައްޑު އަތޮޅުގައި ވިޔަފާރި ފުޅާ ކުރާކަށް އެ ދުވަސްވަރު މާކެޓެއް ނެތެވެ. ވަޒީފާގެ ފުރުސަތެއް ނެތެވެ. ފައިސާގެ ވަސީލަތެއް ނެތެވެ.
ނަމަވެސް މާ ގިނަަ އަހަރުތަކެއް ފާއިތުވެ ނުދަނީސް ގަމުގައި އިތުރު ގާމެންޓް ފެކްޓްރީތައް ފެށި، ވަޒީފާގެ އިތުރު ފުރުސަތުތައް ހުޅުވިގެން ދިއުމާ ގުޅިގެން އެސްޓީއޯގެ ވިޔަފާރި ވެސް ފުޅާ ކުރަން ފުރުސަތު ހުޅުވިގެން ދިޔަ އެވެ. ނަމަވެސް އެ ދުވަސްވަރަކީ ސިޔާސީ ކޯޅުމުގެ ތެރޭގައި އައްޑު އަށް އެސްޓީއޯގެ ވިޔަފާރި ގެންނެވި އިލްޔާސް ބަލިވެ، އެޓޮލްސް މިނިސްޓަރު ހަމީދު ގަދަވެގެން އިލްޔާސަށް ބަލި ގަބޫލް ކުރައްވަން ޖެހިވަޑައިގަތް ދުވަސްވަރެވެ. އައްޑު އަތޮޅާއި އެސްޓީއޯ އާ ވެސް ދުރަށް ދުރަށް ޖެހިވަޑައިގަންނަވަން ޖެހުނު ދުވަސްވަރެވެ.
އޭގެ ފަހުން ޓްރޭޑް މިނިސްޓަރުކަމާއި އެސްޓީއޯގެ ޗެއާމަންކަން ލިބިވަޑައިގެންނެވީ މަޝްހޫރު އިކޮނޮމިސްޓް އަބްދުﷲ ޔާމީން އަބްދުލް ގައްޔޫމަށެވެ.
އެއީ އެޓޮލްސް މިނިސްޓަރު އަދި އޭޑީއޭގެ ޗެއާމަން ހަމީދުގެ ކޮއްކޯފުޅެވެ. ވީމާ ދެން އައި ދުވަސްވަރަކީ އެސްޓީއޯގެ ހިންގުމަށް ފަހި އަހަރުތަކަކަށް ވެގެން ދިޔަ އެވެ. ނަތީޖާއަކަށް ވެގެން ދިޔައީ (އައްޑު އަތޮޅުގައި ވެސް ފުދޭވަރެއްގެ ފައިސާ ރޯލު ކުރަމުން ދިޔަ ދުވަސްވަރަކަށް ވުމާ އެކު) ކާޑާއި ތެލާއި ސިމެންތި އާއި ހިލަ އާއި ހިލަވެލި އައްޑު އަތޮޅަށް ބޭރުން އެތެރެ ކުރަން ފެށުމެވެ. ގަމާއި އިންޑިއާގެ ޓުޓިކޮރިން އާ ދެމެދު އިމްޕޯޓް ކުރާ ބޯޓްފަހަރު ލިންކެއް ވެސް ހުޅުވިގެން ދިޔަ އެވެ.
ގަމަށް މުދާ ބާލާ ފާލަމާ ޖެހިގެން އެސްޓީއޯގެ އެންމެ ބޮޑު ދެ ގުދަން ހުރުމަކީ ވަރަށް ފަަސޭހަ ކަމަކަށް ވެގެން ދިޔަ އެވެ. މި ދެ އިމާރާތަކީ އިނގިރޭސީން ގަމުގައި ތިބި ދުވަސްވަރު އެ މީހުން ބޭނުން ކުރި އިންޑޯ ސްޓޭޑިއަމާއި ކުދި ބޯޓްފަހަރާއި ލޯންޗް އެހެލައިގެން މަރާމާތު ކުރާ މެރިން ކްރާފްޓް ޔުނިޓްގެ ހަރުގެ އެވެ.
ފަހުންފަހުން އައިސް ކާޑުގެ ބާވަތްތައް ވެސް އެތެރެ ކުރަން ފެށުނެވެ. އަދި ކާޑާއި ހިލަ އާއި ހިލަ ވެލި ބޭލުމުގެ މަސައްކަތް އޮތީ ކޮންޓްރެކްޓަށް ދޫކުރެވިފަ އެވެ. ފުވައްމުލަކާއި ހުވަދު އަތޮޅަށާއި މާލެ އަށް ވެސް ބައެއް ފަހަރު އައްޑޫން މި ތަކެތި ފޮނުވަ އެވެ. މި ހުރިހާ މުދާ އަރުވައި ބޭލުމުގައި ބަސްތާއަކުން ވަކި ވަރެއް ލިބޭ ބަޔަކު ވެސް އުޅުނެވެ. (ނުނިމޭ)
———————————————————————————————
ނޯޓް: މިއީ ފޭދޫ އަލީ ފަހުމީ އަހުމަދު ސެޕްޓެމްބަރު 25، 2013 ގައި ނެރުއްވި "އައްޑޫ ގަން ހިންގުން" މި ފޮތެވެ.
"އައްޑޫ ލައިވް" ގައި މި ފޮތް ސިލްސިލާއެއްގެ ގޮތުގައި ޝާއިއު ކުރަން ހަދިޔާ ކުރެއްވި ކަމަށްޓަކައި، މި ނޫހުގެ ފަރާތުން ފަހުމީ އަށް ހާއްސަ ޝުކުރެއް އަރިސްކުރަމެވެ.
———————————————————————————————