ގިނަ އަދަދެއްގެ ޓޫރިސްޓުންނާ އެކު ޖަރުމަންވިލާތުގެ ކްރޫޒްލައިނާއެއް މިއަދު ހެނދުނު އައްޑު އަށް އަތުވެއްޖެ އެވެ.
"އެމްއެސް ހަމްބާގް" އޮތީ ފޭދޫ ބަނދަރާ ދިމާލުގަ އެވެ. އޭގައި ތިބި ޓޫރިސްޓުން އަންނަނީ ފޭދު އަށް ފައިބަމުންނެވެ.
އެނގިފައިވާ ގޮތުގައި ކްރޫޒްލައިނާގައި 1،200 ކްރޫންނާ އެކު، 1،230 ޓޫރިސްޓުން އެބަ ތިއްބެވެ. އޭގެ ތެރޭގައި ހިމެނެނީ އެފްރިކާގެ ގައުމުތަކުގެ ޓޫރިސްޓުންގެ އިތުރަށް ޖަރުމަނާއި ސީޝެލްސް ފަދަ ގައުމުތަކުގެ ޓޫރިސްޓުންނެވެ.
ޓޫރިސްޓުންތައް ފޭދު އަށް ފައިބައި ރަށުތެރެ ބަލާލަން ނިކުމެ އުޅެ އެވެ. އަދި ގާޑިއާތަކާއި އެ ނޫން ވެސް ތަންތަނުން ވިޔަފާރި ވެސް ކުރެ އެވެ. ޓެކްސީގައި ގުޅިފައިވާ ރަށްތަކަށް ބައެއް ޓޫރިސްޓުން ދަތުރު ވެސް އެބަ ކުރެ އެވެ.
އަދި ހާއްސަކޮށް ފޭދޫ ޕޯސްޓް އޮފީހުން ވަނީ ބަނދަރުމަތީގައި މޭޒެއް ބަހައްޓައި، އެތަނުން ޕޯސްޓްކާޑް ފަދަ ސްވެނިއާތައް ވިއްކަމުންނެވެ.
"އެމްއެސް ހަމްބާގް" މެންދުރު 1:00 ޖަހާ އިރު އައްޑޫން ފުރާނެ ކަމަށް އެ ކްރޫޒްލައިނާ އިން ބުންޏެވެ.