ފޯނެއް ވަގަށް ނަގައިގެން ފަސް އަހަރަށް ޖަލަށް

މޮބައިލް ފޯނެއް ވަގަށް ނެގި މަރަދޫ މީހަކު ފަސް އަހަރަަށް ޖަލަށް ލާން އެ ރަށު މެޖިސްޓްރޭޓް ކޯޓުން މިއަދު ހުކުމްމޮށްފި އެވެ.

އެ ހުކުމް އައިސްފައި ވަނީ މީގެ ކުރިން ވެސް ތަފާތު އެކި ފަހަރުމަތިން ވައްކަންކޮށްގެން ފުލުހުންގެ ބެލުމުގެ ދަށަށް ގެންގޮސްފައިވާ މަރަދޫ ފަތިހަށްފޮޅޭމާގޭ އަލީ ނިމާލް، 24، ގެ މައްޗަށެވެ.

އޭނާގެ މައްޗަށް ކުރި ހުކުމްގައި ބުނެފައި ވަނީ އިބްރާހީމް ނާސިރު އިންޓަނެޝަނަލް އެއާޕޯޓްގެ ޑިއުޓީގައި ގައުމީ އެއާލައިން މޯލްޑިވިއަން އޮޕަރޭޓް ކުރާ އައިލެންޑް އޭވިއޭޝަން ސާވިސަސް (އައިއޭއެސް) އިން ބޭނުން ކުރާ ނޮކިއާ އީ-63 ފޯނެއް ގެއްލިފައި ވަނިކޮށް ނިމާލްގެ އަތުން އެ ފޯން ފެނިފައިވާ ކަމަށެވެ. އެއީ 2012 ވަނަ އަހަރުގެ ތެރޭގަ އެވެ.

އެ ފޯން އޭނާ އަތުން ފެނުނީ ފޯން ވަގަށް ނެގިތާ ފަސް ދުވަސް ފަހުން، ނިމާލް ފުރަން ގޮސް އުޅެނިކޮށް، އެއާޕޯޓްގެ ސީސީޓީވީ ކެމެރާ އަށް ނިމާލް ފޯން ވަގަށް ނެގި މަންޒަރު ރިކޯޑް ކުރެވިފައި ވަނިކޮށް، އެއީ ފޯން ވަގަށް ނެގި މީހާކަން އެނގިގެން ހައްޔަރު ކުުރުމާ ގުޅިގެންނެވެ.

އެހެން ނަމަވެސް އޭނާގެ މައްޗަށް އުފުލި ވައްކަމުގެ ދައުވާ އަށް އިންކާރުކޮށް، އެއީ ގަތް ފޯނެއް ކަމަށް ނިމާލް ޝަރީއަތުގައި ބުނެފައިވެ އެވެ. އެކަމަކު އޭނާ އަށް ޝަރީއަތުގައި ސާބިތުކޮށް ދެވިފައެއް ނުވެ އެވެ.

އަދި އެ ފޯނަކީ އައިއޭއެސްގެ އެއާޕޯޓް އޮފީހުގައި ޑިއުޓީ ގަޑީގައި ބޭނުން ކުރާ ފޯނެއް ކަމަށް ޝަރީއަތަށް ސާބިތުވާތީ ނިމާލްގެ މައްޗަށް ހުކުމްކޮށްފައި ވަނީ ގާނޫނުލް އުގޫބާތުގެ 131 ވަނަ މާއްދާގެ (ހ) އާއި 143 ވަނަ މާއްދާގެ ދަށުންނެވެ.