މީގެ އަހަރެއްހާ ދުވަސް ކުރިން ރައްޔިތުންގެ މަޖިލީހުގެ ރައިސް މުހައްމަދު ނަޝީދު އަވަހަރާކޮށްލަން މާލޭގައި ދިން ނުރައްކާތެރި ހަމަލާއާ ގުޅިގެން އެ މަނިކުފާނަށް އަދިވެސް އިންސާފު ނުލިބޭ ކަމަށް ބުނެ އާއިލާ އިން ކަންބޮޑުވުން ފާޅުކޮށްފި އެވެ.
މެއި 6، 2021 ގައި ކުރީގެ ރައީސަށް ދިން ހަމަލާ އަށް އިންސާފު ނުލިބޭތީ އާއިލާ އިން ނެރުނު ބަޔާނެއްގައި ބުނީ އެ މައްސަލާގައި ހިމެނޭ މީހުންގެ ޝަރީއަތްތައް ދިގުލައިގެންދާތީ އާއި އެކަމުގެ ކުރީ ސަފުގައި ތިބި މީހުން ހައްޔަރު ކުރެވުނަސް އޭގެ ފަހަތުގައި ތިބި މީހުން އަދިވެސް ހޯދިފައި ނުވާ ކަމަށެވެ.
"ހަމަލާގެ ބައިވެރިން ހައްޔަރުކޮށް ދައުވާކޮށްފައިވާ އިރު ހަމަލާގެ ކުރީ ސަފުގައި ފެނިލި މީހުންގެ ފުރަގަހުގައި ތިބި ފަސް ހަނގުރާމަވެރިންނާ މެދު އަހައްމިއްޔަތު ކަން ދީފައި ނުވާތީ ވެސް ކަންބޮޑުވަމެވެ. މައްސަލައާ ގުޅޭ ގުޅުންތައް ތަނަވަސް ގޮތެއްގައި ތަހުގީގުކޮށްފައި ނެތުމުން," ބަޔާނުގައި ބުންޏެވެ.
އޭގައި ބުނީ ފަސް ހަނގުރާމަވެރިޔަކާ މެދު ދައުލަތުގެ އިދާރާތަކުން އަހަންމިއްޔަތު ކަމެއް ދީފައި ނުވާ ކަމަށާއި އެއީ ކަންބޮޑުވާ ކަމެއް ކަމަށެވެ.
"ފުރަތަމަ ކަމަކަށް ރައީސް ނަޝީދު ޒަހަމްވެފައި ވަނިކޮށް ހޮސްޕިޓަލަށް ގެންދިޔަ ހަށިފާރަވެރިންނަށާއި، އެމަނިކުފާނަށް ފަރުވާ ދެއްވި މެޑިކަލް ބޭފުޅުންނަށް ޝުކުރު އަދާކުރަމެވެ. އަދި އާންމުންގެ ފަރާތުން ދެއްވި ހިތްވަރާއި ސަލަވާތުން، ﷲގެ އިޒުނަފުޅާ އެކު ރައީސް ނަޝީދުގެ ފުރާނަ ސަލާމަތްވެ ދިރިލަހައްޓާފައިވާތީ ޝުކުރު އަދާކުރަން." ބަޔާނުގައި ބުންޏެވެ.
އާއިލާ އިން ބުނީ މިދަނޑިވަޅުގައި ވެސް އާއިލާ އިން އެދެނީ ހަމަލާ ހިންގުމަށް ފައިސާ ހަރަދު ކުރި މީހުން ހޯދުމަށްޓަކައި ވަރުގަދަ ތަހުގީގެއް ހިންގުމަށް ކަމަށެވެ. އަދި އެކަން އެގޮތަށްކޮށްފައި ނެތުމުގެ ސަބަބުން ރައީސް ނަޝީދުގެ ޖާނާއި އެމަނިކުފާނު ފަދައިން ޝިކާރައަކަށް ވެފައިވާ އެހެން ފަރާތްތަކުގެ ވަށައިގެން ބިރުވެރިކަމުގެ މާހައުލެއް އުފެދިފައިވާ ކަމަށް ވެސް އާއިލާ އިން ބުންޏެވެ.
"މިކަމުގައި އަދުލު އިންސާފު ގާއިމުވެފައި ނެތުމުން މުޅި މުޖުތަމައުގެ މައްޗަށް ބިރުވެރިކަމުގެ ހިޔަނި އެޅިފައިވާކަމުގައި ގަބޫލުކުރަން." ބަޔާނުގައިވެ އެވެ.
ބަޔާނުގައި ފާހަގަކޮށްފައިވާ ގޮތުގައި ސެކިއުރިޓީ ސަބަބުތަކާ ހެދި ރައީސް ނަޝީދު ހިންގަވާ ހަރަކާތްތައް ހަނިވެފައިވާތީ ސިޔާސީ ލީޑަރެއްގެ ހައިސިއްޔަތުން އެމަނިކުފާނު އަދާކުރައްވަން ޖެހިވަޑައިގަންނަވާ ކަންކަން ހުއްޓިފައިވާ ކަމަށެވެ. އަދި ސިޔާސީ ގޮތުންނާއި އަދި ގާތްތިމާގެ މީހުންނާއި ރަހްމަތްތެރިންނާ އެކު އެމަނިކުފާނު ކުރައްވަން އެދިވަޑައިގަންނަވާ މުއާމަލާތްތަކަށް ހުރަސް އެޅިފައިވާ ކަމަށް ވެސް ބުންޏެވެ.
"ﷲގެ އިރާދަފުޅުން އެމަނިކުފާނު އަޅުގަނޑުމެންނާ އެކު ދިރިދުނިޔޭގައި ހުންނެވި ކަމަށްޓަކައި ޝުކުރުކުރާއިރު މިފަދަ ހަމަލާތަކުގައި ބީވެގެން ދިޔަ ފަރާތްތަކުގެ އާއިލާތަކަށް އަދިވެސް ޖަވާބެއް ލިބިފައި ނުވާތީ ހިތާމަކުރަން،" އާއިލާއިން ބުންޏެވެ. "އެފަދަ ފަރާތްތައް އަޅުގަނޑުމެންގެ މި ޒިކުރާގައި ހަނދާންކޮށް ދުއާގައި ބައިވެރިކުރަން."
ނަޝީދަށް ދިން ޓެރަރިސްޓް ހަމަލައާ ގުޅިގެން ލިބުނު ގެއްލުންތަކަށް ދުވަސްތަކެއް ވަންދެން ރާއްޖޭން ބޭރުން ފަރުވާ ވެސް ހޯއްދެވި އެވެ.