ޗޮކްލެޓް ކާ ހިތްވޭ ހެއްޔެވެ؟ ހާއްސަކޮށް ޑާކް ޗޮކްލެޓެވެ. އެހެން ވެއްޖެ ނަމަ މިއާ ގައިމު ވެސް މާބަނޑު އާ އަންހެނުންނަށް އުފާވެރި ހަބަރަކަށް ވާނެ އެވެ.
ޑާކް ޗޮކްލެޓް ނުވަތަ އެއްވެސް އެއްޗަކާ އެއްނުކޮށް ހުންނަ ޗޮކްލެޓަކީ މާބަނޑު އަންހެނުންނަށް ވަރަށް ފައިދާ ހުރި އެއްޗެއް ކަމަށް ދިރާސާއަކުން ވަނީ ދައްކައިފަ އެވެ.
އެމެރިކާގެ ޔޭލް ޔުނިވަސިޓީގެ ތަޖުރިބާކާރުންގެ ދިރާސާގައި އެންމެ އިސްކޮށް ހުންނެވި ޑޮކްޓަ އެލިޒަބަތު ޓްރިޗޭ ވިދާޅުވީ ޑާކް ޗޮކްލެޓް ބޭނުން ކުުރުމަކީ މާބަނޑު ދުވަސްވަރު ކުރިމަތިވާ އާންމު މައްސަލައެއް ކަމަށްވާ ލޭ މައްޗަށް ދިއުމާ ދުރުކޮށް ކަމެއް ކަމަށެވެ. އެގޮތުން، ޑާކް ޗޮކްލެޓް ބޭނުންކުރާ ނަމަ، ލޭ މައްޗަށް ދިއުމުގެ ފުރުސަތު 69 ޕަސެންޓް ދަށަށްދާ ކަމަށްވެ އެވެ.
އެ ދިރާސާގައި އިތުރަށް ބުނެފައި ވަނީ ޗޮކްލެޓުގައި ހުންނަ ވަރަށް ގިނަ މާއްދާތަކަކީ މާބަނޑު އަންހެނުންގެ ލޭގެ ޕްރެޝަރު ހަމައަކަށް އެޅުވުމަށް އެހީތެރިވާ މާއްދާތައް ކަމަށެވެ.
ދިރާސާ އަށް ފަހު ވާހަކަ ދައްކަވަމުން ޑޮކްޓަ އެލިޒަބަތު ވިދާޅުވީ މާބަނޑު ދުވަސްވަރު، ކޮންމެ ދުވަހަކު ވެސް، "ޗޮކްލެޓްކަން ގަދަ" ޗޮކްލެޓެއް ބޭނުން ކުރުން ވަރަށް ރަނގަޅު ވާނެ ކަމަށެވެ.