މިއަދު ހަވީރު ސ. ގަމުން މާލެ އަށް ފުރި މޯލްޑިވިއަންގެ ބޯޓެއް ފުރިތާ ކުޑައިރުކޮޅެއް ފަހުން "ކުއްލިއަކަށް" އަނބުރާ ގަމަށް ޖައްސައިފި އެވެ.
މިކަމާ ބެހޭ ގޮތުން މޯލްޑިވިއަންގެ ހެޑް އޮފް އެޑްމިނިސްޓްރޭޝަން އަލީ ނަޝާތު ވިދާޅުވީ ފުރިތާ ގާތްގަނޑަކަށް 10 ވަރަކަށް މިނިޓް ފަހުން ބޯޓް ލޭންޑް ކުރަން ޖެހުނީ ބޯޓްގެ އިންޑިކޭޓަރަށް ދިމާވި ޓެކްނިކަލް މައްސަލައެއްގެ ސަބަބުން ކަމަށެވެ.
"އަނެއްހެން މާ ބޮޑު ކަމެއް ދިމާވީކީ ނޫން. އިންޑިކޭޓަރަށް ދިމާވި ކުޑަކުޑަ ޓެކްނިކަލް މައްސަލައަަކާ ގުޅިގެން ރިސްކެއް ނުނަގަންވެގެން އަނބުރާ ގަމަށް ލޭންޑް ކުރީ. އަޅުގަނޑުމެންގެ އިންޖިނޭރުން މިހާރު އެބަ މަސައްކަތް ކުރޭ ދިމާވި މައްސަލަ ހައްލު ކުރެވޭތޯ،" އޭނާ ވިދާޅުވި އެވެ.
މި ހާދިސާ އާ ގުޅިގެން، އެ ބޯޓުން ފުރި ޕަސެންޖަރުން ނެގުމަށް މާލޭން ގަމަށް މިހާރު ވަނީ އިތުރު ބޯޓެއް ދަތުރު ފަށައިފަ އެވެ.
"މާލޭން ދެން ގަމަށް ދާ ބޯޓުން، އެ ޕެސެންޖަރުން ގެންނާނީ،" ނަޝާތު ވިދާޅުވި އެވެ.
އެނގިފައިވާ ގޮތުގައި، ޓެކްނިކަލް މައްސަލަ ދިމާވި ބޯޓަށް ފަހު، މޯލްޑިވިއަންގެ އިތުރު ބޯޓެއް ވެސް އިރާކޮޅަށް ވަނީ ތާވަލްކޮށްފަ އެވެ.
އެހެންވެ ގިނަ އަދަދެއްގެ ޕެސެންޖަރުން ތިބުމާ އެކު މާލޭން މިހާރު އަންނަނީ މޯލްޑިވިއަންގެ ބޮޑު ބޯޓެވެ.