(ފެބްރުއަރީ 24، 2014 ވަނަ ދުވަހުގެ ބަޔާ ގުޅޭ)
އައްޑު އަށް ކަރަންޓްގެ ހިދުމަތް ހޯދަން ރައްޔިތުންވި ގުރުބާނީ
އޭޑީއޭގެ ދަށުން ހިންގަމުން ދިޔަ ގަމުގެ އިންޖީނުގެ ސެޕްޓެމްބަރު 1، 1985 ވަނަ ދުވަހުން ފެށިގެން މޯލްޑިވްސް އިލެކްޓްރިސިޓީ ބޯޑް (އެމްއީބީ) ގެ ދަށަށް ބަދަލު ކުރެވުނެވެ. މި ގޮތަށް މިކަން ހަމަޖެހުނީ އޭޑީއޭ އިން އިންޖީނުގެ ހިންގުމުހެ ހަރަދު އެއް ދުވަހުން އަނެއް ދުވަހަށް ބޮޑުވަމުން ދާތީ އެވެ.
ގަމަށް އިނގިރޭސީން އައިސްގެން އާބާދު ކުރި 1956-1959 ދެމެދު އިމާރާތްކޮށް ބެހެއްޓުނު އިންޖީނުތައް ދުވަސްވެ ބާވެ، އޭގެ ސްޕެއާ ހޯދަން ޖެހޭ ގިނަކަމާއި އޭގެ އަގު ވެސް އެހާ ބޮޑުވާތީ އެވެ.
"މި ރަށްތަކަށް ކަރަންޓް ދޫކުރުމަށް ޕްރޮޖެކްޓެއް ކަނޑައަޅަން ޖެހުނު އެންމެ ބޮޑު ސަބަބަކީ އެހެން ތަންތަނާ ހިލާފަށް މިތާނގައި (ގަމުގައި) އިންޖީނު ގެއެއް ހެދިފައިވާތީ. މީގެ އިތުރަށް ދެ ރަށް ދޭތެރެ ގުޅުވައިދޭ ފާލަމެއް އޮވެފައި ރަށްތައް ކައިރިވެފައި އަދި މާ ގިނަ ސާމާނެއް ނުހޯދައި ކަރަންޓް ދޫކުރެވެން އޮތްކަން. އަދި މި ރަށްރަށަށް ކަރަންޓް ދޫކުރުމުން އެކަށީގެންވާ އާމްދަނީ ލިބޭނެ ކަމަށް ފެންނާތީ،" ކަމަށް އެމްއީބީގެ ޑިރެކްޓަރަކަށް އެ ދުވަސްވަރު ހުންނެވި އަބްދުއްޝުކޫރު "މާވަސް" މަޖައްލާ އަށް ދެއްވި އިންޓަވިއުއެއްގައި ވިދާޅުވެފައިވެ އެވެ.
ބައެއް ހައި ވޮލްޓޭޖް ކޭބަލްތަކަށް ވެސް ގެއްލުންތަކައް ލިބިފައިވުމާ އެކު ކަރަންޓް ބޭކާރުވެ ހަރަދުތައް ބޮޑުވާތީ އެވެ. ގަމުގައި ހިންގާ ފެކްޓްރީތަކަށް ބޭނުންވާ ކަރަންޓް ދޫކުރަމުން ދިޔަ އިންޖީނުން އެކަނި ބޭނުންކޮށް އޮބި ނޯވެ އެވެ. އިންޖީނު އޯވަލޯޑްވާތީ ދެ އިންޖީނުގެ ހިންގަން ޖެހުނެވެ.
ނަމަވެސް އެހާ ބޮޑު ދެ އިންޖީނު ހިންގީމާ ހަރަދު ބޮޑުވެ އެވެ. އަދި ދާދި އަވަހަށް ގަމުގެ އެއާޕޯޓް ތަރައްގީ ކުރަން އޮސްޓްރޭލިއާ ސަރުކާރުން ދެއްވި އެހީގެ ދަށުން ރަންވޭ ލައިޓް އާ ކުރުމާއި އެފަދަ ބައެއް ކަންތައްތައް ކުރެވެމުން ދަނީ އެވެ.
އެ މަސައްކަތް ނިމުމާ އެކު ރޭގަނޑު ދަތުރުތަކަށް އެއާޕޯޓް ހުޅުވިގެން ދާނެ އެވެ.
އެއީ އަނެއްކާ ވެސް އިތުރު ކަރަންޓް ބޭނުން ވާނެ ކަމެކެވެ. ގަމުގެ ހޮލިޑޭ ވިލެޖް (މިހާރުގެ އީކްއޭޓަ ވިލެޖް) އަށް ވެސް ރޭގަނޑުގެ ވަކި ވަގުތަކުން ފެށިގެން ޕަވަ ހައުސްގެ މެއިން ޖަނަރޭޓްތައް ނިއްވާލާފައި ކުޑަކުޑަ އިރުކޮޅަކަށް ޒަރޫޒީ ބޭނުންތައް ވެސް ރަނގަޅަށް ނުފުދޭހާ ވަރަށް ކަރަންޓް ދީފައި އޮންނަން ބޮޑު މައްސަލައަކަށްވެފައިވާތީ އެވެ.
މި މައްސަލަތައް މިހެން އޮތުމާ އެކު އެމްއީބީ ފަދަ ވިޔަފާރި ކުންފުންޏަކުން ގަމުގެ އިންޖީނުގެ ހިންގަން ޖެހުމުން ފައިދާ ވާނެ ގޮތަކަށް މިކަންތައް ކުރަން ނިންމި އެވެ.
އެގޮތުން ގަމުގައި ހުރި މިހާރު ބޭނުން ކުރާ އިނގިރޭސީންގެ ދުވަސްވަރުގެ ހަައި ވޮލްޓޭޖް ކޭބަލްތަކާއި ބޭނުން ނުކުރާ ސަރަހައްދުތަކުގައި ބާކީވެފައި ހުރި ޓްރާންސްފޯމަރުތައް ބޭނުންކޮށްގެން ގަމާއި އެންމެ ކައިރީގައިވާ ފޭދު އަށް ކަރަންޓް ދޫކުރެވޭނެ ގޮތްތަކެއް އޮތްތޯ ބެލި އެވެ.
މިކަމާ ބެހޭ ގޮތުން ފޭދޫގެ ވެރިންނާ މަޝްވަރާކޮށްލުމުން ވަރަށް ރަނގަޅު ގޮތަކަށް މިކަން ހަމަޖެހިގެން ދިޔަ އެވެ.
ފޭދޫ ރައްޔިތުންގެ މަސައްކަތުން ގަމުގައި ހުރި (މިހާރު ބޭނުން ނުކޮށް ހުރި) އަންޑަ ގްރައުންޑް ހައި ވޮލްޓޭޖް ކޭބަލްތަކާއި ޓްރާންސްފޯމަރުތައް ނަގައި އަދި ފޭދޫގެ މަގުތަކުގައި ކޯރު ކޮނެގެން ކޭބަލްތައް ވަޅުލައި ދޭން ވެސް އެއްބަސްވެވުނެވެ.
ވީމާ މި މަސައްކަތް ހިލެ އެވެ. ފޭދޫ ރައްޔިތުން ނިކުމެ ވަރަށް ބުރަ މަސައްކަތްކޮށްގެން ވަރަށް ކުރު މުއްދަތެއްގެ ތެރޭގައި ނިންމި އެވެ.
ފޭދު އަށް ފުދިގެން ވާކީވާ ވަރަށް ވެސް ކޭބަލްތައް ހުރުމާ އެކު ފޭދޫ ކައިރީގައިވާ މަރަދޫފޭދު އާއި މަރަދު އަށް ވެސް އެ ރަށްރަށުގެ ރައްޔިތުން މަސައްކަތްކޮށް ދީގެން ކަރަންޓް ލައި ދިނުމަށް އެ ދެ ރަށުގެ ރައްޔިތުން އެދެން ފެށެމުން އެކަން ވެސް ހަމަޖެހިގެން ދިޔަ އެވެ.
އެއީ އޭގެ ސަބަބުން އެމްއީބީ އަށް ނުހަނު ފައިދާ ކުރާނެ ކަމަކަށް ވާނެތީ އެވެ. ހަމަޖެހިގެން ދިޔައީ ކޮންމެ ގެއެއްގެ މީޓަރު ބޯޑް އެ ކުންފުނިން ބަހައްޓައިދީ އޭގެ އަގު ނުވަ މަސް ދުވަހަށް ބަހާލައިގެން ދައްކާ ގޮތަށެވެ.
އެންމެ ފުރަތަމަ ކަރަންޓް ދޫކުރީ ފޭދުއަށެވެ. އެއީ ފެބްރުއަރީ 2، 1988 ގަ އެވެ. އެއީ އައްޑު އަތޮޅުގެ ތާރީހުގައި ރަށަކަށް 24 ގަޑި އިރު ހައި ވޮލްޓޭޖް ކަރަންޓް ލިބިގެން ދިޔަ ފުރަތަމަ ފަހަރެވެ.
މި ހިދުމަތް ލިބިގަތުމަށްޓަކައި ގަމުގައި ވަޅުލާފައި ހުރި އިނގިރޭސީންގެ ދުވަސްވަރުގެ މިހާރު ބޭނުން ނުކުރާ ކޭބަލްތަކާއި ގަމުގައި ބާކީވެފައި ހުރި އެ ދުވަސްވަރުގެ ޓްރާންސްފޯމަރުތައް ނަގައި، ފޭދު އަސް ގެނެސް އަމިއްލަ އަށް ކޯރު ކޮނެގެން ވަޅުލުމަށް ރައްޔިތުން އެ ކުރި މަސައްކަތަކީ އައްޑު އަަށް ދާއިމީކޮށް ކަރަންޓިގެ ހިދުމަތް ލިބުނު ގޮތެވެ.
މި ރަށްރަށުގެ ރައްޔިތު އަންހެނުން، ކުދި ބޮޑު އެންމެތަކުން ނިކުމެ ރެއެއް ދުވާލެއް ނެތި ގައުމީ ޖޯޝާ އެކު މި ކުރި އިޖުތިމާއީ ހިދުމަތުގެ އަގު ވަޒަން ކުރާނީ ކިހިނެއް ހެއްޔެވެ؟ (ނުނިމޭ)
—————————————————————————————
ނޯޓް: މިއީ ފޭދޫ އަލީ ފަހުމީ އަހުމަދު ސެޕްޓެމްބަރު 25، 2013 ގައި ނެރުއްވި "އައްޑޫ ގަން ހިންގުން" މި ފޮތެވެ.
"އައްޑޫ ލައިވް" ގައި މި ފޮތް ސިލްސިލާއެއްގެ ގޮތުގައި ޝާއިއު ކުރަން ހަދިޔާ ކުރެއްވި ކަމަށްޓަކައި، މި ނޫހުގެ ފަރާތުން ފަހުމީ އަށް ހާއްސަ ޝުކުރެއް އަރިސްކުރަމެވެ.
————————————————————————————–