އާންމުކޮށް މޭވާ އާއި ތަރުކާރީ ކާ ނަމަ ވިސްނުން އިތުރުވެ ސިކުނޑީގެ ބާރު ގަދަވާ ކަމަށް ސައެންސްވެރިންގެ ހޯދުންތަކުން ދައްކައިފި އެވެ.
އެމެރިކާގެ ރޯޔަލް ފާމަސޫޓިކަލް ސޮސައިޓީ އިން ބުނީ ހާއްސަކޮށް، އާންމުކޮށް ބްރޮކޮލީ ކާ މީހުންގެ ވިސްނުމުގެ ބާރު ގަދަވާ ކަމަށެވެ. އަދި ސިކުނޑި އަށް ޖެހޭ ބައްޔެއް ކަމަށްވާ އަލްޒެއިމާ ބަލި ޖެހުން ދުރުކޮށްދޭ ކަމަށް ވެސް އެ ފަރާތުން ބުންޏެވެ.
ހޯދުންތަކަށް ފަހު ސައެންސްވެރިން ބުނީ ސިކުނޑީގެ ބަލިތަކަށް ބޭނުންކުރާ ބޭހެކޭ އެއް އެއްގޮތަށް ހަރަކާތްތެރިވާ މާއްދާތައް އެކުލެވޭ ފަސް ބާވަތެއްގެ މޭވާ އާއި ތަރުކާރީ ފާހަގަކުރެވިފައިވާ ކަމަށެވެ. މީގެ ތެރޭގައި ހިމެނެނީ ބްރޮކޮލީ، އަލުވި، އޮރެންޖް، އާފަލު އަދި ރެޑިޝް އެވެ.
މި ދިރާސާކޮށްފައި ވަނީ އިނގިރޭސި ވިލާތުގެ ޔުނިވާސިޓީ އޮފް ލަންޑަންގެ ބައެއް ކަމަށްވާ ކިންގްސް ކޮލެޖް ލަންޑަންގެ ސައެންސްވެރިންނެވެ. މިހާތަނަށް ފަރުވާއެއް ހޯދިފައި ނުވާ އަލްޒެއިމާ ބައްޔަކީ އުމުރުން ދުވަސްވެފައިވާ މީހުންނަށް ދިމާވާ އާންމު ބައްޔެކެވެ.
މި ބަލި ޖެހުމުން އާންމުކޮށް ކުރާ ކަންތައްތައް ކުރުމަށް ހުރަސްއެޅެ އެވެ. އަދި ސިކުނޑީގެ މަސައްކަތްތަކަށް ހުއްޓުމެއް އައިސް ވާހަކަ ދެއްކުމަށް އުދަނގޫވުން ފަދަ ކަންތައްތައް ކުރިމަތިވެ އެވެ.
ސައެންސްވެރިން ބުނީ ބްރޮކޮލީއާ ބެހޭ އިތުރު ދިރާސާތައް ކުރާނެ ކަމަށެވެ.