އައްޑޫ ސިޓީ ކައުންސިލަށް ހޮވުނު މެމްބަރުން ހުވާ ކުރުމުގެ ރަސްމިއްޔާތު މިރޭ ބާއްވާ ގޮތަށް ހަމަޖައްސައިފި އެވެ.
ކުރިން މި ރަސްމިއްޔާތު ބާއްވާ ގޮތަށް ނިންމީ އިކްޓޯރިއަލް ކޮންވެންޝަން ސެންޓަރު (އީސީސީ) މިއަދު ހެނދުނު އެވެ.
އެހެން ނަމަވެސް ހުވާ ކުރުމުގެ ރަސްމިއްޔާތަށް އެތަން ހަމަޖެހޭ ގޮތް ނުވުމުން، އެ ރަސްމިއްޔާތު މިރޭ ބާއްްވަނީ ހިތަދޫ ޝަރަފުއްދީން ސްކޫލްގަ އެވެ. ރަސްމިއްޔާތ ފަށާނީ 9:00 ޖަހާ އިރު އެވެ.
އައްޑޫ ސިޓީ ކައުންސިލް އިދާރާގެ އޮފިޝަލަކު ވިދާޅުވީ ކައުންސިލަރުން ހުވާ ކުރެއްވުމަށް ފަހު، ކައުންސިލްގެ ފުރަތަމަ ބައްދަލުވުން ވެސް މިރޭ ބާއްވާނެ ކަމަށެވެ.
އައްޑޫ މޭޔަރާއި ޑެޕިއުޓީ މޭޔަރު ހޮވާނީ އެ ބައްދަލުވުމުގަ އެވެ. އޭގެ ފަހުން ކައުންސިލަރުން މީޑިއާތަކަށް ހާއްސަ ނިއުސް ބްރީފިންއެއް ދޭ ގޮތަށް ވެސް ވަނީ ހަމަޖެހިފަ އެވެ.
ކައުންސިލަށް އަަލަށް ހޮވިވަޑައިގަަތް ހަ މެމްބަރުންގެ ތެރޭގައި، މިހާރު ވެސް ކައުންސިލަރުންގެ ގޮތުގައި ތިއްބެވި ތިން ބޭފުޅަކު ހިމެނިވަޑައިގަނެ އެވެ.
އެއީ ހިތަދޫ އުތުރު ދާއިރާ ތަމްސީލް ކުރައްވާ އަދި މޭޔަރުގެ މަގާމުގައި ހުންެވި އަބްދުﷲ ސޯދިގް (ސޯބެ) އާއި ހިތަދޫ މެދު ދާއިރާ ތަމްސީލް ކުރައްވާ ހުސައިން ހިލްމީގެ އިތުރުން މަރަދޫ ދާއިރާ ތަމްސީލް ކުރައްވާ އަބްދުﷲ ތޮއްޔިބް (ޓޮމް) އެވެ.
އަލަށް ހޮވިވަޑައިގަތް ތިން ބޭފުޅުންނަކީ ހިތަދޫ ދެކުނު ދާއިރާ އަށް މުހައްމަދު ޔަސްރިފް، ފޭދޫ ދާއިރާ އަށް އަބްދުﷲ އަސްވާން (އަތޯ) އަދި ހުޅުމީދޫ ދާއިރާ އަށް އަލީ މުހައްމަދު (އައްދު) އެވެ.