(ފެބްރުއަރީ 25، 2014 ވަނަ ދުވަހުގެ ބަޔާ ގުޅޭ)
އެ މަންޒަރު ލޮލުން ދެކުނު މީހުންގެ ހަނދާނުން މިއަދު ވެސް އެކަން ފިލައިގެންދާހާ ދުވަސް ވަނީ އެވެ. އެއްވެސް ފަތެއް، ފޮތެއްގައި އެ ވާހަކައެއް ނެތެވެ. ކަރަންޓްގެ ގަދަ އަލީގައި މި ތިން ރަށުގެ ރައްޔިތުން އުފާ ފާގަތިކަންމަތީ ދިރިއުޅެމުން ދިޔަ އިރު، އަތޮޅުގެ ވެރި ރަށާއި އުތުރި ބިތުގައިވާ ހުޅުދު އާއި މީދޫގެ ރައްޔިތުން ކަނު އަނދިރީގައި ދިރިއުޅެމުން ދިޔަކަން ދަންނާނީ މިއަދު ކޮން ބައެއް ހެއްޔެވެ؟
އަހަރުތަކެއް މިތާގައި ދިޔަ ފަހުން މީހުންގެ ޝަކުވާތައް ވެސް ގިނަވެގެން ދިއުމާ އެކު މި ރަށްރަށަށް ކަރަންޓް ލިބޭނެ ގޮތެއް ހޯދަން މަޖުބޫރުވެގެން ދިޔައޭ ދެންނެވުން ދޮގަކަށް ނުވާނެ އެވެ.
އިނގިރޭސީން ގަމުގައި އުޅުނު ދުވަސްވަރު ހިތަދޫ އާރްއޭއެފް އޭ ކިޔާ އިނގިރޭސީން އުޅުނު، އެ މީހުންގެ ކޮމިއުނިކޭޝަން ރިސީވިން އަށް ކަރަންޓް ދޭން އެތޮޅުގެ އެތެރެވަރީ ކަނޑުން އަޅާފައިވާ ސަބްމެރިން ކޭބަލް ބޭނުންކޮށްގެން ހިތަދު އަށް ކަރަންޓް ދެވޭނެ ގޮތްތޯ ވެސް ބެލި އެވެ.
ނަމަވެސް އެތައް މަސައްކަތެއްކޮށްގެން ބެލި އިރު މި ކޭބަލް ވެސް ވަނީ ނުބެލެހެއްޓި ދޫކޮށްލެވިފައި އޮތުމުގެ ސަބަބުން ހަލާކުވެފަ އެވެ. ބޯޓްފަހަރުގެ ނަގިލި އަޅައިގެންނާއި ބުރިކޮށްލައިގެން އެކި ދިމަދިމާއިން ނެގުމުގެ ސަބަބުންނެވެ.
އަޅުގަނޑަަށް އެނގެ އެވެ. އައްޑު އަތޮޅުގެ ރަށްރަށަށް ކަރަންޓް ދިނުމަށް ސަރުކާރުން އޭޝިއަން ޑިވެލޮޕްމަންޓް ބޭންކް (އޭޑީބީ) އާ އެކު އެއްބަސްވެފައިވާ 7 ލައްކަ ޑޮލަރުގެ އެހީގެ ޕްރޮޖެކްޓެއް ހަމަޖެހުމެއްގެ ތެރޭގައި އޮންނަތާ އަހަރުތަކެއްވެފައިވެ އެވެ. އަދި އޭޑީބީގެ އެހީ ލިބުނު ވެސް މެ އެވެ.
އޮސްޓްރޭލިއާ ސަރުކާރުން އައްޑޫގެ ރަށްރަށަށް ކަރަންޓް ލުމަށްޓަކައި ދެެއްވި ހިލޭ އެހީގެ ހައި ވޮލްޓޭޖް ކޭބަލް އަތޮޅަށް ފުދިގެން މާލެ ގެންދާ ވަރަށް ވެސް ލިބުނެވެ. އަދި ޖަޕާނު ސަރުކާރުން ހުޅުމީދޫ އިންޖީނު ގެއާއި ހިތަދޫ އާރްއޭއެފް ސަރަހައްދުގައި އެހެރަ އިންޖީނުގެ، ހިލޭ އެހީގެ ގޮތުގައި ހަދިޔާ ކުރެއްވި އެވެ.
އެއަށް ފަހު ހިތަދޫ އާރްއޭއެފްގައި އެހެރަ އިންޖީނުގެ ހިންގަނަ ފެށުމާ ގުޅިގެން އަތޮޅުގެ ދެކުނު ބިތުގައިވާ މީހުން އުޅޭ ހުރިހާ ރަށަކަށާއި ގަމަށް ވެސް އެ އިންޖީނު ގެއިން ކަރަންޓް ދޫކުރަމުން ދިޔަ އެވެ. އަދި އެ ހިސާބުން ގަމުގެ އިންޖީނު ގޭގެ ބޭނުން ކެނޑުނެވެ. އަދި ބާ ދަގަނޑުގެ ގޮތުގައި އިންޖީނުތައް ވިއްކާލީ އެވެ.
ބަޔާންވެ ދިޔަ ހުރިހާ ކަންތައްތަކަކީ ވެސް ސަރުކާރުން ރައްޔިތުންނަށް ފޯރުކޮށް ދޭން ޖެހޭ އަސާސީ ހިދުމަތްތަކެވެ. ގަމާއި ފޭދު އާ ދެމެދު ފާލަމެއް ލުމެވެ. މަރަދޫ، މަރަދޫފޭދޫ އަދި ފޭދު އަށް 24 ގަޑި އިރު ކަރަންޓް ލިބޭނެ ގޮތް ހަމަޖެއްސުމެވެ. ބަސް ދަތުރާއި ހުޅުދު އާއި މީދު އަށް ފެރީގެ ދަތުރު ފެށުމެވެ. އެސްޓީއޯގެ ވިޔަފާރި ފެށުމެވެ. ހުޅުލެ އިން ގަމަށް ވައިގެ ދަތުރު ފެށުމެވެ. ބޭންކްގެ ހިދުމަތެވެ.
މި ހިދުމަތްތައް ގުޅިފައި ވަނީ ގަމުގައި އަލަށް އުފެއްދި ފެކްޓްރީތަކާ އެވެ. އެތަންތަން ހިންގުމަށްޓަކައި ސަރުކާރުން ފަހިކޮށް ދޭން ޖެހޭ އަސާސީ ހިދުމަތްތަކެވެ. މި ހިދުމަތްތަކުގެ ތެރޭގައި ނަމަވެސް ފަހިވެގެން މި ދިޔައީ ފެކްޓްރީތަކާއި އެތަންތާނގެ މުވައްޒަފުްނގެ ހައްގުގަ އެވެ.
އެހެން ނަމަވެސް މި ހުރިހާ ފަސޭހައަކާއި ފައިދާއެއްގެ ހިއްސާ އައްޑޫގެ ރައްޔިތުންނަށް ވެސް ލިބިގެން ދިޔައީ އެވެ. (ނުނިމޭ)
———————————————————————————————–
ނޯޓް: މިއީ ފޭދޫ އަލީ ފަހުމީ އަހުމަދު ސެޕްޓެމްބަރު 25، 2013 ގައި ނެރުއްވި "އައްޑޫ ގަން ހިންގުން" މި ފޮތެވެ.
"އައްޑޫ ލައިވް" ގައި މި ފޮތް ސިލްސިލާއެއްގެ ގޮތުގައި ޝާއިއު ކުރަން ހަދިޔާ ކުރެއްވި ކަމަށްޓަކައި، މި ނޫހުގެ ފަރާތުން ފަހުމީ އަށް ހާއްސަ ޝުކުރެއް އަރިސްކުރަމެވެ.
———————————————————————————————