އެމްވީކޭން "ނަމަކަށް" ހިންގަމުން ދިޔަ ގަމުގެ ދޫގަސް ރައްޔިތުންގެ މަޖިލީހުގެ ކާށިދޫ ދާއިރާގެ މެމްބަރު އަބްދުﷲ ޖާބިރު ގެ ޖޭ ހޮޓެލްސް އާ ހިންގަން ހަވާލު ކުރިތާ ފަސް ވަރަކަަށް ދުވަސް ފަހުން، ޖާބިރަށް އައި ޖަލު ހުކުމަކާ ގުޅިގެން، ޖަލުގައި ހުކުމް ތަންފީޒު ކުރައްވަން ޖެހިވަޑައިގަތުމުން، ދޫގަސް ހިންގުމުގެ މަސައްކަތް މިހާރު ހުއްޓިފައިވާ ކަމަށް ޖޭ ހޮޓެލްސް އިން ބުނެފި އެވެ.
އެ ކުންފުނީގެ މާކެޓިން އެގްޒެކެޓިވް އަބްދުލް ޢަފޫރު ވިދާޅުވީ "ޖާބިރު ޖަލަށް ގެންދެވުމާ އެކު ދޫގަހުގެ މަސައްކަތް ހުއްޓިފައިވާ" ކަމަށެވެ.
އެހެންވެ މިހާރު އެތަން "ޖޭ ޕެލަސް" ގެ ނަމުގައި ހިންގަން ފެށި މަސައްކަތްތައް މިހާރު މަޑު ޖެހިފައިވާ ކަމަށް އޭނާ ވިދާޅުވި އެވެ. އަދި އެކަން އެގޮތަށް ދިމާވީ ޖޭ ހޮޓެލްސްގެ ކަންކަމާ ގުޅޭ ގޮތުން ގޮތް ނިންމަވަން ހުންނެވި ކުންފުނީގެ ޗެއާމަން ޖާބިރު މި ވަގުތު ޖަލުގައި ދުވަސްތައް ހޭދަ ކުރައްވަން ޖެހިވަޑައިގަތުމުން ކަމަށް ޢަފޫރު ވިދާޅުވި އެވެ.
"މިހާރު އަޅުގަނޑުމެން ގަމުގައި ފެށި މަސައްކަތްތައް ވަނީ ސްލޯޑައުންވެފައި. އަޅުގަނޑުމެންގެ ވިޔަފާރީގައި ޑިސިޝަން ނަންގަބާ ބޭފުޅާ ޖަލުގައި ހޭދަ ކުރައްވަން ޖެހިވަޑައިގަތުމުން ދޫގަހުގެ މަސައްކަތް ވަނީ ހުއްޓުމަކަށް އައިސްފައި،" އޭނާ ވިދާޅުވި އެވެ. "އެކަމަކު މިކަމާ ގުޅޭ މަޝްވަރާތައް ކުރިއަށް އެބަދޭ. ނަމަވެސް އޭގެ ތަފުސީލެއް ދޭން އަޅުގަނޑަށް މި ވަގުތަށް ވަރަށް ދަތި."
އައްޑޫގެ ދަތުރުފަތުރާ އެކު ދޫގަސް، ހިންގަން އެމްވީކޭން، ޖޭ ހޮޓެލްސް އާ އެތަނުގެ މެނޭޖްމަންޓް ހަވާލު ކުރީ މި މަހުގެ 15 ވަނަ ދުވަހު އެވެ. ހޮނށޑައިދޫގައި ބަނގުރާ ހިއްޕެވި ކަމަށް ބުނާ މައްސަލާގައި، ކުޑަކަމުދާ ތަކެތި ނުދެއްވި މައްސަލާގައި ޖާބިރު އެއް އަހަރަަށް ޖަލަށް ހުކުމް ކުރީ މި މަހުގެ 20 ވަނަ ދުވަހު އެވެ.
ޢަފޫރު ވިދާޅުވީ ޖާބިރުގެ މައްޗަށް ހުކުމެއް އިއްވައި، އަދަބު ދެއްވުމުގެ ކުރިން މި ގައުމުގައި ބޮޑެތި ޖަރީމާތައް ހިންގާފައި ތިބި އެތައް ބަޔަކު އެބަތބި ކަމަށެވެ. އެެހެންވެ މިފަދަ މީހުންނަށް އަދަބު ނުދީގެން އުޅެނީ ކީއްވެތޯ އާ މެދު އޭނާ ވަނީ ސުވާލު އުފައްދައިފަ އެވެ.
"މީގެ މާނައަކީ ޖާބިރަށް އަދަބު ދޭން ނުޖެހޭ ވާހަކައެއްް ނޫން. ކުށެއްކޮށްފި ކަމަށް ވަންޏާ އަދަބު ދޭން ޖެހޭނެ،" ޢަފޫރު ވިދާޅުވި އެވެ. "އެކަމަކު މި ދަނޑިވަޅުގައި ޖާބިރުގެ މައްޗަށް ހުކުމެއް އިއްވައި ޖަލަށް ލެއްވީމަ އެކަމާ ސުވާލް އުފެދޭ ކަންތައްތަކެއް އެބަހުރި."
އެމްވީކޭ އަށް ގަމުގެ ދޫގަސް 50 އަހަރަށް، ކުރީގެ ރައީސް މުހައްމަދު ނަޝީދުގެ ސަރުކާރުން ދިނީ އައްޑު އާއި ފުވައްމުލަކުގެ ދަތުރުފަތުރުގެ ހިދުމަތުގެ ސަބްސިޑީއެއްގެ ގޮތުގަ އެވެ.
އެހެން ނަަމަވެސް އެ ކުންފުންޏަށް މިހާތަނަށް ދަތުރުފަތުރުގެ ހިދުމަތް ވެސް އެކަށީގެންވާ ގޮތަކަށް ދެވިފައެއް ނުވެ އެވެ. އަދި ދޫގަސް ވެސް ހިންގިފައެއް ނުވެ އެވެ.