އަމީތާބް ބައްޗަން ހަންޑިއެއްގެ ރޯލުން ފެނިގެން ދިޔަ 2008 ވަނަ އަހަރުގެ ފިލްމް "ބޫތުނާތު" ގެ ސީކްއެލް "ބޫތުނާތު ރިޓާން" ސްކްރީނަށް އަންނަން ތައްޔާރުވެއްޖެ އެވެ.
މި ފިލްމު އެޕްރީލް 11 ގައި ރިލީޒު ކުރަން ހަމަޖެހިފަައިވާ އިރު، ފިލްމުގެ ފުރަތަމަ ޓްރެއިލާ ވެސް މިހާރު ވަނީ އާންމުކޮށްފަ އެވެ.
އަމީތާބްގެ އިތުރުން "ބޫތުނާތު ރިޓާން" ގައި އެންމެ މުހިއްމު ރޯލަކުން ފެނިގެން ދާނީ މި ފަހަރު ވެސް ކުޑަ ކުއްޖެކެވެ.
މި ފިލްމުގައި ދައްކުވައި ދެނީ ޕްރިކްއެލް އާ އެއްގޮތަށް ހަންޑި އާއި އެ ކުއްޖާ އާ ދެމެދު އޮންނަ ހާއްސަ ގުޅުމެވެ. އެކަމަކު މި ފަހަރު މި ދެ މީހުންގެ މެދުގައި ހިނގާ ހާދިސާތައް ވަރަށް ބޮޑަށް ތަފާތު ވާނެ އެވެ.
"ބޫތުނާތު" ގައި ޖޫހީ ޗާވްލާ ވެސް މުހިއްމު ރޯލެއްް ކުޅެފައިވެ އެވެ. އެއީ ކުޑަ ކުއްޖާގެ މަންމަގެ ރޯލުންނެވެ. އަދި ޝާހްރުކް ހާން އެ ކުއްޖާގެ ބައްޕަގެ ރޯލުން ހަމައެކަނި ހާއްސަ ފެނިލުމަކުން ދައްކަ އެވެ.
ހަމަ އެ ގޮތަށް ސީކްއެލްގައި ވެސް ޝާހްރުކްގެ ކެމިއޯއެއް ވަނީ ހިމަނައިފަ އެވެ. އަދި "ބޫތުނާތު ރިޓާން" އިން ބޮމަން އިރާނީ ވެސް ފެނިގެން ދާނެ އެވެ.
މީގެ އިތުރުން ފިލްމުގެ އައިޓަމް ލަވައަކުން ރަންބީރު ކަޕޫރު ވެސް ފެނިގެން ދާނެ އެވެ.
"ބޫތުނާތު" ޑައިރެކްޓް ކުރީ ވިވެކް ޝަރްމާ ނަމަވެސް "ބޫތުނާތު ރިޓާން" ޑައިރެކްޓްކޮށްފައި ވަނީ ނިތޭޝް ތިވާރީ އެވެ.