އިކޮނޮމިކް މިނިސްޓަރު ފައްޔާޒް އިސްމާއިލްގެ އިތުބާރު ނެތްކަމަށް މީގެ ކުރިން ސޮއި ކުރި މެމްބަރުން ފައްޔާޒަށް ތާއީދު ކުރާތީ އެމްޑީޕީގެ ކުރީގެ ޕީޖީ ލީޑަރު އަދި މެދުހެންވޭރު ދާއިރާގެ މެމްބަރު އަލީ އާޒިމް ފާޑުވިދާޅުވެއްޖެއެވެ.
އާޒިމް ކުރެއްވި ޓްވީޓެއްގައި ވިދާޅުވީ މީގެކުރިން ފައްޔާޒްގެ އިތުބާރު ނެތްކަމަށް އެމްޑީޕީގެ 33 މެމްބަރުން ސޮއިކޮށް މަޖިލީހަށް ހުށަހެޅުމަށް އޭނާއަށް ހަވާލުކުރި ކަމަށެވެވެ. އަދި މިއަދު ހަމަ އެމެންބަރުން ފައްޔާޒައް ޕާޓީ ހިންގާލެވޭނޭކަމަށް ބުނާ ބުނުމަކީ އެމްޑީޕީގެ އާއްމު މެންބަރުންނަށް ވަރަށްބޮޑަށް އޮޅުވާލާ އޮޅުވާލުމެއް ކަމަށް އާޒިމް ވިދާޅުވިއެވެ.
އާޒިމް ވަނީ ޓްވީޓްގައި ފައްޔާޒްގެ އިތުބާރު ނެތްކަމަށް ހުށަހެޅަން އުޅުނު މައްސަލައިގެ ފޮޓޮއެއްވެސް ހިއްސާކޮށްފައެވެ. އެހެންނަމަވެސް އެ މައްސަލައިގައި ސޮއިކުރީ ކޮން މެމްބަރުންނެއްކަމެއް ހާމަކޮށްފައެއް ނުވެއެވެ.
MDP ޕ ގްރޫޕުގެ 33 މެންބަރުން ސޮއިކޮށް މިނިސްޓަރ ފައްޔާޒުގެ އިތުބާރުނެތްކަމަށް ބުނެ، މަޖްލީހަށް ހުށަހެޅުމަށް ވަނީ އަޅުގަނޑާ ހަވާލުކޮށްފައި. މިއަދު ހަމަ އެމެންބަރުން ފައްޔާޒައް ޕާޓީ ހިންގާލެވޭނޭކަމަށް ބުނާ ބުނުމަކީ MDP ގެ އާއްމު މެންބަރުންނަށް ވަރަށްބޮޑު އޮޅުވާލުމެއް. pic.twitter.com/Cdt04jP2JH
— 𝐀𝐥𝐢 𝐀𝐳𝐢𝐦 (@aliaazim) May 11, 2022
ފައްޔާޒްގެ އިތުބާރު ނެތްކަމުގެ މައްސަލަ މީގެކުރިން މަޖިލީހަށް ވައްދަން އުޅޭކަމުގެ އަޑުތަކެއް ގަދަވިއެވެ. އެހެންނަމަވެސް އެ މައްސަލަ މަޖިލީހަށް ހުށަހަޅާފައެއް ނުވެއެވެ.
އެމްޑީޕީގެ ޗެއާޕާސަންގެ އިންތިހާބު މޭ 14 ވަނަ ދުވަހު ބޭއްވުމަށް ނިންމާފައިވާއިރު، ފައްޔާޒާ މި އިންތިހާބުގައި ވާދަކުރައްވަނީ މެމްބަރު އިމްތިޔާޒް ފަހުމީއެވެ. އިންތިއާ ފައްޔާޒަށް ތާއީދުކުރާ ފަރާތްތަކުގެ މެދުގައި ބަހުގެ ހަމަލާތައް އަންނަނީ ބަދަލުކުރަމުންނެވެ.