ފޭދޫ ބަނަދަރު ސަރަހައްދުން ފޮޓޯ ނެގި މައްސަލައެއްގައި ހައްޔަރު ކުރި "ހަވީރު "ގެ އައްޑޫ ރިޕޯޓަރު އަހްމަދު އަދްޝަން ފަސް ގަޑި އިރު ފަހުން "މީނާ މި ވަގުތު ހައްޔަރުކޮށްފައި ބަހައްޓަން ނުފެންނާތީ" ކަމަށް ބުނެ ދޫކޮށްލައިފި އެވެ.
އަދްޝަން މިރޭ "އައްޑޫ ލައިވް" އާ ވާހަކަ ދައްކަމުން ބުނީ ފޭދޫ ބަނދަރުގެ ތްރީ އެސް ސްޕަމަޓް ސަރަހައްދުގައި ހުރެ އެނާ ފޮޓޯ ނެގުމާ ގުޅިގެން "ސޯޓްބުރި އާއި ޓީޝާޓް" ލައިގެން ތިބި ބަޔަކު އޭނާ އާ ހުތުރު ބަހުން މުހާޠަބްކޮށް ފޮޓޯ ނުނެގޭނެ ކަމަށް ބުނުމުން އޭނާ އަކީ ނޫސްވެރިއެއް ކަމަށް ބުނި ކަމަށެވެ. އަދި އެ މީހުންނަކީ ފުލުހުން ކަމަށް ބުނި ނަމަވެސް އެއީ ފުލުހުންކަން އެނގޭނެ އެއްވެސް ގޮތެއް އެ މީހުން ނެތް ކަމަށް އޭނާ ބުންޏެވެ.
އަދުޝަން އާ ވާހަކަ ދެއްކި ތިން އެސްއޯ ފުުހުންގެ ތެރެއިން ދެ މީހަކު ތިބީ ސޯޓް ބުރި އާއި ޓީޝާޓް ލައިގެންނެވެ. އަދި އަނެއް މީހާ ހުރީ ޖޯޒީއަކާއި ޖިންސެއްގަ އެވެ. އަދި އެ މީހުންނަކީ ފުލުހުންކަން އެނގޭނެ އެއްވެސް ގޮތެއް އެ މީހުން ތިބި ގޮތުން ފާހަގަ ކުރެވެން ނެތް ކަމަށް އަދުޝަން ބުންޏެވެ.
އަދްޝަން ހައްޔަރު ކުރުމާ ގުޅިގެން "އައްޑޫ ލައިވް" އިން ގަމުގެ ޕޮލިސް ސްޓޭޝަނަށް ދިއުމުން އޭނާ ހައްޔަރު ކުރުމުގައި އުޅުނު އެސްއޯ ފުލުހަކު ބުނީ އޭނާ ހައްޔަރު ކުރީ ފުލުހުންގެ ވާޖިބަށް ހުރަސް އަޅައިގެން ކަމަށެވެ.
ނަމަވެސް އޭގެ ފަހުން ފުލުހުން ބުނީ އަދްޝަން ހައްޔަރު ކުރީ ޓްރެފިކް މައްސަލައެއްްގައި ކަމަށް ބުންޏެވެ.
އަދި ފުލުހުން އަދުޝަން ދޫކޮށްލި އިރު ދިން މައުލޫމާތު ފޯމުގައި ބުނެފައި ވަނީ އޭނާ ހައްޔަރު ކުރި ސަބަބަކީ "ފުލުހުންގެ އަމުރަށް ނުކިޔަމަންތެރިވެ، ފުލުހުންގެ ދައުރު އަދާ ކުރުމަށް ހުރަސް އެޅި ކަމަށް ތުހުމަތު ކުރެވޭ މައްސަލަ ތަހުގީގު ކުރުމަށް" ކަމަށެވެ.
ފުލުހުން އަދުޝަން މިރޭ 7:50 ގައި ދޫކޮށްލި އިިރު، ކަން ހިނގި ގޮތުގެ ހުލާސާ ބަޔާނެއް ވެސް އޭނާ ވަނީ ފުލުހުންނަށް ދީފަ އެވެ.